မဲခေါင်၊ ဖေဖေါ်ဝါရီ ၄
ရှမ်းပြည်မြောက်ပိုင်း၊ မိုင်းရယ်မြို့နယ်၊ ဟိုက်ပုကျေးရွာ အနီးရှိ ကျားဖြန့်လုပ်ငန်းတစ်ခုကို “ဝ” တပ်ဖွဲ့ – UWSA က ဦးဆောင်ဖမ်းဆီးခဲ့သော်လည်း စစ်ကောင်စီက သတင်းထုတ်ပြန်ရာတွင် UWSA က ဦးဆောင် ဖမ်းဆီးခဲ့ခြင်းကိုမူ သတင်း ချန်လှပ်ထားသည်ကို တွေ့ရသည်။
ယမန်နေ့ ဖေဖော်ဝါရီလ ၃ ရက် နံနက်ပိုင်းတွင် မိုင်းရယ်မြို့၏ အရှေ့တောင်ဘက် ၃၅ ကီလိုမီတာခန့်အကွာ ဟိုက်ပုကျေးရွာ အနီးရှိ ကျားဖြန့်လုပ်ငန်းကို UWSA က ဦးဆောင်ဖမ်းဆီးခဲ့ပြီး နောက်မှသာ စစ်ကောင်စီ တန့်ယန်းဗျူဟာမှူး ဦးဆောင်သည့်အဖွဲ့က ရောက်လာကာ ကျားဖြန့်လုပ်ငန်း လုပ်ကိုင်နေကြသူများဖြစ်သည့် တရုတ်နိုင်ငံသား အမျိုးသား ၃၂၁ ဦး၊ အမျိုးသမီး ၉ ဦး၊ စုစုပေါင်း ၃၃၀ ဦးတို့ကို ဖမ်းဆီးမိခဲ့ခြင်း ဖြစ်သည်။
ထို့ပြင် မိုးကာအစိမ်းစများဖြင့် ဆောက်လုပ်ထားသည့် အဆောက်အအုံ ၁၅ လုံး၊ ဆောက်လုပ်ဆဲ အဆောက်အအုံ ၁၀ လုံး၊ အွန်လိုင်းလိမ်လည်မှုများ လုပ်ဆောင်ရာတွင် အသုံးပြုသည့် မီးစက် ၂ လုံး၊ ဖုန်းမျိုးစုံ ၂၀၈ လုံး၊ ALL-IN-ONE ကွန်ပျူတာ ၈၆ လုံး၊ လက်တောပ့် ၇ လုံး၊ စတားလင့်အင်တာနက်၂၃ လုံး၊ ကားမျိုးစုံ ၁၀ စီးတို့ကိုလည်း သိမ်းဆည်းမိခဲ့သည်ဟု စစ်ကောင်စီ ထုတ်ပြန်ချက်တွင် ဖော်ပြသည်။
“ဝ က ရှေ့ကနေ ဦးဆောင်ပြီး လာဖမ်းတာ။ ကျားဖြန့်စခန်းကို လာဝိုင်းတာကလည်း “ဝ” ပဲ၊ ပြီးမှ စစ်ကောင်စီ ဗျူဟာမှူးနဲ့ အဖွဲ့က ဓာတ်ပုံရိုက်တာ၊ လာမဖမ်းခင်ကလည်း ကြိုအကြောင်းထားပြီးသားမို့လို့ ကျားဖြန့်သူဌေးတွေ လုံခြုံရေး ယူပေးတဲ့သူတွေက အကုန်လွတ်တယ်။ အဲ့ကျားဖြန့်ရုံက တစ်လကျော်လောက်ပဲ ရှိသေးတယ်။ ရုံတွေ ဆောက်တာတောင် မပြီးသေးဘူး” ဟု ဒေသခံ သတင်းရင်းမြစ်တဦးက ပြောသည်။
ယင်းဖမ်းမိသည့် နေရာသည် စစ်ကောင်စီနှင့် လက်အောက်ခံ ပြည်သူ့စစ်များ၏ ထိန်းချုပ်နယ်မြေ အတွင်းတွင် တည်ရှိသည့် နေရာဖြစ်သည်။
“ဟိုက်ပုရွာက စစ်ကောင်စီနဲ့ မိုင်းဟပြည်သူ့စစ် စိုးမိုးနေရာပါ။ ဒါပေမဲ့ အခု ဖမ်းတာက နမ့်ပန်မြစ်ရဲ့ အရှေ့ဘက်မှာဆိုတော့ စစ်ကောင်စီ အဓိကစိုးမိုးတဲ့ နယ်မြေပဲ၊ ကျားဖြန့်တွေကို လာဖမ်းတာ ပြည်သူ့စစ်တွေတောင် မပါဘူး။ “ဝ” နဲ့ စစ်တပ်ပဲ လာဖမ်းတာ၊ အခုတစ်ခါဖမ်းတာက တော်လှန်ရေးအဖွဲ့တွေရဲ့ နယ်မြေမဟုတ်ဘူး။ သူတို့ စကစ စိုးမိုးနယ်မြေပဲ” ဟု ဒေသခံ သတင်းရင်းမြစ်တဦးက ပြောသည်။
ဖမ်းဆီး သိမ်းဆည်းမိသည့် ကျားဖြန့် လုပ်ကိုင်သူများနှင့် ပစ္စည်းများကို ဥပဒေအရ ဆက်လက် အရေးယူသွားမည် ဖြစ်ပြီး နောက်ကွယ် ပါဝင်သူများကိုလည်း ဖော်ထုတ်မည်ဟု စစ်ကောင်စီက ထုတ်ပြန်ချက်တွင် ဆိုသည်။
#MeKongnews
#မိုင်းရယ်
#ကျားဖြန့်
#တရုတ်
#စစ်ကောင်စီ
#UWSA
