မဲခေါင်၊ ဩဂုတ် ၂၄
ရှမ်းပြည်အရှေ့ပိုင်းတွင် တရားမဝင်ရွှေတူးဖော်မှုများကို ရပ်တန့်ခိုင်းထားသော်လည်း မိုင်းယောင်းမြို့နယ်အတွင်းတွင်မူ ရပ်နားမှု မရှိဘဲ ပြည်သူ့စစ်ကိုလာဘ်ထိုးကာ ရွှေဆက်တူးနေဆဲဖြစ်ကြောင်း ဒေသခံများထံမှ သိရသည်။
ရှမ်းပြည်အရှေ့ပိုင်း၊ မိုင်းယောင်းမြို့နယ်တွင် တရားမဝင် ရွှေတူးဖော်မှုကို အလွန်အကျွံ ပြုလုပ်နေပြီး ချောင်းရေများ ညစ်ညမ်းပြီး ဒေသခံများ ရေအသုံးပြုရန် အခက်အခဲများနှင့် ရင်ဆိုင်နေရကြောင်း ဒေသခံတစ်ဦးက ဩဂုတ်လ ၂၃ရက်တွင် ပြောသည်။
မိုင်းယောင်းမြို့၊ မုန်းလိုက်တံတားအောက်ရှိ ဟိုဒုံးရွာအနီးတွင် ၂၀၂၆ ခုနှစ် ဇန်နဝါရီလ ၁ရက်မှ စတင်ကာ တရားမဝင် ရွှေတူးဖော်မှုများ လုပ်ဆောင်နေခြင်းကြောင့် မိုင်းယောင်းဒေသခံများ ရေအသုံးပြုရန် ခက်ခဲလာခြင်းဖြစ်သည်။
ဒေသခံများသည် နမ့်ယောင်းချောင်းနှင့် နမ့်ခပ်ချောင်းရေကို အဓိကထား အသုံးပြုနေကြရခြင်း ဖြစ်ရာ လက်ရှိတွင် ဟိုဒုံးရွာအနီးသာမက နမ့်ယောင်း ရေထွက်ရှိရာ နေရာအနီးဝန်းကျင်၌ ရွှေတူးဖော်မှုများ ပြုလုပ်ခြင်း၊ အဆိပ်အတောက်ဖြစ်စေသည့် ဓာတုပစ္စည်းများ အသုံးပြုခြင်းတို့ကြောင့် ချောင်းရေများ အရောင်ပြောင်းကာ ညစ်ညမ်းနေသဖြင့် သောက်သုံးရေအတွက် စိုးရိမ်နေကြရသည်ဟု ဒေသခံများက ဆိုသည်။
“ဟိုဒုံးဘက်မှာတော့ ဒီနှစ်မှ စလုပ်တာပါ။ မိုင်းယောင်းမှာက မနှစ်ကတည်းက နေရာအနှံ့ ရွှေတူးနေကြတာ။ အခုဆို ချောင်းရေတွေက ညစ်ပတ်နေလို့ ငါးတွေပါ သေနေပြီ။ ရေသန့်တောင် ရဖို့ခက်နေတယ်။ တရုတ်တွေလာတူးနေတာ၊ သူတို့ကတော့ တရားဝင်တယ်လို့ ပြောတာပဲ။ အုပ်ချုပ်ရေးပိုင်းကလည်း ဘာမှ ဝင်ရောက်ဖြေရှင်းပေးတာ မရှိဘူး” ဟု မိုင်းယောင်းမြို့၊ ရပ်ကွက် (၂) တွင် နေထိုင်သူတစ်ဦးက ပြောသည်။
မိုင်းယောင်းမြို့နယ်တွင် နမ့်လွေချောင်း၊ နမ့်ခပ်ချောင်း၊ နမ့်ပုန်းချောင်း၊ နမ့်ဖွန်ချောင်းနှင့် နမ့်ယောင်းချောင်းတို့ကို မှီတင်း၍ ဒေသခံများက သောက်သုံးရေနှင့် စိုက်ပျိုးရေး လုပ်ငန်းများကို အသက်မွေးဝမ်းကျောင်းပြု လုပ်ကိုင်နေကြခြင်း ဖြစ်သည်။
ရှမ်းပြည်အရှေ့ပိုင်းဒေသတွင် ရွှေတူးဖော်မှုများကြောင့် သဘာဝပတ်ဝန်းကျင် ပျက်စီးကာ မိုးရာသီကာလ၌ ရေကြီးရေလျှံမှုများ နှစ်စဉ်ဖြစ်ပေါ်လျက်ရှိကြောင်း သိရသည်။
#MeKongNews
#မိုင်းယောင်း
#ရှမ်းအရှေ့
#တရားမဝင်ရွှေတူး
#နမ့်ယောင်းချောင်း
#နမ့်ခပ်ချောင်း
ပုံအညွှန်း – မိုင်းယောင်းမြို့ တရားမဝင် ရွှေလုပ်ကွက်တစ်ခုကို ၂၀၂၆ ခုနှစ်အစပိုင်းက တွေ့မြင်ရစဉ်
