မဲခေါင်၊ ဇူလိုင် ၇
၂၀၂၄ ခုနှစ်က ထိပ်တိုက် အပြန်အလှန်တိုက်ခိုက်ခဲ့သော အီရန် – အစ္စရေး စစ်ပွဲ အစပိုင်းရက်များကပင် အစ္စရေး လေကြောင်းတိုက်ခိုက်မှုကြောင့် သေဆုံးခဲ့ပြီဟု သတင်းများ ထွက်ပေါ်ခဲ့သည့် အီရန်သမ္မတဟောင်း အမာဒီနီဂျက်ကို ဇူလိုင် ၆ ရက်က တီဟီရန်မြို့တော်တွင် ကျင်းပသည့် အီရန်ခေါင်းဆောင် အယာတိုလာ ခါမေနီ ဈာပန၌ ပြန်လည် ထွက်ပေါ်လာသဖြင့် တစ်ကမ္ဘာလုံး အံ့အားသင့်ခဲ့ရသည်။
အီရန်သတင်းမီဒီယာများစွာက ၂၀၂၄ ခုနှစ်တွင် အစ္စရေးပစ်ခတ်သည့် ဒုံးကျည်တစ်လုံး အမာဒီနီဂျက် အိမ်အနီး ကျရောက်ပြီးနောက် သေဆုံးခဲ့ပြီဟု ဖော်ပြခဲ့ကြပြီး ထိုစဉ်ကတည်းက ၎င်းကို မတွေ့ရတော့ဘဲ ခါမေနီ ဈာပနမှ ပြန်လည် ထွက်ပေါ်လာသည်ကို ရုပ်သံမှတ်တမ်းများတွင် အံ့အားသင့်ဖွယ်ရာ မြင်တွေ့ခဲ့ရခြင်းဖြစ်သည်။
အမာဒီနီဂျက်သည် ၂၀၀၅ ခုနှစ်မှ ၂၀၁၃ ခုနှစ်အထိ အီရန်သမ္မတရာထူးကို တာဝန်ယူခဲ့သူဖြစ်ကာ သတင်းများက သေဆုံးခဲ့ပြီဟု ဖော်ပြသော်လည်း အီရန်အစိုးရအာဏာပိုင်များက ထိုသတင်းများကို အတည်ပြုခြင်း မရှိသလို ငြင်းဆိုခဲ့ခြင်းလည်း မရှိခဲ့ဘဲ ယခုမှ လူပုံအလယ် ပြန်လည် ထွက်ပေါ်လာခြင်း ဖြစ်သည်။
ယခုတစ်ပတ်လုံး ကျင်းပမည့် အယာတိုလာခါမေနီ ဈာပနသို့ အခြားအီရန်သမ္မတဟောင်းများ ဖြစ်သည့် မိုဟာမက် ခါတမီနှင့် ဟက်ဆန်ရူဟာနီတို့မှာမူ တက်ရောက်လာခြင်း မရှိသဖြင့် ဝေဖန်မှုများ ရှိနေသော်လည်း ၎င်းတို့ကို ဖိတ်ကြားခြင်း မပြုသောကြောင့် မတက်ရောက်ခြင်း ဖြစ်မည်ဟုလည်း သတင်းများက ဖော်ပြနေကြသည်။
အယာတိုလာဈာပနသို့ အီရန်ခေါင်းဆောင်များ ဖြစ်သော လက်ရှိသမ္မတ ပီဇက်ခီယန်၊ နိုင်ငံခြားရေးဝန်ကြီး အာရက်ဂ်ချီ၊ လွှတ်တော် ပြောရေးဆိုခွင့်ရှိသူ ဂါလီဘက်ဖ်၊ တရားရေးချုပ် မိုစီနီအီဂျေး၊ ကတ်ဒ်တပ်ချုပ် ကန်နီတို့ တက်ရောက်လာသည်ကိုလည်း မြင်တွေ့ရသည်။
လက်ရှိ အယာတိုလာနေရာ ဆက်ခံသော သားဖြစ်သူ မော့ဂျ်တဘာ တက်ရောက်လာသည်ကို မမြင်တွေ့ရသော်လည်း ၎င်း၏ ညီအစ်ကိုများဖြစ်သော မူစတာဖာ၊ မာဆွတ်၊ မိုင်ဆန်ခါမီနီတို့ တက်ရောက်လာသည်ကိုလည်း တွေ့ရသည်။
အီရန် အစိုးရပိုင်မီဒီယာက နိုင်ငံသမိုင်း၏ အကြီးမားဆုံး အယာတိုလာခါမီနီဈာပနသို့ တက်ရောက်သူပေါင်း သန်း ၂၀ ရှိမည်ဟု ခန့်မှန်းထားကြောင်းလည်း ထုတ်ပြန်ထားသည်။
ကိုကလင်း
Ref:Khaosod
#MeKongNews
#အီရန်သမ္မတဟောင်း
#အမာဒီနီဂျက်
#အယာတိုလာခါမေနီ
#ဈာပန
