မဲခေါင်၊ မေ ၁၃
အရှေ့အလယ်ပိုင်းစစ်ပွဲအတွင်း ၎င်းတို့နိုင်ငံတွင်ဖြစ်ပေါ်ခဲ့သော တိုက်ခိုက်မှုများကို လက်တုံ့ပြန်၍ ဆော်ဒီက အီရန်အပေါ် လူမသိသူမသိ တိုက်ခိုက်မှုအများအပြား လုပ်ဆောင်ခဲ့ကြောင်း ယင်းကိစ္စနှင့်ပတ်သက်၍ အစီရင်ခံမှု ရရှိခဲ့သော အနောက်တိုင်းအရာရှိကြီး ၂ ဦး နှင့် အီရန်အရာရှိကြီး ၂ ဦးတို့က ပြောကြားသည်။
ယခင်က သတင်းပို့ခဲ့ခြင်း မရှိသော ဆော်ဒီ၏ တိုက်ခိုက်မှုများသည် ဆော်ဒီက အီရန်မြေပေါ်သို့ တိုက်ရိုက် စစ်ရေးတိုက်ခိုက်မှု ပထမဆုံးအကြိမ်လုပ်ခဲ့ခြင်း အမှတ်အသား ဖြစ်ရုံသာမက ဒေသတွင်းမှ အဓိကပြိုင်ဘက်ထံ မိမိကိုယ်ကိုယ်ကာကွယ်ရာတွင် ပို၍ ရဲရင့်လာခြင်းကို ပြသနေသည်ဟု ရိုက်တာသတင်းက ဖော်ပြသည်။
ဆော်ဒီလေတပ်က လုပ်ဆောင်ခဲ့သော တိုက်ခိုက်မှုများကို မတ်လနှောင်းပိုင်းက လုပ်ခဲ့သည်ဟု အကဲဖြတ်ထားကြောင်း အနောက်တိုင်းအရာရှိကြီး ၂ ဦးက ပြောသည်။
သို့သော် ၎င်းတိုက်ခိုက်မှုများမှာ ဆော်ဒီအား ထိမှန်ခဲ့ခြင်းများကို လက်တုံ့ပြန်ခြင်းသာဖြစ်ကြောင်း အရာရှိကြီးတစ်ဦးက ပြောသည်။
မည်သည့်နေရာများကို ဆော်ဒီက ပစ်မှတ်ထားခဲ့သည်ကို ရိုက်တာသတင်းက အတည်မပြုနိုင်ဟု ဆိုသည်။
တိုက်ခိုက်မှုများ လုပ်ဆောင်ခဲ့သည်လား ဆိုခြင်းကို ဆော်ဒီ နိုင်ငံခြားရေးဝန်ကြီးဌာန အထက်တန်းအရာရှိကြီးတစ်ဦးက တိုက်ရိုက်ဖြေကြားခဲ့ခြင်း မရှိခဲ့ဟု ရိုက်တာသတင်းက ဖော်ပြပြီး အီရန်နိုင်ငံခြားရေးဝန်ကြီးဌာနကလည်း မှတ်ချက်ပေးရန် တောင်းဆိုမှုကို မတုံ့ပြန်ခဲ့ဟု ဆိုသည်။
အမေရိကန်နှင့် အစ္စရေးတို့၏ တိုက်ခိုက်မှုများ စတင်ခဲ့ပြီးနောက်တွင် အီရန်က ပင်လယ်ကွေ့ ပူးပေါင်းဆောင်ရွက်ရေးကောင်စီ အဖွဲ့ဝင် ၆ နိုင်ငံစလုံးကို တိုက်ခိုက်ခဲ့ရာတွင် အမေရိကန်စစ်စခန်းများသာမက အရပ်ဘက်နေရာများ၊ လေဆိပ်များ၊ ရေနံလုပ်ငန်း နေရာများကိုပါ တိုက်ခိုက်ခဲ့ပြီး ကမ္ဘာသို့ ရေနံနှင့် ဓာတ်ငွေ့များ အဓိကပေးပို့ရာ ဟောမုဇ်ရေလက်ကြားကို ပိတ်ဆို့ခဲ့ကာ ကမ္ဘာ့ကုန်သွယ်ရေးကို ကမောက်ကမ ဖြစ်စေခဲ့သည်။
ယူအေအီးကလည်း ဧပြီလအစောပိုင်းတွင် အီရန်ကို တိုက်ခိုက်ခဲ့ကြောင်း ဝေါလ်စထရိဂျာနယ်က ဖော်ပြခဲ့ရာ စစ်ပွဲတွင် ယူအေအီး ပါဝင်ခဲ့သည်ကို ပထမဆုံးအကြိမ် သိရှိလာခဲ့ကြသည်။
သီတင်း ၅ ပတ်ကြာ လေကြောင်းမှ တိုက်ခိုက်ပြီးချိန် အပစ်အခတ် ရပ်စဲတော့မည်ဟု သမ္မတထရမ့်က ကြေညာချိန်လောက်တွင် အီရန်၏ လာဗန်ကျွန်းပေါ်မှ ရေနံချက်စက်ရုံအပေါ် ယူအေအီး၏ တိုက်ခိုက်မှု ဖြစ်ပေါ်ခဲ့ကာ အမေရိကန်က အသံတိတ်ကြိုဆိုခဲ့ကြောင်း ဂျာနယ်က ဆက်လက် ဖော်ပြခဲ့သည်။
အေးကျော်
Ref:Agencies
#MeKongNews
#အီရန်
#ဆော်ဒီ
#ယူအေအီး
#လျှို့ဝှက်
#တိုက်ခိုက်
