မဲခေါင်၊ မတ် ၂၉
မတ် ၂၇ ရက်က ဩစတြေးလျနိုင်ငံ ငါးမန်းပင်လယ်အော်ဒေသသို့ အပူပိုင်းမုန်တိုင်း နာရယ်လီဆိုင်ကလုန်း မတိုက်မီ မီနစ်အတော်ကြာ မြင်သမျှ ကောင်းကင်မြင်ကွင်းအားလုံး သွေးနီရောင် လွှမ်းသွားသည့် ထူးခြားဖြစ်စဉ် ဖြစ်ပွားခဲ့သည်။
၂၀၀၉ ခုနှစ်က အလားတူဖြစ်စဉ်မျိုး ဖြစ်ပွားစဉ် မုန်တိုင်းလေပြင်းသည် ဖုန်မှုန့်များစွာကို ကီလိုမီတာ ထောင်ချီ သယ်ဆောင်သွားပြီး ဆစ်ဒနီမြို့ကြီးတစ်မြို့လုံး ကောင်းကင်နှင့် လေထုသည် လိမ္မော်ရောင် ပြောင်းသွားဖူးသော်လည်း ယခုလို သွေးနီရောင် လေထုကြီးဖြစ်ကာ မြင်နိုင်စွမ်း သုညဒီဂရီနီးပါ မှုန်ဝါးပြီး လေထုသိပ်သည်းမှုလည်း အလွန်ထူထပ်သဖြင့် အသက်ရှူမရသည်အထိ ဖြစ်ခဲ့မှုမျိုး မကြုံဖူးဟု ဒေသခံများက ဖွင့်ဟပြောဆိုခဲ့သည်။
ဩစတြေးလျ အနောက်ပိုင်းဒေသသို့ နာရယ်လီဆိုင်ကလုန်းသည် တစ်နာရီလေတိုက်နှုန်း ၁၂၄ မိုင်နှုန်း အထိပြင်းထန်စွာတိုက်ခတ်ပြီးနောက် အဆောက် အအုံများစွာ ပျက်စီးခြင်း၊ ဓာတ်ငွေ့ပိုက်လိုင်း ပို့လွှတ်မှုများ ပျက်စီးခြင်း၊ စိုက်ပျိုးပင်များ ပျက်စီးခြင်းများရှိခဲ့ပြီး ကူညီကယ်ဆယ်ရေးလုပ်ငန်းများ ကို နောက်ရက်များအထိ လိုက်လံဆောင်ရွက်နေရသည်။
မုန်တိုင်းမဝင်မီ မိနစ်အတော်ကြာ ကောင်းကင်နှင့်လေထု တစ်ခုလုံး သွေးနီရောင်ပြောင်းသွားမှုနှင့် ပတ်သက်ပြီး မုန်တိုင်းလေပြင်းများသည် သံအောက်ဆိုဒ်ဓာတ်များစွာပါသည့် မြေနီမှုန့်များကို သယ်ဆောင်လာသဖြင့် သွေးနီရောင်လွှမ်းကာ လေထု သိပ် သည်းပြီး အသက်ရှူမ၀ ဖြစ်ရခြင်းသာ ဖြစ်သည်ဟု သက်ဆိုင်ရာက ထုတ်ပြန်သော်လည်း ယခင်က ထိုမျှ နီရဲသည့် ပတ်ဝန်းကျင်ကို မမြင်ဖူးခဲ့ကြသော ဒေသခံများက ကမ္ဘာပျက်နေ့အလား ထင်မှတ်ကာ စိုးရိမ်ထိတ်လန့်ခဲ့ကြရသည်ဟု ဖွင့်ဟ ပြောဆိုခဲ့ကြသည်။
ယင်းနာရယ်လီမုန်တိုင်းသည် ခရီးသွားမြို့တော် အိတ်စ်မောက်တွင် အဆိုးရွားဆုံး တိုက်ခတ်ပြီး မုန် တိုင်းဖြတ်သန်းရာ ကာရိုးပင်လယ်အော်၊ ငါးမန်းပင်လယ်အော်၊ ဂီရယ်လ်တန်မြို့၊ ကာနာဗွန်မြို့များတွင် ပျက်စီးမှုများခဲ့ကာ ကယ်ဆယ်ရေးလုပ်ငန်းများ ဆက်လက်လုပ်ဆောင်နေသည်။
ကိုကလင်း
Ref:Thesun
#MeKongNews
#နာရယ်လီဆိုင်ကလုန်း
#ဩစတြေးလျကောင်းကင်
#သွေးနီရောင်လွှမ်း
