မဲခေါင်၊ မတ် ၇

မတ် ၆ ရက်နေ့တွင် အစ္စရေးဖိုက်တာဂျက်လေယာဉ် အစီး ၅၀ ဖြင့် သေဆုံးခဲ့ပြီးဖြစ်သော အီရန် ခေါင်းဆောင် ခါမီနီ တည်ဆောက်ထားသည့် တီဟီရန်မြို့တော်အောက်မှ မြေအောက်စစ်ရေးဗဟို ဘန်ကာကြီးကို တိုက်ခိုက်ဖျက်ဆီးလိုက်ပြီဖြစ်သည်။

တီဟီရန်မြို့ လမ်းနေရာများစွာအား ထွက်ပေါက်များအဖြစ် ချိတ်ဆက်ကာ ကျယ်ဝန်းစွာ တည်ဆောက်ထားသော မြေအောက်ဘန်ကာကြီး၏ အသေးစိတ်တည်နေရာကို Graphic ပုံရိပ်များဖြင့် အစ္စရေးထောက်လှမ်းရေးမော့ဆက်အဖွဲ့က ထုတ်ဖော်ပြသခဲ့သည်။

ခါမီနီကိုယ်တိုင်မှာမူ ထိုမြေအောက်ဘန်ကာကြီးအား အသုံးမချလိုက်နိုင်မီမှာပင် အီရန်သည့် လွန်ခဲ့သည့်တစ်ပတ်က စတင်တိုက်ခိုက်သည့် စက္ကန့် ၃၀ အတွင်း အခြားစစ်ခေါင်းဆောင် ၅၀ နီးပါးနှင့်အတူ သေဆုံးခဲ့ရပြီးဖြစ်ကြောင်း၊ သို့သော် ကျန်ရှိ အီရန် တော်လှန်ရေးအစောင့်တပ် အကြီးအကဲများသည် စစ်ရေးအမိန့်များကို ယင်းမြေအောက်ဘန်ကာအား အသုံးပြုပြီး ဆက်လက်ညွှန်ကြားနေသဖြင့် အစဖျောက် ပစ်ခတ်ဖျက်ဆီးလိုက်ခြင်းဖြစ်သည်ဟု အစ္စရေးထောက်လှမ်းရေးမော့ဆက်အဖွဲ့က ထုတ်ပြန်သွားခဲ့သည်။

လူမှုကွန်ရက် X ပေါ်တွင် မော့ဆက်က ထိုမြေအောက်ဘန်ကာသည် အီရန်စစ်တပ်၏ လုံခြုံရေး အရေးပေါ်ကွပ်ကဲမှုဌာနချုပ်လည်းဖြစ်ကာ အီရန်အကြမ်းဖက်တပ်သည် ထိုဘန်ကာမှတစ်ဆင့် တီဟီရန်မြို့ လမ်းများစွာနှင့် ချိတ်ဆက်ဖောက်လုပ်ထားသော ဝင်ပေါက်၊ ထွက်ပေါက်များကို အသုံးပြု တည်ဆောက်ထားခြင်းဖြစ်ကြောင်း၊ ခါမီနီ ထိုဘန်ကာအား အသုံးမပြုနိုင်သေးမီမှာပင် အီရန်သို့ ပထမဆုံးတိုက်ခိုက်သည့် စက္ကန့် ၃၀ အတွင်း ရှင်းလင်းလိုက်ခြင်းဖြစ်သည်ဟု ထုတ်ပြန်သွားသည်။

လက်ကျန်အီရန်စစ်ခေါင်းဆောင်များ လက်နက်ချအဖမ်းမခံပါက သေဆုံးခြင်းသာရှိမည်ဟု ဒေါ်နယ်ထရမ့်နှင့် အမေရိကန်ကာကွယ်ရေးဝန်ကြီး ပိ(တ်)ဟက်ဂ်ဆက်တို့က သတိပေးချက် ထပ်မံ ထုတ်ပြန်ကာ အမေရိကန်ဗဟိုစစ်ရေးကွပ်ကဲမှုဌာနက မတ် ၆ ရက်မှာပင် အီရန်၏ ဒုတိယကမ္ဘာစစ် အတွင်းမှ လေယာဉ်တင်သင်္ဘောအရွယ်အစားရှိသော စစ်သင်္ဘောကြီးကို တိုက်ခိုက်ဖောက်ခွဲလိုက်သည့် နောက်ဆုံး တိုက်ခိုက်မှု ရုပ်သံကိုပါ ထုတ်ပြန်လိုက်သည်။

နောက်ရက်များတွင် ပိုမိုပြင်းထန်သော တိုက်ခိုက်မှုများ ဆက်လက်ဦးမည်ဟု သတိပေးချက် ထုတ်ပြန်သွားခဲ့သည်။

အီရန် ရေတပ်တစ်ခုလုံးမှ စစ်သင်္ဘောအစီး ၃၀ ကျော်ကို အမေရိကန်နှင့် အစ္စရေးတို့ ပူးပေါင်းတိုက်ခိုက်ဖျက်ဆီးခဲ့ပြီးနောက်ဆုံး ဖျက်ဆီးလိုက်သည့် သင်္ဘောမှာ ၂၀၂၅ ခုနှစ်ဖေဖော်ဝါရီလကမှ အီရန်တော်လှန်ရေးအစောင့်တပ်က စတင်ထုတ်ဖော်ပြသပြီး တပ်တော်ဝင်စေခဲ့သည့် Shahid Beheshti သင်္ဘောကြီးဖြစ်သည်။

အီရန်ကလည်း မတ် ၆ ရက်တွင် အစ္စရေးနိုင်ငံသို့ ကလပ်စတားထိပ်ဖူးများ ကြဲချသည့် ထိပ်ဖူးပါ ဒုံးကျည် များဖြင့် ပစ်ခတ်ခဲ့ကာ တဲလ်အဗစ်မြို့ပေါ် ကလက်စတာဗုံးများ ကျရောက်ပေါက်ကွဲခဲ့သေးသည်။

အစ္စရေးသည် ထိုပစ်ခတ်မှုအား အီရန်လက်ဝေခံ ဟစ်ဇ်ဘိုလာတပ်များက ကျူးလွန်သည်ဟုဆိုကာ လက်ဘနွန်နိုင်ငံ မြို့တော်ဘေရွတ်ခ်တောင်ပိုင်း ဒေသများသို့ လေကြောင်းတိုက်ခိုက်မှုများလည်း ဆက် လက်လုပ်ဆောင်နေခဲ့သည်။

အီရန်ဘက်က မတ် ၆ ရက်ညတွင် ဘာရိန်းနိုင်ငံရှိ အကြီးများဆုံး ရေနံချက် စက်ရုံကြီးကို ပစ်ခတ်ဖောက်ခွဲတိုက်ခိုက်ခဲ့ပြန်သဖြင့် ကမ္ဘာလုံးဆိုင်ရာ ရေနံနှင့်စက်သုံးဆီ စျေးနှုန်းများ လွန်စွာကမောက်ကမဖြစ်ပြီး စျေးများထပ်မံ မြင့်တက်ခဲ့ပြန်သည်။

ကိုကလင်း
Ref:Thesun
#MeKongNews
#အီရန်
#အစ္စရေး
#မြေအောက်ဘန်ကာ
#တိုက်လေယာဉ်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)