မဲခေါင်၊ ဇန်နဝါရီ ၁၉
အီရန်တွင် နိုင်ငံအနှံ့ သန်းပေါင်းများစွာသောပြည်သူများ ခါမီနီ၏ အစ္စလာမ္မစ်အစိုးရ ပြုတ်ကျစေရန် ဆန္ဒပြမှုများ နှစ်ပတ်ကျော်လာချိန် သေဆုံးသူထောင်သောင်းချီရှိလာသလို ပျောက်ဆုံးသွားသည့် ဆရာဝန်များစွာလည်း ရှိလာခဲ့ပြီဖြစ်သည်။
ခိုင်လုံသော သတင်းများအရ ဆန္ဒပြပွဲ ၁၈ ရက်မြောက်၌ သေဆုံးပြည်သူပေါင်း ၂၆၀၀ ကျော်ရှိပြီဟု ဆိုသလို အတည်မပြုနိုင်သော သတင်းများတွင် သေဆုံးသူမှ ၁၂၀၀ မှ ၂၀၀၀၀ အထိ ရှိသည်ဟု ဖော်ပြနေကြသည်။
ခါမီနီသည် ၎င်း၏ အာဏာမပြုတ်ကျရေး လမ်းပေါ်ထွက်သမျှ ပြည်သူတိုင်းအား တင့်ကားများအတွင်း စက်သေနတ်ကိုင် စစ်သား ၁၀ ယောက်ဝန်းကျင်ထည့်ကာ နေရာတိုင်းလမ်းပေါ်ထွက်သမျှ ပြည်သူများ ကို အသေပစ်သတ်ခိုင်းနေသဖြင့် ဆေးရုံးများပေါ်၌ လူနားများစွာဖြင့် ပြည့်ကျပ်နေခဲ့ပြီဖြစ်သည်။
ထိုအခြေအနေတွင် သေနတ်ကျည်မှန် ဒဏ်ရာရသူများ ဆေးရုံရောက်ပါက ယင်းလူနာသတင်းအချက် အလက်များပေးပို့ရမည်ဟု အီရန်တော်လှန်ရေးအစောင့်တပ်က အမိန့်ပေးထားပြီး ဆရာဝန်များကမူ ဆရာဝန်ကျင့်ဝတ်နှင့်အညီ သူရဲကောင်းဆန်စွာ လူနာများသတင်းကို မပေးသည့်အတွက် ဆရာဝန် များစွာ ဖမ်းဆီးခံရပြီး ပျောက်ဆုံးမှုမှာ တစ်နေ့တခြား များသထက်များလာခဲ့သည်။
ဆရာဝန်များသည် လမ်းများပေါ်အထိ ထွက်ပြီး ဒဏ်ရာရသူများကို ပြုစုကုသနေကြသည့်အတွက်လည်း ဆရာဝန်များစွာ ဖမ်းဆီးခံရခြင်းဖြစ်သည်။
ပျောက်ဆုံးနေသော ထိပ်တန်းဆရာဝန်များထဲ ကူးစက်ရောဂါအထူးကုဆရာဝန်ကြီး ဒေါက်တာ ဘာဘက်ခ်ဇာရာဘီယန်လည်း ပါဝင်ကာ ဇန်နဝါရီ ၁၃ ရက်က ဖမ်းခံရပြီးကတည်းက ပျောက်ဆုံးနေခဲ့ခြင်းဖြစ်သည်။
သွားဆရာဝန်ကြီး ဖာရီဘာဟိုဆီနီ၊ ကလေးအထူးကုဆရာဝန်ကြီး မိုဟက်ဘတ်ဂါဖိုရီ၊ အထွေထွေရောဂါကုဆရာဝန် အက်စ်ဂါရှာကီရီတို့သည်လည်း ပျောက်ဆုံးနေသည့် ဆရာဝန်များထဲ ပါဝင်သလို ဖမ်းဆီးခံဆရာဝန်များ၏ မိသားစုများလည်း ကြောက်ရွံ့ကာ တိမ်းရှောင်နေကြရသည်။
ဆန္ဒပြသူများကို ကူညီကုသပေးမှုမလုပ်ရန် အီရန်တော်လှန်ရေးအစောင့်တပ်က ဆရာဝန်များစွာထံ ဖုန်းဆက်ကာ ခြိမ်းခြောက်နေသလို ဆင့်ခေါ် သတိပေးခြင်း၊ တစ်ခါတည်း ဖမ်းဆီးသွားခြင်းများလည်း များစွာရှိနေခဲ့ပြီဟု မီလက်ဒ်ဆေးရုံမှ ဆရာဝန်တစ်ဦးက ဖွင့်ဟပြောဆိုသည်။
အမေရိကန် သမ္မတဒေါ်နယ်ထရမ့်သည် ဆန္ဒပြသူများကို ဖမ်းဆီးကာ အကြောက်တရားရိုက်သွင်းရန် ကြိုးပေးကွပ်မျက်မှုများလုပ်ဆောင်မည်ဟု အီရန်ဘက်က ခြိမ်းခြောက်ကြေညာပြီးနောက် စစ်ရေး တိုက်ခိုက်မှုလုပ်ရန် အမိန့်ပေးပြီးမှ အီရန် နိုင်ငံခြားရေးဝန်ကြီးက တစ်ဦးမျှ ကြိုးပေးကွပ်မျက်ခြင်းမရှိ ဟု ပြန်လည် ထုတ်ပြန်သဖြင့် တိုက်ခိုက်မှု အမိန့်ကို ရုပ်သိမ်းခဲ့သည်။
သို့သော် USS Abraham Lincoln လေယာဉ်တင်သင်္ဘောကြီးကို တောင်တရုတ်ပင်လယ်မှ အီရန်နှင့်အနီးဆုံးရှိ ပင်လယ်ကွေ့ သို့ မောင်းနှင်ခိုင်းခဲ့ပြီး အနီးကပ်အနေအထား အသင့်ပြင်ထားပြီးဖြစ်ကြောင်း သိရသည်။
ကိုကလင်း
Ref: Thesun
#MeKongNews
#အီရန်
#ဆန္ဒပြပွဲ
#ဆရာဝန်
#ဒဏ်ရာရ
#အလီခါမီနီ
