မဲခေါင်၊ ဇန်နဝါရီ ၁၀
ယူကရိန်းနိုင်ငံ၊ မိုင်ကိုလိဗ်မြို့တွင် အမျိုးသမီးတစ်ဦးက ရင်သွေးလေး မွေးဖွားပြီး နောက်တစ်ရက်မှာပင် ထိုကလေးအား ဒေါ်လာတစ်သောင်းဖြင့် ရောင်းစားလိုက်မှုအား ရဲတပ်ဖွဲ့နှင့် ထောက်လှမ်းရေးများက လက်ပူးလက်ကြပ် ဖမ်းဆီးခဲ့သည်။
ဇန်နဝါရီ ၂ ရက်တွင် ယင်းကိစ္စ ဖြစ်ပွားခဲ့ခြင်း ဖြစ်ကာ ၂၁ နှစ်အရွယ်အမျိုးသမီးနှင့် ၃၅ နှစ်အရွယ် ချစ်သူ အမျိုးသားတို့သည် ကလေးမမွေးမီ သီတင်းပတ် အနည်းငယ် အလိုကတည်းက ထိုကလေးအား မွေးပြီးသည်နှင့် ရောင်းစားရန် ကြိုးစားခဲ့သည်ကို ရဲတပ်ဖွဲ့က သတင်းရရှိသဖြင့် ကလေးမွေးသည့် ဆေးရုံအနီး စောင့်ဆိုင်းနေရာ မွေးပြီး နောက်တစ်ရက်မှာပင် ကလေးငယ်အား လူတစ်ဦးထံ ဒေါ်လာ တစ်သောင်းဖြင့် သွားရောင်းသည်ကို စောင့်ဖမ်းခဲ့ခြင်း ဖြစ်သည်။
ယင်းစုံတွဲသည် ရင်သွေးအရင်းအား ရောင်းစားရငွေများကို ၎င်းတို့ ပုဂ္ဂိုလ်ရေး လိုအပ်ချက်များ အတွက် အသုံးချရန် ရည်ရွယ်ချက်ဖြင့် ရောင်းစားခဲ့ခြင်း ဖြစ်ကာ လက်ပူးလက်ကြပ် ဖမ်းဆီးရမိပြီးနောက် ဒေါ် လာ တစ်သောင်းတန် ငွေများကိုပါ ရေတွက် စစ်ဆေးပြီး တရားစွဲဆိုလိုက်ခြင်း ဖြစ်သည်။
ရင်သွေးလေးကိုမူ အစိုးရ အစောင့်အရှောက်ခံ အဖြစ် ခေါ်ဆောင်ထားကြောင်း သိရသည်။
ယူကရိန်း ဥပဒေတွင် ကလေးငယ်များအား ရောင်းစားခြင်းကို လူမှောင်ခိုကူးခြင်းနှင့် တန်းတူ ဥပဒေအကာအကွယ် ပေးထားပြီး ထိုစုံတွဲသည် ထောင်ဒဏ် နှစ်ရှည် ချမှတ်ခံရမည် ဖြစ်သည်။
ကိုကလင်း
Ref:Thesun
#ကလေးမွေး
#ရောင်းစား
#ယူကရိန်းစုံတွဲ
#မိုင်ကိုလိဗ်
