မဲခေါင်၊ အောက်တိုဘာ ၂၄
ပြီးခဲ့သည့် သီတင်းပတ်ကုန်က ပြင်သစ်နိုင်ငံ ပဲရစ်မြို့ရှိ ကမ္ဘာ့အကျော်ကြားဆုံးနှင့် လည်ပတ်သူ အများဆုံးသော လုဗ်ရ်ပြတိုက်ကြီးမှ နပိုလီယံ၏ ကြင်ယာတော်အားပေးခဲ့သည့် စိန်နှင့်မြလည်ဆွဲအပါ ပြင်သစ်နန်းစဉ် ရတနာ ၈ သွယ်ကို ပြတိုက်ဖွင့်အပြီး မကြာခင် နေခင်းကြောင်တောင် ဖောက်ထွင်းခိုးယူ မှုမှာ ကမ္ဘာကျော် Pink Panther သူခိုးဂိုဏ်းနောက်ကွယ်မှ ပါဝင်မည်မှာ သေချာသည်ဟု ဗြိတိန်ထောက်လှမ်းရေးအဖွဲ့ Flying Squad ခေါင်းဆောင်ဟောင်း ဘယ်ရီဖိလစ်က သုံးသပ်သွားခဲ့ သည်။
ပြတိုက်ဖွင့်ပြီးမကြာမီ နံနက် ၁၀ နာရီ့ ဝန်းကျင်တွင် ၇ မိနစ်အတွင်း ပြတိုက်ထဲဝင်ကာ နန်းစဉ် ရတနာ ၈ သွယ်အား ခိုးယူကာ စကူဒါဆိုင်ကယ်ဖြင့် ထွက်ပြေးသွားသူ ၄ ယောက်ကို ယခုအထိ ပြင်သစ်ရဲနှင့် ထောက်လှမ်းရေးများ ခြေချင်းလိမ်ကာ ရှာဖွေနေသော်လည်း မတွေ့ရှိသေးဘဲ အနည်းဆုံးပေါင်သန်း ၅၀၀ တန်သော ထိုရတနာပစ္စည်းများကို မှောင်ခိုစျေးကွက်မှ ရောင်းချလိုက်ခြင်း၊ ပုံဖျက်လိုက်ခြင်းများ ပြုလုပ်ခဲ့လျှင် ပြန်ရရန် မလွယ်သည့် အနေအထားသို့ ရောက်နေရသည်။
ထိုအခြေအနေသည် ဆယ်စုနှစ်အတွင်း ပြောစမှတ်အတွင်ဆုံး ဖောက်ထွင်းခိုးယူမှုမျိုးဖြစ်ကာ ယခင် ထိုသို့သော ပြောစမှတ်တွင်သည့် ခိုးယူမှုများအား လုပ်ဆောင်နေကြ ကမ္ဘာကျော် Pink Panther သူခိုးဂိုဏ်းနောက်ကွယ်မှ ပါဝင်နေမည်ဟု ဘယ်ရီဖိလစ်က သုံးသပ်ပြောဆိုခဲ့သည်။
ဖောက်ထွင်သွားပုံ များသည် ယခင် Pink Panther ဂိုဏ်းမှ ဖောက်ထွင်းခဲ့သည့် သမိုင်ဝင်ခိုးယူမှုများနှင့် ပုံသဏ္ဍန်ဆင်တူနေ ပြီး အဆိုပါ သူခိုးဂိုဏ်းသည် စစ်သားဟောင်းများ၊ အထူးလေ့ကျင့်ပေးထားသည့် အရန်တပ်သား ဟောင်းများ၊ ခိုးမှု၊ ကားမောင်းမှု၊ လှည့်စားမှုအားလုံးကို တစ်ဖက်ကမ်းခတ် ကျွမ်းကျင်သည့် သူခိုးများ လုပ်ရပ်မျိုးဟု ဘယ်ရီဖိလစ်က ဆိုသည်။
Pink Panther သူခိုးဂိုဏ်းသည် ကမ္ဘာကျော်ခဲ့သော သူခိုးရုပ်ရှင် Pink Panther ဇာတ်ကားကို အတုယူ ကာ ဂိုဏ်းနာမည်အားပေးခဲ့ခြင်းဖြစ်ပြီး ၎င်းတို့သည် ဆယ်စုနှစ်၏ ပြောစမှတ်အတွင်းဆုံး ပြောင်မြောက်လှသော ခိုးယူမှုများကိုသာ လုပ်ဆောင်သည့် ဂိုဏ်းဖြစ်သည်။
ခိုးယူမှုများတွင် ပြောင်ပြောင်တင်းတင်းနိုင်လျင်သော်မှ သဲလွန်စမကျန် ပြန်ရှာမတွေ့နိုင်တော့သည့် ခိုးယူမှုများကိုသာ ယင်းဂိုဏ်းက လုပ်ဆောင်လေ့ရှိပြီး ကမ္ဘာတစ်ဝန်း အဖွဲ့ဝင်စပါယ်ရှယ်လစ် သူခိုးပေါင်း ၈၀၀ ကျော်ဖြင့် ဖွဲ့စည်းထားသည်ဟု သိရသည်။
၎င်း ဂိုဏ်းသည် ၂၀၀၃ ခုနှစ်က လန်ဒန်ရှိ Graff ကျောက်မျက်ရတနာ ဆိုင်မှ ပေါင် ၂၃,၀၀၀,၀၀၀ တန်ကြေးရှိ စိန်များ ခိုးသွားခဲ့သလို ဒူဘိုင်း၊ တိုကျိုး၊ မီယာမီတို့တွင်ပါ Ocean’s 11 ဇာတ်ကားဟန်ဖြင့် ပြောင်မြောက်ဆုံးသော ခိုးယူမှုများ ကျူးလွန်ခဲ့သည့် ဂိုဏ်းဖြစ်သည်။
ထိုသို့သော သူခိုးစပါယ်ရှယ်လစ်များကသာ ကမ္ဘာ့အကျော်ကြားဆုံး လုဗ်ဝါရ်ပြတိုက်အား နေခင်း ကြောင်တောင် ဝင်ခိုးရဲမည်ဟု ဘယ်ရီဖိလစ်က သုံးသပ်ခဲ့သည်။
လက်ရှိတွင် မနှစ်ကတည်းက ပြင်သစ် အစိုးရက ဖမ်းဆီးထိန်းသိမ်းထားသော ရုရှားပြည်ပြေး တယ်လီဂရမ် လူမှုကွန်ရက် ထူထောင်သူ ဘီလျံနာ ပေဗယ်ဒူရော့ဗ်က ပြင်သစ်တွင် လုံခြုံရေးစိတ်မချရသဖြင့် လုဗ်ဝါရ် ပြတိုက်မှ ခိုးခံရသည့် နန်းစဉ်ရတနာများကို မိမိပြန်ဝယ်ယူပြီး ဒူဘိုင်းရှိ လုဗ်ရ်ပြတိုက်တွင်း ထားလိုသည်ဟု ပြောဆို ကမ်းလှမ်းလာကြောင်းလည်း သိရသည်။
ရုရှားအီလွန်မာ့စ်၊ ဇူကာဘတ်ဟု ခေါ်သည့် ဒူရော့ဗ်သည် ပေါင် ၁၇ ဘီလီယံ ကြွယ်၀သူဖြစ်သည်။
ကိုကလင်း
Ref: Thesun
#MeKongNews
#ပဲရစ်
#သူခိုးဂိုဏ်း
#PinkPanther
#နန်းစဉ်ရတနာ
