မဲခေါင်၊ ဇန်နဝါရီ ၃၁

မြန်မာ့ အကျပ်အတည်းပြဿနာကို အာဆီယံဥက္ကဋ္ဌ လုပ်ရတဲ့ တစ်နှစ်အတွင်း ဖြေရှင်းပေးသွားနိုင်ဖို့ မဖြစ်နိုင်ကြောင်း အင်ဒိုနီးရှား နိုင်ငံခြားရေးဝန်ကြီး ရတ်နိုမာဆူဒီ က လွှတ်တော်မှာ ပြောကြားသွားခဲ့ပါတယ်။

ဆက်လက်ပြီး မင်းအောင်လှိုင်ဟာ လက်ရှိအာဆီယံကျင့်သုံးနေတဲ့ ဖိအားပေး၊ ကြေညာချက်ထုတ် လော်စပီကာဒီပလိုမေစီ (Megaphone Diplomacy) လောက်နဲ့ အာဏာစွန့်လွှတ်မှာ မဟုတ်ကြောင်းလည်း ပြောကြားခဲ့ပါတယ်။

အာဆီယံက မြန်မာနိုင်ငံမှာ အကြမ်းဖက်မှုတွေရပ်တန့်ပြီး ငြိမ်းချမ်းစွာ ဒီမိုကရေစီအသွင်ပြောင်းနိုင်ဖို့ ဘုံသဘောတူညီချက် ၅ ရပ်ကို ထုတ်ပြန်ပေးထားပြီးဖြစ်ပေမယ့် မင်းအောင်လှိုင်ဘက်က တစ်ခုမှ အကောင်အထည်မဖော်တဲ့အပြင် ပြည်သူကိုပစ်မှတ်ထားတဲ့ အကြမ်းဖက်မှုတွေကို တစ်နိုင်ငံလုံးအတိုင်းအတာနဲ့ တိုးပြီး လုပ်ဆောင်နေတယ်လို့လည်း ဆိုပါတယ်။

အင်ဒိုနီးရှား နိုင်ငံခြားရေးဝန်ကြီး ရတ်နိုမာဆူဒီက “မြန်မာ့သမိုင်းကြောင်းကို ကျွန်မတို့သိတယ်။ ဒါကြောင့် ဒီနှစ်ထဲမှာပဲ အားလုံး ဖြေရှင်း ပြီးစီးသွားမယ်လို့ မျှော်လင့်တာ လုံး၀မဖြစ်နိုင်ပါဘူး” လို့ လွှတ်တော်ကိုယ်စားလှယ်တွေကို ပြောကြားခဲ့တာဖြစ်ပါတယ်။

အင်ဒိုနီးရှားနိုင်ငံက အာဆီယံဥက္ကဋ္ဌအဖြစ် တာဝန်ယူတဲ့ ပထမဆုံး အစည်းအဝေးကို ဂျာကာတာမှာ ဖေဖော်ဝါရီ ၃ ရက်နဲ့ ၄ ရက် နေ့တွေမှာ ကျင်းပရမှာဖြစ်ပြီး ဒီအစည်းအဝေးမှာ တင်ပြမယ့်အစီအစဉ်တွေ၊ ဦးစားပေးကိစ္စရပ်တွေကို ရှင်းပြရမှာမို့ အင်ဒိုနီးရှားလွှတ်တော်အမတ်တွေကို မြန်မာ့အရေးအကြောင်း အခုလို ဦးစွာတင်သွင်းပြောကြားခဲ့တာ ဖြစ်ပါတယ်။

မြန်မာနိုင်ငံမှာ အကြမ်းဖက်မှုတွေကိုရပ်တန့်ဖို့၊ လူသားချင်းစာနာမှုဆိုင်ရာ အထောက်အပံ့တွေကို ပေးပို့နိုင်ဖို့ကလည်း ငြိမ်းချမ်းရေး မရရင် မဖြစ်နိုင်ကြောင်း၊ ပါဝင်ပတ်သက်သူတိုင်းအတွက် လူးသာလွန့်သာ နေရာပေးဖို့လိုကြောင်း၊ ဒါကြောင့် အရင်သုံးနေခဲ့ကြတဲ့ လော်စပီကာဒီပလိုမေစီကို သူတို့အင်ဒိုနီးရှားလက်ထက်မှာ မသုံးဘဲ စေ့စပ်ဆွေးနွေးရေးလမ်းစဉ်ကို ကျင့်သုံးမယ်လို့ မာဆူဒီက ရှင်းလင်းပြောကြားခဲ့ပါတယ်။

MKF-001

#အာဆီယံအစည်းအ‌‌ဝေး #အင်ဒိုနီးရှား #မြန်မာ့အရေး

Ref: rfa

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)