ကနေ့ မနက် ၁၀ နာရီမှာ ပြုလုပ်တဲ့ အမျိုးသားညီညွတ်ရေးအစိုးရရဲ့ (၈၀) ကြိမ်မြောက် အစိုးရအဖွဲ့အစည်းအဝေးမှာ ယာယီသမ္မတ ဒူဝါလရှီးလက အခုလို ပြောကြားခဲ့တာပါ။
၂၀၂၃ ခုနှစ်ဟာ စစ်ကောင်စီရဲ့ ပင်မအရင်းကို တူးဖြိုပစ်ရမယ့် အချိန်ကို ရောက်ပြီလို့ ယုံကြည်ပါတယ်။ နွေဦးတော်လှန်ရေးမှာ တိုက်ပွဲတွေအောင်မြင်ဖို့ အရေးကြီးသလို တော်လှန်ရေးကြီး အောင်မြင်ဖို့လည်း လိုပါတယ်။ ခုခံ တော်လှန်စစ်ကို မဟာဗျူဟာကျကျ ဆင်နွှဲတဲ့ နေရာမှာ ခုခံရုံနဲ့ မရဘူး။ စစ်ကောင်စီ အရှိုက်ကို ကိုင်လှုပ်နိုင်မယ့် ထိုးစစ်မျိုးကိုလည်း လုပ်ဆောင်ရလိမ့်မယ်လို့ ယူဆပါတယ်။ ပိုမိုပီပြင်တဲ့ စစ်ရေးရလဒ် ထွက်ဖို့အတွက် စစ်ရေးအရ ထောက်ပို့ရေးနဲ့ ဘဏ္ဍာငွေ ရှာဖွေရေးတွေက အလွန်အရေးကြီးပါတယ်
လို့ ယာယီသမ္မတက ပြောလိုက်ပါတယ်။
ပြည်ထောင်စု ဝန်ကြီးချုပ်အနေနဲ့ အခုရက်အတွင်း မြေပြင်ရဲဘော်တွေနဲ့ သွားရောက်တွေ့ဆုံတာကို မြင်တွေ့ရတဲ့အတွက် အင်မတန် ပီတိ ဖြစ်မိပါတယ်လို့လည်း သူကဆိုပါတယ်။
တော်လှန်ရေးခေါင်းဆောင်တွေနဲ့ မြေပြင်မှာ အခုလို ထိတွေ့တာဟာ မိမိတို့အချင်းချင်းကြား ယုံကြည်မှုနဲ့ တော်လှန်ရေးအတွက် လက်တွဲခိုင်မာမှုကို ပိုမိုတိုးတက်စေပြီး ခွန်အားရခြင်းနဲ့အတူ ဂုဏ်ယူလေးစားတယ်လို့လည်း ယာယီသမ္မတက ဆိုပါတယ်။
ဒါ့အပြင် တောင်တန်းဒေသတွေရဲ့ စစ်ရေး စိုးမိုးနိုင်မှုနဲ့ ပြည်မဒေသ- အညာဒေသတွေရဲ့ ခုခံတော်လှန်မှုဟာ ထင်မှတ်မထားလောက်အောင် ကြံ့ကြံ့ခံနိုင်စွမ်း ရှိတယ်ဆိုတာ တွေ့ရပြီး ခုခံတော်လှန်နိုင်မှုဟာ သိပ်ပြီး အရင်းအနှီးကြီးတယ်ဆိုတာ မမေ့ဖို့လိုတယ်လို့ သူက ဆက်လက်ပြောကြားပါတယ်။
ပျက်စီးသွားတဲ့ စည်းစိမ်ဥစ္စာတွေဟာ ပြန်လည်ရှာဖွေလို့ ရတယ်ဆိုပေမယ့် လူထုက သွေးနဲ့ ချွေးနဲ့ ရင်းထားတဲ့ တစ်ပြား တစ်ကျပ်က အစ အင်မတန် တန်ဖိုးရှိပြီး အသက်ပေးသွားတဲ့ လူငယ် အာဇာနည် အရေအတွက်ဟာလည်း မနည်းတော့ဘူးဆိုတာနဲ့ တော်လှန်ရေးမှာ တိုက်ပွဲဝင်နေတဲ့ လူငယ်တွေကို ကိုယ့်ရဲ့ ရင်သွေးကဲ့သို့ တန်ဖိုးထားကြဖို့အတွက်လည်း သမ္မတ ဒူဝါလရှီးလက တိုက်တွန်းပါတယ်။
ဒီအစည်းအဝေးကို ယာယီသမ္မတ ဒူဝါလရှီးလ၊ ပြည်ထောင်စု ဝန်ကြီးချုပ် မန်းဝင်းခိုင်သန်း အပါအဝင် ပြည်ထောင်စု ဝန်ကြီးတွေ၊ ဒုဝန်ကြီးတွေ တက်ရောက်ခဲ့ကြပါတယ်။
