မဲခေါင်၊ ဇန်နဝါရီ ၁၇
ထားဝယ်ခရိုင်၊ လောင်းလုံးမြို့နယ်၊ သကျက်တောရွာ နယ်မြေရဲစခန်းကို မနေ့က ညပိုင်းမှာ နယ်မြေရှင်းလင်း မီးရှို့ခဲ့တယ်လို့ ပြည်သူ့ကာကွယ်ရေးတပ်ဖွဲ့-လောင်းလုံးမြို့နယ်က ဒီကနေ့ ထုတ်ပြန်ပါတယ်။
မနေ့က ည ၁၁ နာရီ ဝန်းကျင်မှာ အဲဒီ ရဲစခန်းကို လောင်းလုံး ပြည်သူ့ကာကွယ်ရေးဖွဲ့-LLPDF နဲ့ ထားဝယ် အထူးပြောက်ကျားအဖွဲ့တို့ ပူးပေါင်း မီးရှို့ခဲ့ရာ မနက်အစောပိုင်းမှာ မီးငြိမ်းခဲ့ပြီး ဒီကနေ့ မွန်းလွဲပိုင်းအထိ စစ်တပ်က လာရောက် စစ်ဆေးတာ မရှိဘူးလို့ ဆိုပါတယ်။
အဆိုပါ သကျက်တောရွာ ရဲစခန်းဟာ ပြည်သူ့ကာကွယ်ရေးတပ်ဖွဲ့တွေရဲ့ ၄ ကြိမ်ထက်မနည်း တိုက်ခိုက်ခံခဲ့ရ ပြီးနောက် စစ်ကောင်စီက စခန်းကို စွန့်ခွာခဲ့တာလို့ LLPDF က ထုတ်ပြန်ထားပါတယ်။
၂၀၂၂ ခုနှစ်၊ အောက်တိုဘာ ၃၁ ရက်နေ့က သကျက်တော ရဲစခန်းမှ ရဲကား တစ်စီးကို မိုင်းဆွဲ တိုက်ခိုက်ခဲ့တာ၊ မေလ ၁ ရက်မှာ ပြည်သူ့ကာကွယ်ရေးတပ်ဖွဲ့တွေ ပူးပေါင်းပြီး ရဲစခန်းကို ဝင်ရောက် စီးနင်း တိုက်ခိုက်ခဲ့တာတွေ ရှိခဲ့ပါတယ်။
အခုနှစ် ဇန်နဝါရီလ ၆ ရက်နေ့ ကလည်း အဲဒီ နယ်မြေရဲစခန်းမှ ထန်းရည်ဆိုင်သို့ သွားရောက်ပြီး ပြန်လာတဲ့ စစ်ကောင်စီတပ်သားနဲ့ ရဲတပ်သား တို့ကို လမ်းမှာ ကြားဖြတ်တိုက်ခိုက် ခဲ့တယ်လို့ သိရပါတယ်။
အဲဒီ ဖြစ်ပွားခဲ့ပြီး တစ်ပတ်ခန့်အကြာ ဇန်နဝါရီလ ၁၂ ရက်မှာ စစ်ကောင်စီတပ်သား အင်အား ၃၀ ခန့်ဟာ ရေလမ်းကြောင်းမှ ရောက်ရှိလာပြီး စခန်းရှိ စာရွက်စာတမ်းတွေနဲ့ ပစ္စည်းတွေ သိမ်းဆည်းကာ ဇန်နဝါရီလ ၁၃ ရက်နေ့မှာ စခန်းကို စွန့်ခွာသွားခဲ့တာလို့ သိရပါတယ်။
စစ်ကောင်စီတပ်နဲ့ရဲ စုစုပေါင်း အင်အား ၅၀ ခန့် သကျက်တောရဲစခန်းမှ စွန့်ခွာပြီး ၃ ရက်မြောက်နေ့ ည ၁၁ နာရီခန့်မှာ ရဲစခန်း အတွင်းရှိ ပင်မဆောင်၊ အိမ်ခန်းနဲ့ တန်းလျားတွေ အပါအဝင် အဆောက်အအုံ ၅ ခု၊ ဘန်ကာ ၂ ခုတို့ကို ကာကွယ်ရေးတပ်တွေက မီးရှို့ရှင်းလင်းခဲ့တာလို့ သိရပါတယ်။
စစ်ကောင်စီရဲ့ လက်ကိုင်တုတ် လုပ်နေသူတွေကို အနီးကပ် စောင့်ကြည့်နေပြီး မြို့နယ်အတွင်း စစ်ကောင်စီရဲ့ နိုင်ငံရေး ခွေးတိုးပေါက် အတုအယောင် ရွေးကောက်ပွဲ ဖြစ်မြောက်ဖို့ ပူးပေါင်း ပါဝင်နေသူတွေကိုလည်း စောင့်ကြည့်နေပြီ ဖြစ်လို့ မိဘပြည်သူတွေ အနေနဲ့ စစ်ကောင်စီတပ်တွေနဲ့ ခပ်ဝေးဝေးမှာ နေပေးကြဖို့လည်း ကာကွယ်ရေးတပ်က အသိပေးထားပါတယ်။
MK-003
