မဲခေါင်၊ ဇန်နဝါရီ ၁၆

ရန်ကုန်တိုင်း အတွင်း ဒီကနေ့ မနက်၁၀ နာရီခွဲခန့်က ဗုံးတပ်ဆင်ထားတဲ့ ဒရုန်းတွေကို မြို့နယ်အချို့မှာ သိမ်းဆည်းရမိခဲ့ပြီးနောက် မှော်ဘီမှာ ဒရုန်း ၇ စင်း ထပ်မံ သိမ်းဆည်းရမိတယ်လို့ စစ်ကောင်စီက ကြေညာပါတယ်။

မှော်ဘီမြို့နယ် အောက်ဝါးနက်ချောင်းကျေးရွာမှာ ဒရုန်း တစ်စင်း ပျက်ကျ ပေါက်ကွဲခဲ့ပြီးနောက် ဗုံးတွေ တပ်ဆင်ထားတဲ့ နောက်ထပ် ဒရုန်း ၇ စင်းကို ရှာတွေ့ခဲ့တယ်လို့ စစ်တပ်ပိုင် မီဒီယာတွေမှာ ဖော်ပြထားပါတယ်။

“ မိဂါဒါဝုန်ကျောင်းနား ဂျိုးဖြူ ပိုက်လိုင်းဘေးမှာလည်း တွေ့တယ်။ ချုံပုတ်တွေပေါ် ဘယ်သူ လာတင်သွားလဲတော့ မသိဘူး။ ကလေးတွေ ဆော့တဲ့ လေယာဉ် ပုံစံမျိုးပါ။ ဒီလို အများကြီး သိမ်းမိတာတော့ မမြင်ဖူးပါဘူး။ အားလုံး ၇ စီးတောင် တွေ့တယ်။ တကယ်သာ ဟုတ်မယ်ဆိုရင် စစ်သားတွေ ဒီလို အေးဆေးနေမလားဗျာ” လို့ မျက်မြင်တွေ့သူ တစ်ဦးက ပြောပါတယ်။

ဒီကနေ့ မနက်ပိုင်းကလည်း အင်းယားကန်ဘောင်မှာ ဗုံးတပ်ထားတဲ့ ဒရုန်း တစ်စီး ပြုတ်ကျနေတာ တွေ့ပြီးနောက် စစ်ကောင်စီတပ်တွေက ဗုံးကို အဆိုပါ ကန်ဘောင်ပေါ်မှာ အကာအကွယ်တွေနဲ့ ဖောက်ခွဲခဲ့တယ်လို့ ဒေသခံ တစ်ဦးက ပြောပါတယ်။

ဒါ့အပြင် မြောက်ဥက္ကလာပ (၂) ရပ်ကွက်၊ အုတ်ပုံဆိပ်မှာလည်း ဒရုန်း တစ်စီး တွေ့တယ်ဆိုပြီး စစ်တပ်က ရပ်ကွက် အတွင်းရှိ မူလတန်းကျောင်း အနီးမှာ ဗုံးဖောက်ခွဲခဲ့လို့ ကျောင်းသားမိဘ အချို့ ကလေးတွေကို ကျောင်းနောက်ပေါက်က အိမ်ပြန်ခေါ်သွားကြတယ်လို့ ဒေသခံ တစ်ဦးက ပြောပါတယ်။

ဒီကနေ့ မနက် ၁၀ နာရီခွဲ ဝန်းကျင်မှာ ဒရုန်းတွေကို စစ်ကောင်စီက မြို့နယ် အသီးသီးမှာ တစ်ပြိုင်နက် တွေ့ခဲ့တာဖြစ်ပြီး မှော်ဘီမြို့နယ်မှာတော့ ဒရုန်း ၇ စီးနဲ့ အများဆုံး သိမ်းဆည်းရမိခဲ့တာ ဖြစ်တယ်လို့ ဒေသခံတွေက ပြောပါတယ်။

MK-005

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)