လယ်ရှိုကျေးရွာကို ရွှေဘိုလေ့ကျင့်ရေး (၈) နဲ့ ကန့်ဘလူနယ် ဇီးကုန်းသကြားစက်မှ စစ်သားတွေ၊ ရွာခံပျူတွေ စုစုပေါင်း အင်အား ၁၀၀ ကျော်ဟာ ပြီးခဲ့တဲ့ ဒီဇင်ဘာ ၂၈ ရက် မနက် ၅ နာရီခွဲမှ စတင်ပြီး ဇန်နဝါရီလ ၂ ရက်နေ့ အထိ ၆ ရက်တိတိ ရွာထဲသို့ အကြမ်းဖက် ဝင်ရောက် တပ်စွဲနေခဲ့တာပါ။
အဲဒီလို စစ်ကောင်စီ တပ်စွဲထားတဲ့ ၆ ရက်အတွင်းမှာ အလယ်ရှိုကျေးရွာထဲက အမျိုးသား ၇ ဦးနဲ့ အမျိုးသမီး ၂ ဦး စုစုပေါင်း ၉ ဦးကို အကြမ်းဖက် သတ်ဖြတ်ခံခဲ့ရသလို အိမ်ခြေ ၁၀၀ နီးပါးကိုလည်း မီးရှို့ဖျက်ဆီးခဲ့ပါတယ်။
စစ်တပ်ရဲ့ အကြမ်းဖက် သတ်ဖြတ်ခံခဲ့ရသူတွေဟာ ဦးချစ်ခင် အသက် ၆၅ နှစ်၊ ကိုအောင်ကို အသက် ၃၅ နှစ်၊ ကိုဆန်းနိုင် အသက် ၂၁ နှစ်၊ မောင်နေမျိုးအောင် အသက် ၁၇ နှစ်၊ ဦးထွန်းမင်း အသက် ၄၈ နှစ်၊ ကိုကျော်စိုးအောင် အသက် ၄၃၊ ကိုအောင်မြင့်သန်း အသက် ၃၈ နှစ်၊ ဒေါ်ဝင်းဌေး အသက် ၄၅ နှစ်၊ ဒေါ်ချောပို အသက် ၄၈ နှစ် တို့ဖြစ်ပါတယ်။
ဒါ့အပြင် ဆိုင်ကယ်အစီးရေ ၃၀ ကျော်၊ တိရိစ္ဆာန် အကောင်ရေ ၃၀ ကျော်နဲ့ အိမ်ထောင်ပရိဘောဂ များစွာကိုလည်း မီးရှို့ဖျက်ဆီး ခဲ့ကြတယ်လို့ သိရပါတယ်။
စစ်တပ်ဟာ ကျေးရွာ စာသင်ကျောင်းအတွင်း ကတုတ်ကျင်း ဘန်ကာတွေ တည်ဆောက်ထားခဲ့တယ်လို့လည်း ခင်ဦးမြို့နယ် သတင်းမှန် ပြန်ကြားရေးအဖွဲ့က ထုတ်ပြန်ထားပါတယ်။
လက်ရှိ စစ်ကောင်စီတပ်တွေနဲ့ ပျူစောထီးတွေ ကျေးရွာထဲက ထွက်သွားပေမယ့် ပြန်ဝင်လာမှာကို စိုးရိမ်တာကြောင့် ကျေးရွာနေ ဒေသခံ ပြည်သူ ၄,၀၀၀ ကျော်ဟာ ရွာအတွင်း ပြန်မဝင်ရဲသေးဘဲ တိမ်းရှောင်နေဆဲ ဖြစ်တယ်လို့လည်း သိရပါတယ်။
စစ်ကောင်စီတပ်နဲ့ ပျူစောထီးတွေဟာ ခင်ဦးမြို့နယ်ရှိ ကျေးရွာပေါင်း ၅၉ ရွာမှ နေအိမ်ပေါင်း ၁,၆၀၀ ခန့် ကို မီးရှို့ဖျက်ဆီးထားပြီး ပြည်သူ ၂၅၀ ကို သတ်ဖြတ်ခဲ့ပြီး ဖြစ်တယ်လို့ ခင်ဦးမြို့နယ် သတင်းမှန် ပြန်ကြားရေးအဖွဲ့က ထုတ်ပြန်ထားပါတယ်။
