မဲခေါင်၊ ဇန်နဝါရီ ၂၁
တောင်ကိုရီးယား အလုပ်အကိုင် အရည်အချင်းစစ် စာမေးပွဲ-EPS ရဲ့ ကုန်ထုတ်လုပ်ငန်း ဒုတိယအသုတ် စာမေးပွဲ ဖြေဆိုဖို့ လျှောက်ထားသူ ၁၅,၀၀၀ နီးပါးရှိတယ်လို့ အစိုးရ ပြည်ပအလုပ်အကိုင် အေဂျင်စီ-POEA က ကြေညာထားပါတယ်။
ဒီစာမေးပွဲကို ဖေဖော်ဝါရီ ၆ ရက်မှ မေလ ၁၀ ရက်အထိ ကျင်းပမှာ ဖြစ်ပါတယ်။
ပထမအကြိမ် EPS စာမေးပွဲကို ၂၀၂၂ နှစ်ကုန်ပိုင်းက ပြုလုပ်ခဲ့ရာမှာ ဖြေဆိုသူ ၁၀,၀၀၀ ကျော် ရှိတဲ့အနက် ၆,၃၈၆ ဦး အောင်မြင်ခဲ့လို့ သမိုင်းတလျှောက် အောင်မြင်မှု အများဆုံးဖြစ်ကာ တောင်ကိုရီးယားနိုင်ငံက လုပ်သား တိုးမြှင့် ခေါ်ယူမယ့် အစီအစဉ်ရဲ့ သက်ရောက်မှု ဖြစ်နိုင်တယ်လို့ ကိုရီးယားဘာသာ သင်တန်းကျောင်း နည်းပြတချို့က သုံးသပ်ပါတယ်။
“EPS-TOPIK စာမေးပွဲ အောင်မြင်တဲ့ သူတွေကို ခေါ်ရာမှာ အရင်နှစ်တွေက လူတွေကို ဦးစားပေး ခေါ်စေ ချင်တယ်။ အခုနှစ် ၁၁ လပိုင်းက Job Form အလုပ်လျှောက်လွှာ တင်တဲ့ သူတွေတောင် Calling ကျလာတာ တွေ့တဲ့အတွက် အများကြီး မျှော်လင့်ချက်တွေ ရှိလာပြီ” လို့ ကိုရီးယားဘာသာ သင်တန်းကျောင်း နည်းပြတစ်ဉီးက ပြောပါတယ်။
တောင်ကိုရီးယား အစိုးရက အခုနှစ်အတွင်း မြန်မာ အပါအဝင် နိုင်ငံခြားသား လုပ်သား ၁၂၀,၀၀၀ ကျော် ခေါ်ယူမယ်လို့ ထုတ်ပြန်ထားပါတယ်။
အခုကျင်းပမယ့် စာမေးပွဲပြီးရင် မေလကနေ ဇွန်လလယ်အထိ ဆောက်လုပ်ရေး လုပ်ငန်း အတွက် စာမေးပွဲ ပြုလုပ်မှာ ဖြစ်တယ်လို့ POEA က ကြေညာထား ပါတယ်။
ကိုရီးယားနိုင်ငံသို့ EPS စနစ်နဲ့ လုပ်သား စေလွှတ်တဲ့ နိုင်ငံ အနေနဲ့ မြန်မာနိုင်ငံ အပါအဝင် ၁၆ နိုင်ငံ ရှိပြီး ကိုရီးယားနိုင်ငံမှာ မြန်မာလုပ်သား ၅၀,၀၀၀ ခန့် လုပ်ကိုင်နေတယ်လို့ သိရပါတယ်။
MK-010
