မဲခေါင်၊ ဖေဖော်ဝါရီ ၇
ရှမ်းပြည်၊ တောင်ကြီးမြို့ရှိ ပြည်နယ် အားကစားကွင်းဘေး ဆိုင်ခန်း၊ တိုက်ခန်းများကို လာမည့် ယခု လကုန် နောက်ဆုံး ရွှေ့ပြောင်းရန် ရှမ်းပြည် အစိုးရအဖွဲ့က ဖိအားပေးစာပို့ကြောင်း မြို့ခံများထံမှ သိရသည်။
ပြည်နယ် အားကစားကွင်းပတ်လည်တွင် နိုင်ငံတကာအဆင့်မီ အားကစားကွင်း၊ ရေကူးကန်၊ လူငယ်ရေးရာစင်တာများ တည်ဆောက်မည်ဟု ဆို ကာ ဆိုင်ခန်းနှင့် လူနေတိုက်ခန်းများကို ရွှေ့ပြောင်းခိုင်းနေခြင်း ဖြစ်သည်။
ယင်းအမိန့်စာကို ပြီးခဲ့သည့် ၂၀၂၅ ခုနှစ်၊ ဒီဇင်ဘာ ၃ ရက်တွင် ပထမအကြိမ် ထုတ်ပြန်ထားပြီး ပြီးခဲ့သည့် ဇန်နဝါရီ ၅ ရက်တွင် ဒုတိယအကြိမ်နှင့် ယခုလ ၂ ရက် ရက်စွဲဖြင့် ထပ်မံ ထုတ်ပြန်လာခြင်း ဖြစ်သည်။
“ခုဆို အဲနားတစ်ဝိုက် သူတို့က မီးလည်းဖြတ်ပြီး ရေလည်းဖြတ်ပြီ။ ခုတော့ တချို့က ပစ္စည်းရွှေ့နေပြီ။ ဒီတစ်ခါ မဖယ်ပေးရင်တော့ တကယ် သူတို့အင်အားသုံးပြီး ဖယ်ရှားမယ့် သဘောရှိတယ်”ဟု မြို့ခံတစ်ဦးက မဲခေါင်သို့ ပြောသည်။
သတ်မှတ်ထားသော အချိန်အတွင်း မပြောင်းရွှေ့ပေးပါက ၁၉၅၅ ခုနှစ်၊ အစိုးရအိမ်ဥပစာ (နှင်ထုတ်ခြင်း) အက်ဥပဒေအရ ဖယ်ရှားသွားမည် ဖြစ်ကြောင်းလည်းပေးပို့သော စာတွင် ဖော်ပြထားသည်။
ယင်းဘောလုံးကွင်း ဘေးပတ်လည်တွင် ဆိုင်ခန်း၊ တိုက်ခန်းပေါင်း ၂၀၀ ကျော်ရှိပြီး အများစုသည် ဆိုင်ကယ် အပိုပစ္စည်းဆိုင်နှင့် ပုံနှိပ်ဆိုင်များ ရှိကြောင်း မြို့ခံများထံမှ သိရည်။
ထိုသို့ တိုက်ခန်းများ၊ ဆိုင်ခန်းများကို ဖယ်ရှားခိုင်းမှုကြောင့် တိုက်ခန်းတွင် ငှားရမ်းနေထိုင်သူများနှင့် တိုက်ခန်း ဝယ်ယူထားသူများ အခက်ကြုံနေရပြီး နေရာသစ် ထပ်မံငှားရမ်းရန် ငွေကြေးအခက်ခဲ ဖြစ်နေကြောင်း မြို့ခံတစ်ဦးက ဆိုသည်။
ပြီးခဲ့သည့် ၂၀၂၄ ခုနှစ်နှင့် ၂၀၂၅ ခုနှစ်တွင်လည်း ကျောင်းကြီးစု ရပ်ကွက်ရှိ၊ ရှမ်းရိုးမတိုက်တန်းနှင့် တပ်ပိုင်မြေပေါ်ရှိ ဆောက်လုပ်ထားသည့် အဆောက်အအုံနှင့် ဆိုင်ခန်းများကို စစ်ကောင်စီက ဘူဒိုဇာများဖြင့် ထိုးပြီး ရှင်းလင်းခဲ့သေးကြောင်း မြို့ခံများထံမှ သိရသည်။
#MeKongnews
#တောင်ကြီး
#အားကစားကွင်း
#ဆိုင်ခန်း
#ရွှေ့ပြောင်း
#ဖိအားပေး
