မဲခေါင်၊ ဇွန် ၁၅
ရှမ်းပြည်တောင်ပိုင်းနဲ့ ကရင်နီပြည်အစပ်က ဖယ်ခုံမြို့နယ်၊ မိုးဗြဲမြို့မှာ ရေကာတာကို ပိတ်ထားတာကြောင့် ညောင်ရွှေမြို့နယ် အင်းလေးကန် တစ်ခွင်မှာ ရေအဆမတန် တက်လာပြီး လယ်ကွင်းတွေ ရေမြုပ်ပျက်စီးနေတယ်လို့ လယ်သမားတွေက ပြောပါတယ်။
ဇွန်လပိုင်းအတွင်း အင်းလေးကန်မှာ နေ့စဉ်ရက်ဆက် မိုးရွာသွန်းမှုနဲ့အတူ စစ်ကောင်စီဘက်က မိုးဗြဲရေကာတာကို ထိန်းချုပ်ထားတာကြောင့် အခုလို ရေအဆမတန် တက်လာတာပါ။
“အင်းလေးကန်မှာ ရေတက်လာရင် ရေတံခါး ဖွင့်ပေးရတယ်။ အဲဒါမှ ရေက လွိုင်ကော်ဘက်ကို ပြန်စီးကျတယ်။ ရေနည်းနေရင်တော့ တံခါးပိတ်ထားရတယ်။ တံခါးဖွင့်ထားရင် မိုးရွာလဲ ရေက သူ့သူဒီတိုင်း ရှိနေပြီး လယ်စိုက်လို့ရတယ်။ ခုက တံခါးကို ပိတ်ထားတော့ ရေကစီးစရာမရှိဘဲ အင်းထဲရေကြီးတာပေါ့” မိုးဗြဲမြို့ခံ တစ်ဦးက လို့ ပြောပါတယ်။
မိုးဗြဲရေတာကို စစ်ကောင်စီတပ်က တမင်ပိတ်ထားတာမျိုး မဟုတ်ဘဲ ၁၁၁၁ စစ်ဆင်ရေးကတည်းက ရေကာတာ ဝန်ထမ်းတွေ တိန်းရှောင်သွားတာကြောင့် နားလည်တတ်ကျွမ်းတဲ့ ပညာရှင်တွေ မရှိတော့တာလို့ ဆိုပါတယ်။
လတ်တလောမှာ ရေကာတာပိတ်ထားခြင်းကြောင့် အင်းလေးကန်မှာ ရေကြီးပြီး လယ်ကွင်းတွေ ရေမြုပ်နေသလို တဖက်က မိုးဗြဲနဲ့ လွိုင်ကော်မြို့မှလည်း ရေစီးဆင်းမှု မရှိတာကြောင့် လယ်စိုက်လို့ မရသေးဘူးလို့ လယ်သမားတွေဆီက သိရပါတယ်။
“ကျနော်တို့က ပိုရှုံးတာပေါ့။ စိုက်ပျိုးရေး စရိတ်က ရင်းထားပြီးပြီလေ။ ဆန်တစ်အိတ် တစ်သိန်းခွဲလောက်ရှိတယ်။ ကိုယ်တိုင်စိုက်ရင် တစ်နှစ်စာစားဖို့ မပူရဘူး။ မိုးဗြဲဘက်ကတော့ မစိုက်ရသေးတော့ စိုက်ပျိုးရေးစရိတ် မရှုံးဘူးပေါ့” အင်းလေးကန်အတွင်း လယ်ယာလုပ်ကိုင်သူ တစ်ဦးက လို့ ပြောပါတယ်။
စစ်ကောင်စီဘက်ကလည်း နားလည်တတ်ကျွမ်းတဲ့ ဝန်ထမ်းတွေကို ပြန်လည်ခေါ်ယူတာမျိုး မရှိသေးသလို ပြီးခဲ့တဲ့နှစ် အောက်တိုဘာလတုန်းကလည်း မဆင်မခြင် သတ်မှတ်ပမာဏထက် ကျော်လွန်ပြီး ရေလွှတ်ချမှုကြောင့် မိုးဗြဲမြို့တွင်းက လယ်ဧက ထောင်ချီ ရေမြုပ်ပျက်စီးခဲ့တဲ့အပြင် ရေကြီးရေလျှံဖြစ်ကာ လွိုင်ကော်မြို့တ္ငင်းက ရပ်ကွက်တချို့ အရေးပေါ် ပြောင်းရွှေ့ခဲ့ရဖူးပါတယ်။
နိုင်ငံတွင်း ရွှေနဲ့ ဒေါ်လာဈေး အဆမတန် တက်လာတဲ့ နောက်ဆက်တွဲ အနေနဲ့ လက်လုပ်လက်စား အောက်ခြေလူတန်းစားတွေ စားတဲ့ ဆန်တစ်ပြည် ဈေးနှုန်းဟာ ၅ ထောင်ကျပ် ပတ်ချာလည်ဝန်းကျင် ၂၄ ပြည်တစ်အိတ်ကို တစ်သိန်းခွဲကျပ်နီးပါး အထိရှိလာပြီး အခုလို လယ်တွေ ရေမြုပ်တာ လယ်စိုက်ခွင့် မရတာတွေကြောင့် လာမယ့်နှစ်တွေမှာ ဆန်ဈေး ပိုတက်လာနိုင်တယ်လို့ လယ်သမားတွေက ခန့်မှန်းထားပါတယ်။
MK014
