မဲခေါင်၊ အောက်တိုဘာ ၁၃
ရှမ်းပြည်နယ် တောင်ပိုင်း၊ ဖယ်ခုံမြို့နယ်ထဲက ဘီလူးချောင်းရေဟာ မိုးနေ့စဉ်ရက်ဆက် ရွာသွန်းမှုကြောင့် အဆမတန် ရေတက်လာပြီးနောက် မိုးဗြဲရေကာတာက ရေဖောက်ချနေရတယ်လို့ ဒေသခံတွေက ဒီကနေ့ ပြောပါတယ်။
လတ်တလော မိုးဗြဲရေကာတာကနေ ရေ ၅ ပေစီ ခွဲလွှတ်နေတာကြောင့် ဒေသတွင်း လယ်ဧက ထောင်ချီ ရေမြုပ်သွားတဲ့အပြင် စစ်ဘေးရှောင်စခန်းနဲ့ ဒေသခံ တချို့ အရေးပေါ် ပြောင်းရွှေ့နေရတယ်လို့ ဆိုပါတယ်။
“သတ်မှတ် ပမာဏာထက် ရေပြည့်လာလို့ ရေလွှတ်နေတယ်။ လွိုင်ကော် အနောက်ဘက်က လယ်ကွင်းတွေ ရေမြုပ်နေပြီ။ မိုးလည်း ဆက်ရွာမယ်၊ ရေကာတာကလည်း ရေဆက်လွှတ်မယ်ဆိုရင် နန့်ကွတ်၊ ရွှေတောင်ဘက်က ရွာတွေအကုန် ရေမြုပ်နိုင်တယ်” လို့ ဒေသခံ တစ်ဦးက ပြောပါတယ်။
ဒီကနေ့ လွိုင်ကော်မြို့နယ်ထဲက ဘုရားဖြူ၊ ဘုရားနီကျေးရွာ အပါအဝင် စစ်ဘေးရှောင် စခန်း ၅၀ ကျော်ဟာ လွိုင်ကော်မြို့ပေါ်ကို ပြောင်းရွှေ့နေပြီး တောင်ကွယ်စေတီဘက်မှာ လူမှုကူညီရေး အသင်းတွေက ကားအစီး ၃၀ နဲ့ ကယ်ဆယ်ရေး အတွက် ကြိုတင် ပြင်ဆင်နေတယ်လို့ သိရပါတယ်။
မိုးဗြဲရေကာတာ ရေပြည့်လာချိန် ရေလွှတ်လေ့ ရှိပေမယ့် ဒီနှစ်မှာတော့ ရေတက်ချိန်စောတဲ့ အပြင် မိုးနေ့စဉ် ရက်ဆက် ရွာသွန်းတာကြောင့် အရင်ထက် ၃ ဆခန့် ရေလွှတ်နေရတာလို့ ရေကာတာနဲ့ နီးစပ်သူ တစ်ဦးက ဆိုပါတယ်။
“ပြောင်းတဲ့လူတော့ တော်တော်များနေပြီ။ ပိုက်ဆံမရှိတဲ့ လူတွေတော့ ဘယ်ပြောင်းနိုင်သေးမလဲ။ တော်တော်များများ အိမ်အောက်ထပ် ရေဝင်နေပြီ။ ကျနော်တို့က တစ်ပတ်လောက် စောင့်ကြည့်ဦးမယ်။ ရေက မဖောက်ထုတ်ရင်လည်း လျှံလာပြီး လွိုင်ကော် တစ်မြို့လုံး ရေမြုပ်မှာ။ အဲတော့ နည်းနည်းချင်းစီပဲ ဖောက်ထုတ်နေတာ” လို့ ဘုရားနီ ကျေးရွာနေ အမျိုးသား တစ်ဦးက ပြောပါတယ်။
လာမယ့် ရက်တွေမှာ မိုးဆက်တိုက် ရွာသွန်းပါက မိုးဗြဲရေကာတာကနေ ရေလျှံကျလာနိုင်ပြီး ဘီလူးချောင်းရေ မြင့်တက်မှုနဲ့အတူ လွိုင်ကော်မြို့ထဲက ဒေါတမ၊ လောဓမ၊ ဓမ္မာရုံ၊ မှုံပြာ၊ နန်းကွတ်၊ ဈေးပိုင်း၊ ရွှေတောင်၊ ဒေါနိုကူး စတဲ့ ရပ်ကွက်တွေဟာ ရေလွှမ်းသွားနိုင်တာကြောင့် ဒေသခံတွေက စိုးရိမ်နေပါတယ်။
လတ်တလောမှာ အဆမတန် ရေတက်လာမှုကြောင့် လွိုင်ကော်မြို့နယ်၊ ဘီလူးချောင်း အရှေ့ဘက်က ကျေးရွာတွေနဲ့ လယ်ကွင်းတွေ၊ ဖယ်ခုံအင်း အနီးတစ်ဝိုက်က လယ်ကွင်းတွေ ဧကထောင်ချီ ရေလွှမ်းသွားပြီး တောင်သူတွေ ဆုံးရှုံးကုန်တယ်လို့ သိရပါတယ်။
CJ-007
#MekongNews
#မိုးဗြဲရေကာတာ
#လက်နက်ကြီး
#ရေနစ်မြုပ်
