မဲခေါင်၊ စက်တင်ဘာ ၃၀
ရှမ်းပြည်နယ် မြောက်ပိုင်း၊ တရုတ်-မြန်မာ မူဆယ် နယ်စပ်ဂိတ်မှာ အောက်တိုဘာလ ၁ ရက်နေ့ကစပြီး မြန်မာ နိုင်ငံကူး လက်မှတ်နဲ့ တရုတ်ဘက် ဝင်ခွင့်ပြုမယ်လို့ နယ်စပ် ဒေသခံတွေက ပြောပါတယ်။
နိုင်ငံကူး လက်မှတ်ကို ရန်ကုန်၊ မန္တလေး၊ လားရှိုး မြို့တွေမှာရှိတဲ့ နိုင်ငံကူးလက်မှတ် စိစစ်ထုတ်ပေးရေး ရုံးတွေမှာ လျှောက်ထားရယူနိုင်ပြီး နိုင်ငံကူးလက်မှတ် ရယူပြီးနောက် ရန်ကုန်ရှိ တရုတ်သံရုံး သို့မဟုတ် မန္တလေး ရှိ တရုတ် ကောင်စစ်ဝန်ရုံးတွေမှာ ဗီဇာ (Business Visa) လျှောက်ထားနိုင်တယ်လို့ သိရပါတယ်။
“ လုပ်ငန်း ဗီဇာပဲ ရသေးတယ်။ ၁ ရက်နေ့ စမ်းသပ် ဝင်ခွင့်ပြုမှာ။ တခြား ဟာတော့ မရသေးဘူး” လို့ မူဆယ်ခရိုင် ဌာနဆိုင်ရာနဲ့ နီးစပ်သူ တစ်ဦးက ပြောပါတယ်။
တခြား ဗီဇာတွေ ပေးမယ့် အချိန်ကိုတော့ ပြန်လည် အသိပေး ထုတ်ပြန်သွားမယ်လို့ သူကဆိုပါတယ်။
ကုန်သည် တစ်ဦးကတော့ “ လုပ်ငန်း ဗီဇာ လျှောက်လို့ ရပြီ။ Show Money တော့ ပြရတယ်” လို့ ပြောပါတယ်။
လုပ်ငန်း ဗီဇာ ရရှိပါက ရက်ပေါင်း ၃၀ တရုတ်ဘက်မှာ နေထိုင်ခွင့်ပြုပြီး မြန်မာဘက် ပြန်ထွက်ကာ ဗီဇာ ထပ်လျှောက်ရကြောင်း၊ ဒုတိယ အကြိမ်အထိ တစ်ကြိမ် ရက်ပေါင်း ၃၀ သာ ခွင့်ပြုတယ်လို့ သူက ပြောပါတယ်။
တတိယ အကြိမ်မှာတော့ တရုတ်ဘက်က ထောက်ခံပေးမယ့် လုပ်ငန်းရှင် ကုမ္ပဏီ ရှိပါက ထောက်ခံပေးမယ့် ကုမ္ပဏီပေါ် မူတည်ပြီး ဗီဇာ သက်တမ်း ၃ လ ကနေ ၆ လအထိ ရနိုင်တယ်လို့ ဆိုပါတယ်။
ဗီဇာ သက်တမ်းတိုးတာကို တယ်ဟုန်ခရိုင်၊ နိုင်ငံခြားသားများ ပြည်ဝင်၊ ပြည်ထွက် ကြီးကြပ်ရေး ဗျူရိုသို့ အာမခံပေးတဲ့ တရုတ်နိုင်ငံ ကုမ္ပဏီရဲ့ ထောက်ခံချက် တင်ပြ ပြုလုပ်နိုင်ကြောင်း၊ တရုတ်ဘက်ခြမ်းနေ မြန်မာနိုင်ငံသားများ အတွက် ကောင်စစ်ရေးရာ ထောက်ပံ့ကူညီရေးအဖွဲ့ရဲ့ အသိပေး ကြေညာစာမှာ ဖော်ပြထားပါတယ်။
စီးပွားရေး မြန်မာနိုင်ငံကူးလက်မှတ် (BP–Passport for Business) လျှောက်ထားလိုသူတွေ အနေနဲ့ ကုမ္ပဏီ မှတ်ပုံတင် မူရင်းနဲ့ မိတ္တူ တစ်စုံ၊ ပုံစံ (၆/၂၆) မူရင်းနဲ့ မိတ္တူ တစ်စုံ လိုအပ်တယ်လို့ သိရပါတယ်။
ဗီဇာ လျှောက်ရာမှာ တရုတ်-မြန်မာ ကုန်းလမ်း နယ်စပ်ဂိတ်ပေါက် ကနေ ဝင်ရောက်မှာ ဖြစ်ကြောင်း အသိပေးရမှာဖြစ်ပြီး ဗီဇာရယူပြီးနောက် ကျယ်ဂေါင် – မူဆယ် သတ်မှတ်ထားတဲ့ ဂိတ်ပေါက်မှ တရုတ်နိုင်ငံထဲ ဝင်ရောက်နိုင်တယ်လို့ ဆိုပါတယ်။
အလုပ်သမား ဗီဇာကတော့ ၂ နိုင်ငံ နားလည်မှု စာခွန်လွှာ လက်မှတ် (MoU) ထိုးပြီးမှ အသိပေးသွားမှာ ဖြစ်ကြောင်း သိရပါတယ်။
Photo: 008
CJ-008
#MekongNews
#မူဆယ်
#နိုင်ငံကူးလက်မှတ်
#ဗီဇာ
