မဲခေါင်၊ ဇူလိုင် ၂၇

ရှမ်းပြည်နယ် တောင်ပိုင်း၊ ပင်လောင်းမြို့နယ်၊ ရင်းမှီးကျေးရွာရှိ စစ်ကောင်စီတပ်က သိမ်းထားတဲ့ မြေအတွင်း ကျရောက်နေတဲ့ လက်ဖက်ပင်တွေကို တစ်ပင် ၂၀၀ ကျပ် ဆက်ကြေးပေးမှ စစ်တပ်က လက်ဖက်ခူးခွင့် ပေးတယ်လို့ စုံစမ်း သိရှိရပါတယ်။

အဲ့ဒီ လက်ဖက်ပင်တွေဟာ စစ်ကောင်စီတပ် မရှိခင်ကတည်းက ဒေသခံတွေ စိုက်ပျိုးထားတဲ့ လက်ဖက် စိုက်ခင်းတွေဖြစ်ပြီး စစ်တပ် ရောက်လာပြီးနောက် လက်ဖက်ခြံတွေကို သိမ်းယူခဲ့တာ ဖြစ်တယ်လို့ ရင်းမှီး ဒေသခံ တစ်ဦးက ပြောပါတယ်။

“အရင်က တစ်ပင် ၅၀ ကနေ တစ်ပင် ၁၀၀ တောင်းတယ်။ အခု ဒီနှစ်မှာ တစ်ပင် ၂၀၀ ပေးရမယ်လို့ တောင်းလာတယ်။ မပေးရင် လက်ဖက် မပေးခူးတော့ဘူးတဲ့။ သူတို့က နောက်မှ ရောက်လာပြီး သိမ်းသွားတဲ့ ဟာကို သူတို့တောင်းသလို ပေးနေရတာက သက်သက်အနိုင်ကျင့်တာပါဗျာ” လို့ ဒေသခံ တစ်ဦးက ပြောပါတယ်။

စစ်ကောင်စီတပ် သိမ်းထားတဲ့ မြေတွေဟာ ဧက ၅,၀၀၀ ကျော်ရှိပြီး အဲ့ဒီတပ်သိမ်းမြေအတွင်း ရင်းမှီး ၊ စင်းတောင်း စတဲ့ ကျေးရွာနေ ပြည်သူတွေ ပိုင်တဲ့ လက်ဖက်စိုက်ခင်း ဧကပေါင်း ထောင်ချီ ရှိနေပါတယ်။

“အပင်နဲ့ဆို မတွက်တတ်ဘူးဗျ၊ တစ်ဧကကို အပင်တစ်ထောင် ဝန်းကျင်ရှိတယ်။ တစ်နှစ်ကို ဒေသခံတွေ ဆောင်ရတဲ့ အခွန် စုစုပေါင်း သိန်းထောင်ဂဏန်းရှိတယ်။ တစ်ပင် ၂၀၀ ဆိုတော့ ပိုဆောင်ရတာပေါ့။ တောင်သူတွေက ဘာမှ မစားရဘူး။ သူတို့က ဘာမှမလုပ်ရဘဲ မြေသိမ်းထားတာနဲ့ ငွေရနေတယ်လေ” လို့ နောက်ထပ် ဒေသခံ တစ်ဦးက ပြောပါတယ်။

လက်ဖက်ခူးပြီးနောက် လက်ဖက်ခြောက်ဖြစ်ဖို့ လုပ်ရတဲ့ အဆင့်ဆင့်မှာ ကုန်ကျစရိတ်တွေ ရှိတာကြောင့် လက်ရှိ စျေးနှုန်းနဲ့ အမြတ်ရရှိဖို့ ခက်ခဲ့တယ်လို့လည်း သူကပြောပါတယ်။

လက်ဖက်ခြံအပြင် စစ်ကောင်စီတပ်က သိမ်းထားတဲ့ မြေအတွင်း စိုက်ပျိုးရေး လုပ်ကိုင်လိုသူတွေ အနေနဲ့ စစ်ကောင်စီတပ်ကို အခွန်ပေးဆောင်ရတယ်လို့ ဆိုပါတယ်။

အဲ့ဒီလို အခွန်ပေးပြီး စိုက်ပေမယ့် စစ်ကောင်စီတပ်က ဒေသခံတွေ စိုက်ထားတဲ့ ခြံတွေကို ဖျက်ဆီးလိုက်တာတွေ ရှိတယ်လို့ စင်းတောင်း ဒေသခံ တစ်ဦးက ပြောပါတယ်။

“အဲ့လိုလုပ်လို့ ဒီဘက်က ဒေသခံတွေ အများစုက တစ်ခြား ဒေသတွေမှာ တောင်ယာ သွားလုပ်ကြရတာ အများကြီးပဲ။ တစ်ခြား မြေရှိတဲ့ဒေသမှာ စိုက်ပျိုးရေး ရာသီဆို စိုက်ပျိုးရေးတွေ သွားလုပ်ကြပြီး ရာသီကုန်မှ ရွာကို ပြန်လာကြရတာ” လို့ သူကပြောပါတယ်။

စစ်ကောင်စီတပ်ဟာ ပင်လောင်းမြို့တောင်ဘက် အထွက် ရင်းမှီး၊ စင်းတောင်းကျေးရွာရဲ့ မျက်နှာချင်းဆိုင် ကားလမ်းမကြီး အရှေ့ဘက်မှာရှိတဲ့ ဒေသခံတွေရဲ့ မြေဧက ထောင်နဲ့ချီ သိမ်းဆည်းပြီး အမှတ် (၄) စစ်အခြေခံ လေ့ကျင့်ရေးတပ် တည်ဆောက်ထားတာ ဖြစ်ပါတယ်။

CJ-002

#MekongNews

#ပင်လောင်းမြို့နယ်

#လက်ဖက်စိုက်ခင်း

#တပ်သိမ်းမြေ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)