မဲခေါင်၊ ဧပြီ ၆
ပအိုဝ်း အမျိုးသား အလံတော်ကို ပါတီ အလံအဖြစ် သုံးစွဲဖို့ ပအိုဝ်း အမျိုးသား အဖွဲ့ချုပ်-PNO ပါတီရဲ့ လျှောက်ထားမှုကို ကန့်ကွက်သူရှိလို့ ပါတီအလံ ပြန်ပြောင်းဖို့ စစ်ကောင်စီ လက်အောက်ခံ ပြည်ထောင်စု ရွေးကောက်ပွဲ ကော်မရှင်-UEC က PNO ပါတီကို အကြောင်းကြားစာ ပို့ထားတယ်လို့ စုံစမ်း သိရှိရပါတယ်။
စစ်ကောင်စီ ကျင်းပမဲ့ ရွေးကောက်ပွဲ ဝင်ရောက်ယှဉ်ပြိုင်ဖို့ ပါတီ ပြန်လည် မှတ်ပုံတင်ရာမှာ ပြည်သူ့စစ် ဖြစ်တဲ့ PNO ပါတီ အနေနဲ့ ပအိုဝ်း အမျိုးသား အလံတော်ကို ပါတီ အလံအဖြစ် မှတ်ပုံတင်ခဲ့တာ ဖြစ်ပါတယ်။
အဲ့ဒီလို အမျိုးသား အလံကို ပါတီ အလံအဖြစ် သုံးစွဲဖို့ မှတ်ပုံတင်တာကို မတ်လ ၆ ရက်နေ့မှာ ကရင်ပြည်နယ် ပအိုဝ်းစာပေနဲ့ ယဉ်ကျေးမှုအဖွဲ့က ပအိုဝ်း ပြည်သူလူထု ကိုယ်စား ကန့်ကွက်စာ တင်ခဲ့တာပါ။
ကန့်ကွက်စာ တင်ပြီးနောက် PNO ပါတီ အနေနဲ့ ပါတီ အလံကို ဧပြီလ ၅ ရက်နေ့ နောက်ဆုံးထားပြီး ပြောင်းလဲ တင်ပြဖို့ စစ်ကောင်စီရဲ့ ရွေးကော်က PNO ပါတီကို အကြောင်းကြားလိုက်တာ ဖြစ်ပါတယ်။
“အမျိုးသား အလံတော် ဆိုတာက တစ်မျိုးသားလုံးနဲ့ ဆိုင်တယ်။ အမျိုးသား အလံတော်ကို ပါတီ အလံအဖြစ် အသုံးပြုရင် ကောင်းကျိုးထက် ဆိုးကျိုးက ပိုများတယ်။ ကြာလာရင် အမျိုးသား အလံတော်ကို အလေးပြုတာလား၊ ပါတီအလံကို အလေးပြုတာလား ဆိုတဲ့အထိ လူတွေကို နှစ်ခြမ်းကွဲစေနိုင်ပါတယ်” လို့ ကရင်ပြည်နယ် ပအိုဝ်းစာပေနဲ့ ယဉ်ကျေးမှုအဖွဲ့ဝင် တစ်ဦးက ပြောပါတယ်။
အမျိုးသား အလံတော်ဟာ တစ်မျိုးသားလုံးပိုင်တဲ့ အရာဖြစ်ပြီး လူတစ်စု တစ်ဖွဲ့က အပိုင်လုပ်လို့ မရဘူးလို့ ပအိုဝ်း လူငယ် တစ်ဦးက ပြောပါတယ်။
“ဥပမာ ပအိုဝ်းလူမျိုး ဝန်ထမ်း တစ်ယောက်က အမျိုးသား ချစ်စိတ်နဲ့ အလံတော်ကို ရင်ဘတ်မှာ ကပ်ထားတာ ဖြစ်ပေမယ့် ဥပဒေအရ သူက ပါတီအလံကို ရင်ဘတ်မှာ ကပ်ထားတာ ဖြစ်နေတော့ သူအရေးယူ ခံရနိုင်တယ်။ ဝန်ထမ်းက ပါတီနိုင်ငံရေး လုပ်တယ်ဆိုပြီး စကစ က အရေးယူနိုင်တယ်။ ဒီလိုမျိုး ဆိုးကျိုးတွေလည်း အများကြီး ရှိနိုင်တယ်လေ” လို့ သူကထောက်ပြပါတယ်။
ပအိုဝ်း အမျိုးသား အလံတော်ကို အဖွဲ့အစည်း တစ်ခုခုက အဖွဲ့အစည်း အလံအဖြစ် အဓမ္မ အသုံးပြုရင် အမျိုးသားပိုင် ပစ္စည်း ခိုးယူရာ ရောက်တယ်လို့ သူက ဆက်ပြောပါတယ်။
PNO ပါတီဟာ ပြီးခဲ့တဲ့ ကြံ့ခိုင်ရေး အစိုးရနဲ့ NLD အစိုးရ လက်ထက်က ပအိုဝ်း ပြည်သူလူထုတွေရဲ့ ဥပေဒ နားမလည်မှု၊ သတင်းအချက်အလက်ရရှိမှု အားနည်းချက်တွေကို အသုံးချပြီး ပအိုဝ်း အမျိုးသား အလံတော်ကို ပါတီ အလံအဖြစ် သုံးစွဲခဲ့တယ်ဆိုတဲ့ စွပ်စွဲမှုတွေ အဲဒီကာလတွေက ပေါ်ပေါက်ခဲ့ပါသေးတယ်။
ဒီကိစ္စနဲ့ ပတ်သက်ပြီး လက်ရှိ စစ်ကောင်စီ အဖွဲ့ဝင်အဖြစ် တာဝန်ထမ်းဆောင်နေတဲ့ PNO ပါတီ ဥက္ကဋ္ဌ ခွန်စံလွင် နဲ့ ဒု-ဥက္ကဋ္ဌ ခွန်မောင်သောင်း တို့ကို ဆက်သွယ် မေးမြန်းဖို့ ကြိုးစားပေမယ့် ဖုန်းလက်ခံ ဖြေတာ မရှိပါဘူး။
PNO ပါတီဟာ စစ်တပ် လက်အောက်ခံ PNA ပြည်သူ့စစ်ရဲ့ ဦးဆောင် နိုင်ငံရေး အဖွဲ့အစည်းဖြစ်ပြီး PNO ဗဟိုကော်မတီဝင်နဲ့ စီးပွားရေး တာဝန်ခံ၊ PNA ပြည်သူ့စစ် တပ်ရင်း (၄) ရဲ့ တပ်ရင်းမှူးဖြစ်သူ ခွန်နေဝင်းထွန်း ဟာ ဦးသိန်းစိန် အစိုးရ လက်ထက်မှာ လွှတ်တော် ကိုယ်စားလှယ်ဖြစ်ခဲ့ပြီး PNO ပါတီရဲ့ အတွင်းရေးမှူးလည်း ဖြစ်ပါတယ်။
အဲ့ဒါအပြင် လက်ရှိ စစ်ကောင်စီ အဖွဲ့ဝင် ခွန်စံလွင် ဟာ PNO ပါတီရဲ့ ဥက္ကဋ္ဌ ဖြစ်သလို ဗိုလ်မှူးအဆင့်နဲ့ ပြည်သူ့စစ်ရဲ့ ဗဟိုကော်မတီဝင်လည်း ဖြစ်ပါတယ်။
CJ-002
#MeKongNews
#အမျိုးသားအလံ
#PNO
#ရွေးကောက်ပွဲကော်မရှင်
