မဲခေါင်၊ မတ် ၂၃
မကွေးတိုင်း၊ တောင်တွင်းကြီးမြို့နယ်၊ ကမ္ဘာ့အမွေအနှစ် ယူနက်စကို စာရင်းဝင် ဗိဿနိုးဒေသမှာ မနေ့ ညပိုင်းက ဝိညာဉ်ရှာဖွေတဲ့အဖွဲ့ လူမှုကွန်ရက်မှ တိုက်ရိုက် ထုတ်လွှင့်နေစဉ် ဝီစီများမှုတ်ပြီး မပြေးနဲ့ မပြေးနဲ့ ဆိုကာ ရဲက လူငယ် ၅ ဦးကို ဖမ်းဆီးသွားတယ်လို့ သိရပါတယ်။
ဝိညာဉ်ရှာဖွေရေးအဖွဲ့ အနေနဲ့ ည ၁၀ နာရီမှာ တိုက်ရိုက် ထုတ်လွှင့်မယ်လို့ ကြေညာပြီးနောက် ရိုက်ကူး ထုတ်လွှင့်ချိန် ၂၆ မိနစ်ကျော်မှာ ရဲလာဖမ်းသွားတာဖြစ်ပြီး ဖမ်းဆီးခံရသူထဲမှာ ဒေသခံ လမ်းပြ လူငယ် တစ်ဦး ပါဝင်တယ်လို့ ဒေသခံက ပြောပါတယ်။
“ ဒီလိုအချိန် ဒီလို ကာလမျိုးမှာ ဒါမျိုးလာပြီး ရိုက်တာကို အံ့သြတယ်။ လုပ်စရာတွေ အများကြီး ရှိပါတယ်။ နယ်မြေ မအေးချမ်းတဲ့ ဒေသဆို သေလောက်ပြီ။ ကိုယ်ဝါသနာ ပါတယ်ဆိုပြီး လုပ်ချင်တာ လုပ်လို့ ဖြစ်တာ။ ရဲစခန်းက ညထဲကခေါ်ပြီး စစ်နေတယ် ပြောတယ်။ အာမခံတော့ ရလောက်ပါတယ်။ ခုလို အချိန်အခါမျိုးမှာ ဒါတွေ လုပ်ပြလို့ ဘာမှ အကျိုးမရှိပါဘူး” လို့ သူကပြောပါတယ်။
ဖမ်းဆီးခံရတဲ့ ဝိညာဉ်ရှာဖွေရေးအဖွဲ့ Ghost Hunters Myanmar ဟာ မြန်မာပြည်မှာ နာမည်ကြီးပြီး သရဲခြောက်တယ် ဆိုတဲ့ နေရာတွေကို သွားရောက် တိုက်ရိုက် ထုတ်လွှင့်တဲ့အဖွဲ့ ဖြစ်ကာ ဖေစ့်ဘွတ် စာမျက်နှာမှာ ကြိုက်နှစ်သက်သူ ၄ သိန်းကျော်ရှိပြီး စောင့်ကြည်သူ ၅ သိန်း ဝန်းကျင် ရှိပါတယ်။
အပတ်စဉ် သောကြာနဲ့ စနေနေ့ ညဘက်များမှာ သရဲခြောက်တယ်လို့ နာမည်ကြီးတဲ့ နေရာတွေမှာ ကြည့်ရှူတဲ့ ပရိတ်သတ်အချို့၊ ဒေသခံအချို့ကို ခေါ်ပြီး တိုက်ရိုက်ထုတ်လွှင့် ပြသနေတဲ့ အဖွဲ့လည်း ဖြစ်ပါတယ်။
ပန်ထွာ ဘုရင်မနဲ့ ပတ်သက်တဲ့ သမိုင်းကြောင်းတွေနဲ့ နာမည်ကြီးလှတဲ့ ဗဿနိုးမြို့ဟောင်းနေ ဒေသခံတွေမှာ ယုံကြည်မှုတွေ အမျိုးမျိုး ရှိနေပြီး ဒေသတွင်း အရိုအသေမဲ့စေတဲ့ အပြုအမူတွေ လုပ်လေ့မရှိဘူးလို့ ဆိုပါတယ်။
လက်ရှိ ဖမ်းဆီးခံထားရတဲ့ ဝိညာဉ်ရှာအဖွဲ့ရဲ့ လက်ကိုင်ဖုန်း ဖွင့်ထားပေမယ့် လက်ခံဖြေကြားတာ မရှိသလို ဖမ်းဆီးမှုနဲ့ ပတ်သက်ပြီး စစ်အာဏာပိုင်တွေ ဘက်က တစ်စုံတစ်ရာ ထုတ်ပြန်တာ မရှိသေးတဲ့ အတွက် စိတ်ပူမိတယ်လို့ ပရိတ်သတ်အချို့က ပြောကြားပါတယ်။
MK-005