မဲခေါင်၊ ဇန်နဝါရီ ၁၉
စစ်ကိုင်းတိုင်း၊ မုံရွာ မြို့ပေါ်ရပ်ကွက်တွေမှာ ရွေးကောက်ပွဲ အတွက် လူဦးရေ စာရင်း ကောက်ယူနေတဲ့ စစ်ကောင်စီတပ်ဖွဲ့ဝင်တွေက အိမ်ထောင်စု စာရင်း မူရင်း စာရွက်တွေကို တောင်းယူပြီး ပြည်သူတွေကို တစ်စောင် ကျပ် ၅၀,၀၀၀ နှုန်းနဲ့ ပြန်ရွေးခိုင်းနေတယ်လို့ ဒေသခံတွေက မဲခေါင်သတင်းကို ပြောပါတယ်။
မနေ့က ဇန်နဝါရီ ၁၈ ရက်မှာ မြို့ပေါ် ရပ်ကွက်တွေဖြစ်တဲ့ ကန်တော့ကုန်း၊ ညောင်ရိပ်သာ၊ ညောင်ပင်စောက် အစရှိတဲ့ ရပ်ကွက်တွေမှာ စစ်ကားတွေနဲ့ လမ်းတွေ ပိတ်ဆို့ပြီး လူဦးရေ စာရင်း ကောက်ယူရာမှာ အိမ်ထောင်စု စာရင်း မူရင်းတွေ တောင်းယူသွားတာလို့ သိရပါတယ်။
“စစ်ကား ၇ စီး၊ ၈ စီးလောက်ပေါ့။ စစ်သားတွေက လိုက်ကောက်တယ်။ သန်းခေါင်စာရင်း မူရင်း တွေကို သူတို့ဆီမှာ ရောက်သွားပြီ ဆိုရင် ငါးသောင်းနဲ့ ပြန်ရွေးခိုင်းတယ်။ မနေ့က ရှေ့ရပ်ကွက်မှာ အဲ့လိုလုပ်တယ် ကြားတော့ မိတ္တူသွားဆွဲတာ မိတ္တူဆွဲရလွန်းလို့ စက်တောင် ပျက်တယ်လို့ ဆိုင်ကပြောတယ်” လို့ မုံရွာ ဒေသခံ တစ်ဦးက ပြောပါတယ်။
မုံရွာမြို့ပေါ်မှာ အခုလ ပထမပတ်က စပြီး စစ်ကားတွေနဲ့ လုံခြုံရေး အများအပြား အသုံးပြုကာ လူဦးရေ စာရင်း ကောက်နေတာဖြစ်ပြီး အဲ့ဒီလို စာရင်း ကောက်နေတဲ့ အဖွဲ့တွေကို ဒေသခံ တော်လှန်ရေး အင်အားစုတွေက ပြောက်ကျားစနစ်နဲ့ တိုက်ခိုက် နေတာတွေလည်း ရှိနေပါတယ်။
လူဦးရေ စာရင်း စတင်ကောက်ယူတဲ့ ဇန်နဝါရီ ၉ ရက်ကနေ ၁၃ ရက်နေ့ အတွင်း တစ်နိုင်ငံလုံး အတိုင်းအတာနဲ့ ၇ ကြိမ် တိုက်ခိုက်ခံခဲ့ရပြီး ၄ ဦးထက်မနည်း သေဆုံးခဲ့တယ်လို့ ဇန်နဝါရီ ၁၄ ရက်နေ့မှာ စစ်ကောင်စီက ထုတ်ပြန်ထားပါတယ်။
NUG အစိုးရကတော့ စစ်ကောင်စီရဲ့ အတုအယောင် ရွေးကောက်ပွဲအတွက် လူဦးရေ စာရင်းကောက်ယူရာမှာ ပြည်သူတွေ အနေနဲ့ မပူးပေါင်းဖို့နဲ့ စစ်ကိုင်းတိုင်းမှာ လူဦးရေ စာရင်းကောက်စဉ် ဖမ်းမိထားတဲ့ ထွေအုပ်ဝန်ထမ်း ၄ ဦးကိုလည်း အရေးယူသွားမယ်လို့ ထုတ်ပြန်ထားပါတယ်။
MK – 009
