မဲခေါင်၊ ဇူလိုင် ၁၅
ထိုင်းနိုင်ငံဘက်တွင် မဲခေါင်မြစ်တစ်လျှောက်ရှိ စက်သုံးဆီမှောင်ခိုသင်္ဘောများကို တင်းကြပ်စွာ စစ်ဆေးဖော်ထုတ်နေချိန်၌ ရှမ်းပြည်အရှေ့ပိုင်းဒေသသို့ စက်သုံးဆီတင်သွင်းမှု လျော့နည်းသွားသဖြင့် ဒေသတွင်းရှိ စက်သုံးဆီများကို အကန့်အသတ်ဖြင့်သာ ယာယီခွဲတမ်းစနစ်ဖြင့် ရောင်းချပေးသွားမည်ဖြစ်ကြောင်း စက်သုံးဆီလုပ်ငန်းရှင်များအသင်းက အသိပေးထုတ်ပြန်သည်။
ယနေ့ ဇူလိုင် ၁၅ ရက်နေ့မှ စတင်ကာ နေ့စဉ် နံနက် ၇ နာရီမှ နေ့လယ် ၁၂ နာရီအထိသာ ဆီဆိုင်များကို ဖွင့်လှစ်ရောင်းချပေးမည်ဖြစ်ပြီး သတ်မှတ်ထားသည့် အချိန်ကာလအတွင်း မော်တော်ယာဉ်တစ်စီးလျှင် ထိုင်းဘတ်ငွေ ၅၀၀ ဖိုး၊ သုံးဘီးဆိုင်ကယ်တစ်စီးလျှင် ဘတ် ၁၀၀ ဖိုးနှင့် မော်တော်ဆိုင်ကယ်တစ်စီးလျှင် ဘတ် ၅၀ ဖိုးအထိသာ ယာယီကန့်သတ်၍ အချိုးကျ ရောင်းချပေးသွားမည်ဖြစ်ကြောင်း သိရသည်။
လက်ရှိတွင် ထိုင်းနိုင်ငံဘက်မှ ဒေသတွင်းသို့ တင်သွင်းနေသည့် စက်သုံးဆီ သယ်ယူပို့ဆောင်ရေးလမ်းကြောင်းတွင် ယာယီအခက်အခဲများ ဖြစ်ပေါ်နေသောကြောင့် စက်သုံးဆီပြတ်လပ်မှုကို ကာကွယ်ရန်အတွက် ဆိုင်များ၌ လက်ကျန်ရှိသော စက်သုံးဆီများကို ယခုကဲ့သို့ အကန့်အသတ်ဖြင့်သာ ရောင်းချရခြင်းဖြစ်သည်ဟု စက်သုံးဆီအသင်းက ဆိုသည်။
ယခုကဲ့သို့ စစ်ဆေးမှုများ တင်းကြပ်လာရသည့် ပြဿနာမှာ လာအိုနိုင်ငံသို့ ပို့ဆောင်မည်ဟု အကောက်ခွန်ကြေညာထားသည့် စက်သုံးဆီတင်သင်္ဘောအချို့သည် ကုန်းလမ်း၊ ရေလမ်းကြောင်းများမှတစ်ဆင့် မြန်မာနိုင်ငံဘက်သို့ လမ်းကြောင်းလွှဲကာ တရားမဝင် ခိုးသွင်းမှောင်ခိုပြုလုပ်နေသည်ကို ထိုင်းအာဏာပိုင်များက ဖော်ထုတ်တွေ့ရှိခဲ့ခြင်းကြောင့် ဖြစ်ကြောင်း သတင်းရင်းမြစ်များထံမှ သိရသည်။
ထိုင်းရဲတပ်ဖွဲ့သည် ယင်းဆီမှောင်ခိုကွန်ရက်ကို တစ်နှစ်နီးပါးကြာ အချိန်ယူစုံစမ်းခဲ့ခြင်းဖြစ်ပြီး လက်ရှိတွင် မှောင်ခိုသင်္ဘောတစ်စီးချင်းစီ၏ အချက်အလက်များနှင့် ပိုင်ရှင်များကို စိစစ်နေကြောင်း၊ သတင်းအချက်အလက်များအရ မှောင်ခိုသင်္ဘောတစ်စီးလျှင် စက်သုံးဆီ လီတာ ၄ သိန်းခန့်အထိ တင်ဆောင်နိုင်ပြီး ယခုကာလအတွင်း မြန်မာနိုင်ငံဘက်သို့ တရားမဝင် ခိုးသွင်းခဲ့သည့် စက်သုံးဆီပမာဏစုစုပေါင်းမှာ လီတာ ၁၀ သန်းနီးပါးအထိ ရှိနိုင်ကြောင်း ထိုင်းအာဏာပိုင်များက တွက်ဆထားသည်။
ထိုင်းနိုင်ငံသည် ပြီးခဲ့သည့် ၂၀၂၅ ခုနှစ်အတွင်းက ကျားဖြန့်လုပ်ငန်း တိုက်ဖျက်ရန် အကြောင်းပြချက်ဖြင့် မြန်မာနိုင်ငံ၊ ရှမ်းပြည်အရှေ့ပိုင်းသို့ စက်သုံးဆီနှင့်လျှပ်စစ်မီး ရောင်းချမှုကို ပိတ်ပင်ခဲ့ခြင်းဖြစ်သည်။
ထိုင်းနိုင်ငံဘက်က ဆီမှောင်ခိုဂိုဏ်းများကို ပိုမိုတင်းကြပ်စွာ စစ်ဆေးလျက်ရှိပြီး မြန်မာနိုင်ငံဘက်သို့ စက်သုံးဆီတင်ပို့မှုကို ယာယီပိတ်ပင်ကန့်သတ်ထားသည့် အကျိုးဆက်ကြောင့် လက်ရှိတွင် ရှမ်းပြည်အရှေ့ပိုင်းရှိ မြို့အချို့၌ စက်သုံးဆီဈေးနှုန်းများ မြင့်တက်လာခြင်း၊ ဆီဆိုင်အများအပြား ပိတ်ထားရခြင်းများနှင့် ကြုံတွေ့နေရသည်။
ယင်းသို့ ဆီဝယ်ယူရန် ခက်ခဲနေမှုများကြောင့် ဒေသတွင်း မိုးရာသီ စိုက်ပျိုးရေးလုပ်ငန်းခွင်များ၊ ကုန်စည်သယ်ယူပို့ဆောင်ရေးနှင့် ခရီးသွားလာမှုများအပြင် မြို့ပြကုန်ထုတ်လုပ်မှု ကဏ္ဍတစ်ခုလုံးတွင်ပါ ထိခိုက်မှုများနှင့် ရင်ဆိုင်ရနိုင်ကြောင်း သိရသည်။
#MeKongNews
#ရှမ်းအရှေ့
#တာချီလိတ်
#စက်သုံးဆီ
#ထိုင်းနိုင်ငံ
