မဲခေါင်၊ ဇွန် ၂၇

ဩစတြေးလျနိုင်ငံသား အမျိုးသားတစ်ဦးသည် ပတ္တယားမြို့တွင် အသက် ၁၇ နှစ်အရွယ် မိန်းကလေးတစ်ဦးကို သတ်ဖြတ်ပြီးနောက် အလောင်းကို ခရီးဆောင်သေတ္တာအတွင်း ထည့်ကာ မီးရထားလမ်းဘေးတွင် စွန့်ပစ်ခဲ့ကြောင်း ဝန်ခံခဲ့သည်ဟု ထိုင်းရဲတပ်ဖွဲ့က ပြောကြားသည်။

ယနေ့ ဇွန် ၂၇၊ နံနက် ၉ နာရီတွင် ပတ္တယားမြို့ ရဲစခန်းမှ စုံစမ်းစစ်ဆေးရေးအရာရှိများသည် အသက် ၄၆ နှစ်အရွယ် ဩစတြေးလျနိုင်ငံသား ဆိုင်မွန်ပီတာကားမန်းကို ထပ်မံ စစ်ဆေးမေးမြန်းရန် ခေါ်ဆောင်လာခဲ့သည်။

၎င်းမှာ ကလာစင်ပြည်နယ်မှ အသက် ၁၇ နှစ်အရွယ် ထန်ချနော့ဒွန်ဟွမ်လော ဆိုသူမိန်းကလေး သေဆုံးမှုနှင့် ဆက်စပ်၍ ဖမ်းဆီးခံထားရသူဖြစ်သည်။

သေဆုံးသူ၏ အလောင်းကို ပတ္တယားမြို့၊ ခေါင်မာခေါ့ဒေသရှိ မီးရထားလမ်းဘေး မြက်ခင်းထဲတွင် စွန့်ပစ်ထားသော ခရီးဆောင်သေတ္တာအတွင်းမှ တွေ့ရှိရပြီး ယင်းနေရာသည် အမှုဖြစ်ပွားခဲ့သည်ဟု ယူဆရသော ဂျွန်တီယမ်လမ်းရှိ ကွန်ဒိုမှ ၄ ဒသမ ၂ ကီလိုမီတာခန့် ဝေးကွာသည်။

ရဲတပ်ဖွဲ့၏ ပြောကြားချက်အရ သံသယရှိသူသည် အခင်းဖြစ်ပွားရာမှ ထွက်ပြေးခဲ့ပြီး သုဝဏ္ဏဘိူလေဆိပ် မှတစ်ဆင့် ထိုင်းနိုင်ငံမှ ထွက်ပြေးရန် ကြိုးပမ်းခဲ့သော်လည်း မထွက်ခွာမီ ဖမ်းဆီးထိန်းသိမ်းခံခဲ့ရသည်။

ထိုမတိုင်မီ ပတ္တယားခရိုင်တရားရုံးက အသက် ၁၈ နှစ်အောက် အရွယ်မရောက်သေးသူကို မိဘအုပ်ထိန်းမှုမှ မဖွယ်မရာ ရည်ရွယ်ချက်ဖြင့် ခေါ်ဆောင်မှု စွဲချက်ဖြင့် ဖမ်းဝရမ်း ထုတ်ထားခဲ့သည်။

သံသယရှိသူ၏ ထွက်ဆိုချက်အရ မိန်းကလေးက ငွေပိုတောင်းရာမှ စကားများရန်ဖြစ်ခဲ့သည်ဟု ဆိုသည်။

ထို့နောက် မိန်းကလေးက ဓားတစ်ချောင်းထုတ်ကာ ၎င်း၏လည်ပင်းကို ထောက်ခဲ့သဖြင့် လုယက်ရုန်းကန်မှု ဖြစ်ပွားခဲ့ကြောင်း၊ ယင်းအချိန်တွင် မိန်းကလေး၏ ဓားကိုင်ထားသည့်လက်ကို ဖမ်းချုပ်ရင်း လည်ပင်းညှစ်မိခဲ့သည်ဟု ၎င်းက အခိုင်အမာ ပြောဆိုခဲ့သည်။

ထိုရုန်းကန်မှုအတွင်း မိန်းကလေးသည် သတိလစ်သွားခဲ့ပြီး နောက်ပိုင်းတွင် သေဆုံးခဲ့ကြောင်းလည်း ၎င်းက ဆိုသည်။

ထို့နောက် အလောင်းကို ခရီးဆောင်သေတ္တာအတွင်း ထည့်ကာ ရေချိုးခန်းထဲတွင် တစ်ရက်ကျော်ကြာ ထားခဲ့ပြီး နောက်ပိုင်းတွင် ဆိုင်ကယ်ဖြင့် သယ်ဆောင်သွားကာ မီးရထားလမ်းဘေးတွင် စွန့်ပစ်ခဲ့ကြောင်းလည်း ဝန်ခံခဲ့သည်။

ထို့ပြင် သေဆုံးသူ၏ မိသားစုအား ဝမ်းနည်းကြောင်းနှင့် တောင်းပန်ကြောင်း ပြောဆိုခဲ့သော်လည်း၊ သေဆုံးမှုမှာ ရည်ရွယ်ချက်ရှိရှိ သတ်ဖြတ်ခြင်းမဟုတ်ဘဲ မိမိကိုယ်ကို ကာကွယ်ရင်း ဖြစ်ပွားခဲ့ခြင်းဖြစ်ကြောင်း အခိုင်အမာ ပြောကြားခဲ့သည်။

ယနေ့နံနက် ၁၀ နာရီ ၅၀ မိနစ်တွင် ရဲတပ်ဖွဲ့က သံသယရှိသူ၏ လက်ဗွေများ ရယူပြီး ရည်ရွယ်ချက်ရှိရှိ လူသတ်မှု၊ အလောင်းဖျောက်ဖျက်ခြင်း၊ အလောင်းကို ရွှေ့ပြောင်းစွန့်ပစ်ခြင်း၊ အသက် ၁၅ နှစ်အထက် ၁၈ နှစ်အောက် အရွယ်မရောက်သေးသူကို မဖွယ်မရာ ရည်ရွယ်ချက်ဖြင့် ခေါ်ဆောင်မှုနှင့် သက်ဆိုင်သော ပြစ်မှုတို့ဖြင့် စွဲချက်တင်ခဲ့သည်။

ထို့နောက် ၎င်းကို ပတ္တယားခရိုင်တရားရုံးသို့ ပထမအကြိမ် အချုပ်ရမန်ယူရန် ပို့ဆောင်ခဲ့သည်။

Ref:Khaosod
#MeKongNews
#ပတ္တယား
#မိန်းကလေး
#အလောင်း
#ခရီးဆောင်သေတ္တာ
#ဩစတြေးလျနိုင်ငံသား

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)