မဲခေါင်၊ ဇွန် ၂၃
ရှမ်းပြည်တောင်ပိုင်း တောင်ကြီးမြို့နယ် ရွှေညောင်မြို့နှင့်ရပ်စောက်မြို့ကို ဆက်သွယ်ထားသည့် လမ်းမကြီးပေါ်တွင် ရှမ်းပြည်ပြန်လည်ထူထောင်ရေးကောင်စီ – RCSS က ကုန်တင်ကားအချို့ကို အခွန်မဆောင်ဟုဆိုကာ ကားလိုင်စင် ယာဉ်မောင်းလိုင်စင်များကို သိမ်းယူခြင်းများ ပြုလုပ်နေသည်ဟု ကားသမားများက ပြောသည်။
ကုန်တင်ကားကြီးများဖြစ်သည့် ၁၀ ဘီးကားများ၊ တွဲကားများကို RCSS က တစ်နှစ်စာအခွန်အတွက် တစ်စီးလျှင် အခွန် သိန်း၂၀ကျပ်ထိ တောင်းနေပြီး အခွန်မဆောင်သည့် ကားများကို ၎င်းတို့က ကားလိုင်စင်စာအုပ်နှင့် ယာဉ်မောင်းလိုင်စင်များကို သိမ်းသွားခြင်းဖြစ်သည်ဟု ကားသမားများက ပြောသည်။
“ကုန်သည်က အလုံးစုံ တာဝန်မယူရင် ကားသမားတွေအနေနဲ့ မသွားကြပါနဲ့လို့ ပြောချင်တယ်။ ကျနော်ဆို ဘယ်လိုမှ ညှိမရလို့ ယာဉ်မောင်းလိုင်စင်ရော ကားဝီးတက်ရော ယူသွားတယ်ဗျာ။ ပိုက်ဆံ ၅ သိန်းပေးလည်း မရဘူး။ တစ်နှစ်စာပဲ ဆောင်ခိုင်းနေတာ။ မသေချာရင် မသွားကြပါနဲ့ ကျနော်လို မဖြစ်စေချင်လို့ပါ”ဟု ကားသမားတစ်ဦးက ပြောသည်။
၎င်း၏ ပြောဆိုချက်အရ ရပ်စောက်မြို့နယ် ထီးခမ်းကျေးရွာအနီးတွင်ရှိသည့် RCSS တပ်ဖွဲ့သည် ၎င်း၏ ကားကို တားဆီးကာ တစ်နှစ်စာ အခွန် ၂၀ သိန်းဆောင်ခိုင်းရာ ပိုက်ဆံမပါကြောင်း ပြောသော်လည်း လက်မခံပဲ ကားလိုင်စင်နှင့်ယာဉ်မောင်းလိုင်စင်ကို သိမ်းသွားခြင်းဖြစ်သည်။
“၁၈ ရက်တုန်းက ကျနော့်ကားကို ဆိုင်ကယ်နဲ့ လိုက်လာပြီး တားတယ်။ သေနတ်တွေနဲ့ ချိန်ပြီး လိုင်စင်တွေကို ယူသွားတာ။ တနှစ်စာ အခွန်သိန်း၂၀ ဆောင်ထားတဲ့ စာရွက်မပြနိုင်လို့တဲ့ လူတောင်ကံကောင်းလို့ လွတ်လာတာဗျာ”ဟု ကိုယ်တွေ့ကြုံရသူတစ်ဦးက ပြောသည်။
ရွှေညောင် – ရပ်စောက်ကားလမ်းသည် ရှမ်းတောင်နှင့် ရှမ်းမြောက်ကို ဆက်သွယ်ထားသည့် လမ်းကြောင်းပေါ်တွင် တည်ရှိသဖြင့် ကုန်တင်ကားများ အသွားအလာများသည့် လမ်းဖြစ်သည်။
ယင်းလမ်းပေါ်တွင် စစ်ကောင်စီတပ်၊ PNO ပြည်သူ့စစ်တပ်၊ RCSS နှင့် SSPP တပ်ဖွဲ့များက အပိုင်းလိုက် တည်ရှိပြီး ကုန်သည်များ၊ ကားသမားများအားလုံးသည် အဖွဲ့အားလုံးကို အခွန်ပေးနေရသည်။
#MeKongNews
#ရွှေညောင်
#ရပ်စောက်
#ကုန်ကား
#ယာဉ်မောင်းလိုင်စင်
#RCSS
