မဲခေါင်၊ ဇွန် ၂၃
ရှမ်းပြည်တောင်ပိုင်း၊ ပင်လောင်းမြို့နယ်ရှိ တီကျစ်နဂါးဘိလပ်မြေစက်ရုံတွင် ဝန်ထမ်းများ၏ လစာနှင့် ထောက်ပံ့ကြေးများကို စီမံခန့်ခွဲမှုအပိုင်းမှ ခေါင်းပုံဖြတ်မှုများ ရှိနေကြောင်း ဝန်ထမ်းအချို့က ပြောဆိုကြသည်။
စက်ရုံတာဝန်ရှိသူများက ဧပြီ ၁ ရက်မှ စတင်ကာ လစာနှင့် ထောက်ပံ့ကြေး တစ်သိန်းကျပ်၊ စားစရိတ်ထောက်ပံ့ကြေး ၉ သောင်းကျပ် စုစုပေါင်း ကျပ် ၁၉၀,၀၀၀ ကို တိုးမြှင့်ပေးထားကြောင်း အသိပေးခဲ့သည်။
သို့သော် ဝန်ထမ်းများ၏ ပြောကြားချက်အရ တိုးမြှင့်ပေးထားသည်ဟု ကြေညာထားသည့် ပမာဏများကို အပြည့်အဝ မရရှိကြဘဲ လစာထုတ်ပေးရာတွင် ဖြတ်တောက်မှုများနှင့် မရှင်းလင်းသည့် စီမံခန့်ခွဲမှုများ ရှိနေကြောင်း သိရသည်။
“စာရွက်ပေါ်မှာ တိုးပေးထားတယ်လို့ ပြောပေမယ့် လက်ထဲရောက်တဲ့ ပမာဏက မပြည့်ဘူး။ ဘယ်လိုတွက်ချက်ပြီး ဖြတ်တောက်တယ်ဆိုတာလည်း ရှင်းရှင်းလင်းလင်း မသိရဘူး” ဟု စက်ရုံဝန်ထမ်းတစ်ဦးက မဲခေါင်သို့ ပြောသည်။
ဝန်ထမ်းများ၏ ပြောကြားချက်အရ အခြေခံလစာမှာ ကျပ် ၂၀၅,၀၀၀၊ စားစရိတ် ကျပ် ၉၀,၀၀၀ နှင့် ရက်မှန်ထောက်ပံ့ကြေး ကျပ် ၁၄၀,၀၀၀ အပါအဝင် စုစုပေါင်း ကျပ် ၄၃၅,၀၀၀ ရရှိရမည်ဖြစ်သော်လည်း ကျွမ်း ၁၊ ကျွမ်း ၂၊ ကျွမ်း ၃ အဆင့်အားလုံးတွင် ကျပ် ၃ သောင်းခန့် လျော့နည်း၍သာ ရရှိနေကြောင်း ဆိုသည်။
ထို့ပြင် သာရေး၊ နာရေးကိစ္စများအတွက် ခွင့်တင်ရာတွင်လည်း ခွင့်တစ်ရက်လျှင် လစာမဲ့ခွင့်အဖြစ် ကျပ် ၅၀,၀၀၀ ကျော်အထိ ဖြတ်တောက်ခံရကြောင်း၊ ယင်းဖြတ်တောက်မှုများအတွက် ရှင်းလင်းသည့် အကြောင်းပြချက် မရရှိသေးကြောင်း ဝန်ထမ်းများက ပြောသည်။
ထို့ပြင် အချို့ဝန်ထမ်းများမှာ အိမ်မှ စက်ရုံသို့ နေ့စဉ် လာရောက်အလုပ်ဆင်းရာတွင် ဆိုင်ကယ်ဆီဖိုး တစ်ရက်လျှင် ကျပ် ၅,၀၀၀ ခန့် ကုန်ကျနေသဖြင့် လက်ရှိရရှိနေသည့် ဝင်ငွေနှင့် စားဝတ်နေရေးကို ထိခိုက်လာကြောင်းလည်း ဆိုသည်။
“လစာတိုးပေးထားတယ် ဆိုပေမယ့် လက်တွေ့မှာတော့ ဝန်ထမ်းတွေ အပြည့်အဝ မခံစားရဘူး။ အခြေခံလစာ၊ စားစရိတ်နဲ့ ရက်မှန်ကြေးပေါင်းရင် ရသင့်တဲ့ ပမာဏထက် လစဉ် သုံးသောင်းလောက် လျော့နည်းနေတာကို ဘာကြောင့်လဲဆိုတာ တာဝန်ရှိသူတွေက ရှင်းပြပေးစေချင်ပါတယ်။ သာရေး၊ နာရေးအတွက် ခွင့်ယူရင်လည်း တစ်ရက်ကို ငါးသောင်းကျော်အထိ ဖြတ်တောက်ခံနေရတာကြောင့် ဝန်ထမ်းတွေအတွက် ပိုပြီး အခက်အခဲဖြစ်လာနေပါတယ်” ဟု စက်ရုံဝန်ထမ်းတစ်ဦးက ပြောသည်။
ယခုလို လစာနှင့် ထောက်ပံ့ကြေးများအပေါ် ခေါင်းပုံဖြတ်မှုများ ရှိနေခြင်းနှင့် ပတ်သက်၍ သက်ဆိုင်ရာ တာဝန်ရှိသူများထံမှ ရှင်းလင်းချက်များ လိုအပ်နေကြောင်း စက်ရုံဝန်ထမ်းများက တောင်းဆိုထားသည်။
#MeKongNews
#ပင်လောင်း
#တီကျစ်နဂါးဘိလပ်မြေစက်ရုံ
#လစာ
#ဖြတ်တောက်
