မဲခေါင်၊ ဇွန် ၁၇
ရှမ်းပြည်အရှေ့ပိုင်း၊ မိုင်းတုံမြို့နယ်တွင် ခနောက်စိမ်းတူးဖော်ခွင့် အကြောင်းပြကာ တရားမဝင် ရွှေခိုးတူးနေသည့် နေရာတစ်ခုကို စစ်ကောင်စီ၏ ရှမ်းပြည် သစ်တောနှင့် သယံဇာတဝန်ကြီး ဦးစိုင်းလှိုင်းဝမ်းတစ်က ယမန်နေ့တွင် အဖွဲ့စုံဖြင့် လာရောက် ဖမ်းဆီးခဲ့ပြီးနောက် လုပ်ကွက်တွင် ရှယ်ယာပါဝင်သည့် စစ်ကောင်စီဗျူဟာမှူး၏ PSO ဉာဏ်လင်းထွန်းက ဒေသခံများကို သတ်ဖြတ်မည်ဟု ခြိမ်းခြောက်နေကြောင်း စုံစမ်းသိရှိရသည်။
ထို့ပြင် လုပ်ကွက်ပိုင်ရှင်ဖြစ်သူ ကျေးရွာအုပ်ချုပ်ရေးမှူး ကျော်ဇင်လတ်(ခ)သားကြီးလင်မယားမှာ တောင်ကြီးမြို့သို့ ထွက်ပြေး တိမ်းရှောင်သွားကြောင်းလည်း စုံစမ်း သိရသည်။
“သားကြီးကတော့ ရှောင်နေတယ်။ တောင်ကြီးကိုရောက်သွားတယ်။ ဗျူဟာမှူးရဲ့ PSO ကတော့ ဘက်ဟိုးမောင်းသမားကိုရော ဆဲနေတယ်။ အခုလည်း ရွာမှာ PSO နဲ့ စစ်သားတွေက တအားသောင်းကျန်းနေတယ်။ ဒီသတင်းကို ပေးတဲ့လူကို အရေးယူမယ်ဆိုပြီး ဆဲဆိုသောင်းကျန်းနေတယ်။ သူတို့မထင်တဲ့လူ မသင်္ကာတဲ့လူကို လိုက်ဆဲပြီး ဖမ်းမယ်ဆီးမယ် လုပ်နေတယ်”ဟု သတင်းရင်းမြစ်တစ်ဦးက ပြောသည်။
ထို့ပြင် စစ်ကောင်စီတပ်ဖွဲ့ဝင်များသည် တောထဲသွားသည့် မည်သည့်ရွာသားကိုမဆို ဖမ်းဆီးမည်ဟု ခြိမ်းခြောက်မှုများ လုပ်ဆောင်နေကြသည်။
“ရွာသားတွေက သစ်ခွပင်လေးတွေ လိုက်ခူးပြီး ရောင်းတာရှိတယ်။ အဲဒီဟာတွေကို ဖမ်းမယ်ဆီးမယ်ဆိုပြီး တရွာလုံးကို ခြိမ်းခြောက်နေကြတယ်။အခုဆို ရွာသားတွေက ဘာမှလုပ်လို့မရတော့ဘူး တအားကြီး ခြိမ်းခြောက်ထားကြတယ်။ သတ်မယ် ဖြတ်မယ် ခြိမ်းခြောက်ထားတော့ ရွာသားတွေလည်း ဘာမှလုပ်စားလို့မရ အပြင်မထွက်ရဲတော့ဘူး”ဟု နောက်ထပ်ပြည်သူတစ်ဦးက ပြောသည်။
ယမန်နေ့ ဇွန် ၁၆ ရက် ညနေ ၄ နာရီဝန်းကျင်တွင် စစ်ကောင်စီ ရှမ်းပြည်အစိုးရအဖွဲ့၏ သစ်တောနှင့် သယံဇာတဝန်ကြီး ဦးစိုင်းလှိုင်းဝမ်းတစ်သည် တာချီလိတ်မြို့မှ ဌာနစုံပူးပေါင်းအဖွဲ့နှင့်အတူ မိုင်းတုံ – မိုင်းဆတ်သွား ကားလမ်းမပေါ်ရှိ ၁၁ မိုင်ကျေးရွာ အနောက်ဘက်တွင် တရားမဝင် ရွှေခိုးတူးနေသည့် လုပ်ကွက်အတွင်းသို့ ရုတ်တရက် ဝင်ရောက်စီးနင်း ဖမ်းဆီးခဲ့ခြင်း ဖြစ်သည်။
“မနေ့ကလည်း ဗျူဟာမှူးနဲ့ PSO က လုပ်ကွက်မရှိတဲ့နေရာကို ဝန်ကြီးကို လိမ်ခေါ်သွားတာ။ ဒါပေမယ့် ခေါ်သွားတဲ့အချိန်မှာ သူတို့အချင်းချင်း ဖုန်းအဆက်အသွယ်မရတော့ သူတို့ခေါ်သွားတဲ့ နေရာကလည်း ရွှေခိုးတူးနေတဲ့ နေရာဖြစ်သွားတာ ရောက်သွားတဲ့အချိန် ဘက်ဟိုးနဲ့ လုပ်နေတာနဲ့ကို တိုးသွားတာ”ဟု ဖြစ်စဉ်ကို သိရှိသူတစ်ဦးက ပြောသည်။
ယင်းလုပ်ကွက်မှာ “ရွှေလားဟူ” ကုမ္ပဏီအမည်ဖြင့် ပိုင်ရှင်ဖြစ်သူ ကျော်ဇင်လတ် (ခ) သားကြီး က ခနောက်စိမ်းတူးဖော်ရန် အကြောင်းပြ၍ ရွှေခိုးတူးနေသည့် နေရာဖြစ်သည်။
ယင်းစီးနင်းမှုအတွင်း တရားမဝင် ရွှေချက်ကန်များ၊ ခုတ်လှဲထားသည့် သစ်တန်ပေါင်းများစွာနှင့် ဘက်ဟိုး (မြေတူးစက်) များကို သက်သေခံအထောက်အထားများနှင့်အတူ ဖမ်းဆီးရမိခဲ့ကြောင်း သိရသည်။
“အခု ဘတ်ဟိုး ၃ စီးလုံးကို အခုလုပ်နေတဲ့ နမ့်မွန်းချောင်းအပေါ် လွယ်ရိုးကျေးရွာမှာ သွားဖွက်ထားပြီ။လူနေတဲ့တွေနဲ့ ရွှေကူးရာမှာ အသုံံးပြုတဲ့ အရာအားလုံးကို တစ်ညလုံးမြေမှာ တူးမြှုပ်ကုန်ပြီ။လက်စ အားလုံးကို PSO ညဏ်လင်းထွန်းက တစ်ညလုံးအပြီး ဖျောက်ခိုင်းပါတယ်” အခြားသတင်းရင်းမြစ်တစ်ဦးက ဆိုသည်။
လုပ်ကွက်ပိုင်ရှင် ကျော်ဇင်လတ် ဆိုသူမှာ လွယ်ခမ်းလုံကျေးရွာအုပ်စု၏ ကျေးရွာအုပ်ချုပ်ရေးမှူး ဖြစ်သည့်အပြင် ဒေသခံ ပြည်သူ့စစ်ခေါင်းဆောင်တစ်ဦးလည်း ဖြစ်သည်။
၎င်းသည် လက်ရှိတွင် “ဝတီရတနာ” ကုမ္ပဏီအမည်ကိုပါ အသုံးပြု၍ မိုင်းတုံမြို့နယ်၊ လွယ်ခမ်းလုံအုပ်စု၊ နောင်လဲကျေးရွာရှိ နမ့်မွန်းချောင်းအတွင်း၌လည်း ခနောက်စိမ်းအကြောင်းပြကာ တရားမဝင် ရွှေတူးဖော်မှုများ ဆက်တိုက် လုပ်ကိုင်နေကြောင်း ဒေသခံများက ဆိုသည်။
“နောင်လဲရွာကို ဝန်ကြီးက ဒီနေ့သွားမယ်လုပ်တော့ သူတို့က လမ်းမကောင်းဘူးဆိုပြီး အချိန်ဆွဲထားတယ်။ ဝန်ကြီး ဒီနေ့သွားဖြစ်လား မသွားဖြစ်လားမသိရသေးဘူး။ ဒါပေမယ် အဲ့မှာရှိတဲ့ ရွှေခိုးတူးတဲ့နေရာမှာ သုံးတဲ့ ဘက်ဟိုးတွေ စက်ပစ္စည်းတွေကိုတော့ မနေ့ညက သူတို့ရွေ့ကုန်ပြီ။ ဘက်ဟိုး ၃ စီး ၊ မြေသယ်ကား ၂ စီး၊ ဆီဘောက်ဆာကား ၂ စီးနဲ့လုပ်နေကြတာသူတို့က။ PSO ဉာဏ်လင်းထွန်းက အရင်ဗျူဟာမှူး ဦးကျော်ထင်လက်ထက်ကတည်းက နေလာတာ။ နောင်လဲမှာလည်း PSO ကို ရှယ်ယာပေးရတယ်။ ဒါကြောင့် PSO က အချိန်ဆွဲပြီး ကာကွယ်ပေးတာ၊ ဝန်ကြီးက အမှန်ဆို နောင်လဲကို မနေ့က တိုက်ရိုက်လာဖို့ လုပ်တာ၊ အဲဒါ ရှယ်ယာပါတဲ့ PSO ဉာဏ်လင်းထွန်းက ၁၁ မိုင်ဖက်ကို လိမ်ခေါ်သွားတာ၊ လိမ်ခေါ်သွားတဲ့နေရာလည်း ရွှေခိုးတူးတဲ့နေရာဖြစ်ပြန်တော့ မိသွားတာ”ဟု ဖြစ်စဉ်ကိုသိရှိသည့် သတင်းရင်းမြစ်က ပြောသည်။
ထို့ကြောင့် တရားမဝင် ရွှေတူးနေမှုများကို ထိထိရောက်ရောက် အရေးယူရန်လိုပြီး ထိရောက်စွာ အရေးမယူပါက ရွှေတူးဖော်သူများနှင့် စစ်ကောင်စီတပ်များပူးပေါင်းကာ ပြည်သူကို ပိုမိုဖိနှိပ်လာနိုင်သည်ဟု ၎င်းသတင်းရင်းမြစ်က ပြောသည်။
“ဒီတခေါက် ကောင်းကောင်း အရေးမယူဘူးဆို သူတို့ တအားသောင်းကျန်းတော့မှာ အခုတောင် ဟိုလူသတ်မယ် ဒီလူသတ်မယ် ခြိမ်းခြောက်နေကြတာ။ ရွာသားတွေလည်း ကြောက်နေကြရတာ အပြင်တောင် မထွက်ရဲတော့ဘူး၊ ရွာသားတွေအကုန်လုံးက ထွက်ပြေးချင်နေကြပြီ။ ထွက်ပြေးရင်လည်း သူတို့ပြဿနာရှာမှာ ကြောက်လို့ ဒီအတိုင်းငြိမ်နေရတာ”ဟု ၎င်းသတင်းရင်းမြစ်က ပြောသည်။
ယင်းတရားမဝင် ရွှေတူးဖော်မှု၊ ရွှေချက်ကန်များ ပြုလုပ်မှုနှင့် သစ်တောသစ်ပင်များကို စည်းကမ်းမဲ့ ခုတ်လှဲမှုများကြောင့် လမ်းပန်းဆက်သွယ်ရေးများ ပျက်စီးနေသည့်အပြင် နမ့်မွန်းချောင်းရေမှာလည်း ဓာတုဆေးရည်များကြောင့် သုံးစွဲ၍ မရတော့ဘဲ ကျေးရွာများ၏ စိုက်ပျိုးမြေများပါ ပျက်စီးဆုံးရှုံးခဲ့ရသည်။
ထို့ပြင် ရွှေချက်ရာတွင် သုံးစွဲသည့် ပြဒါးနှင့် ဆိုင်ယာနိုက် စသည့် ဓာတုဆေးရည်များ ညစ်ညမ်းမှုကြောင့် ဒေသခံ တိရစ္ဆာန်များတွင်လည်း ရောဂါဆိုးများ ကူးစက်ဖြစ်ပွားနေပြီး ယင်းသဘာဝပတ်ဝန်းကျင် ပျက်စီးမှုဆိုးကျိုးများမှာ မိုင်းတုံမြို့ပေါ်အထိ သက်ရောက်မှု ရှိလာနေကြောင်း စုံစမ်းသိရှိရသည်။
#MeKongNews
#မိုင်းတုံ
#ခနောက်စိမ်း
#ရွှေခိုးတူး
#ပြည်နယ်သယံဇာတဝန်ကြီး
#PSO
