မဲခေါင်၊ မေ ၃၁
တအာင်းအမျိုးသားလွတ်မြောက်ရေးတပ်မတော် (TNLA) ထိန်းချုပ်ထားသည့် ရှမ်းပြည်မြောက်ပိုင်း၊ နမ့်ခမ်းမြို့နယ်၊ ကောင်းတပ်ကျေးရွာအနီးတွင် ယနေ့ မွန်းလွဲ ၁၂ နာရီခွဲခန့်က အလွန်ပြင်းထန်သည့် ပေါက်ကွဲမှုတစ်ခု ဖြစ်ပွားခဲ့ပြီး ထိခိုက်ဒဏ်ရာရရှိသူ များပြားနိုင်ကြောင်း ဒေသခံ သတင်းရင်းမြစ်များထံမှ သိရသည်။
ကောင်းတပ်ရွာသည် နမ့်ခမ်းမြို့နှင့် ကပ်လျက်တည်ရှိသည့် ရွာတစ်ရွာဖြစ်ပြီး ယခုပေါက်ကွဲမှုကြောင့် ဒေသခံပြည်သူအချို့ ထိခိုက်ဒဏ်ရာရရှိမှုများပြားသည့်အပြင်၊ ဝန်းကျင်ရှိ ပြည်သူနေအိမ်အချို့ပါ ပျက်စီးသွားခဲ့ကြောင်း သိရသည်။
“ပေါက်ကွဲမှုက အရမ်းပြင်းထန်တယ်ဗျ။ မြို့ထဲက အိမ်တွေတောင် တုန်ခါသွားတယ်။ ထိခိုက်မှု များပြားနိုင်လို့ အခုအချိန်မှာ ကယ်ဆယ်ရေးအဖွဲ့တွေ ရောက်လာပြီး ဝိုင်းဝန်းလုပ်ဆောင်ပေးနေကြတယ်” ဟု ဒေသခံသတင်းရင်းမြစ်တစ်ခုက ပြောသည်။
ယင်းပေါက်ကွဲမှုဖြစ်ပွားခြင်းကို TNLA ဘက်ကလည်း အတည်ပြု သတင်းထုတ်ပြန်ထားပြီး၊ နောက်ဆက်တွဲဖြစ်စဉ် အသေးစိတ်ကို ဆက်လက်စုံစမ်းစစ်ဆေးနေကြောင်း ပြောဆိုထားသည်။
“ပြည်သူလူထုအနေနဲ့ ဖြစ်စဉ်နဲ့ပတ်သက်ပြီး မလိုအပ်ဘဲ စိုးရိမ်ထိတ်လန့်မှုတွေ မဖြစ်ကြဖို့၊ လူမှုကွန်ရက်ပေါ်က အတည်မပြုနိုင်သေးတဲ့ သတင်းအချက်အလက်တွေကို ထပ်ဆင့်မျှဝေတာမျိုး မလုပ်ကြဘဲ သက်ဆိုင်ရာ တာဝန်ရှိသူတွေရဲ့ တရားဝင်ထုတ်ပြန်ချက်တွေကိုသာ စောင့်ကြည့်ကြဖို့ အသိပေးချင်ပါတယ်” ဟု TNLA က ထုတ်ပြန်ထားသည်။
ထို့ပြင် လက်ရှိတွင် လူမှုကွန်ရက်၌ လေယာဉ်ဖြင့် ဗုံးကြဲခံရခြင်းဖြစ်သည်ဟု ကောလာဟလများ ပျံ့နှံ့နေသော်လည်း၊ ယင်းမှာ မဟုတ်မှန်ဘဲ သတင်းအမှားသာဖြစ်ကြောင်း နမ့်ခမ်းမြို့မှ သတင်းရင်းမြစ်တစ်ခုက အတည်ပြုသည်။
“လေယာဉ်နဲ့ ကြဲတယ်ဆိုတာ သတင်းအမှားပါ။ ပေါက်ကွဲမှုအစစ်အမှန် ဖြစ်ပွားခဲ့တာပါ။ ယမ်းတွေ သိုလှောင်ထားတဲ့နေရာ ပေါက်ကွဲတာဖြစ်မယ်လို့ ထင်တယ်။ ပေါက်ကွဲတဲ့အသံက ဘယ်လောက်တောင် ကျယ်လဲဆိုရင် မူဆယ်မြို့ကနေတောင် ကြားရတယ်လို့ ဟိုဘက်က မိတ်ဆွေတွေက လှမ်းပြောလာကြတယ်” ဟု ၎င်းက ဆိုသည်။
ယခုဖြစ်ပွားခဲ့သည့် ပေါက်ကွဲမှုနှင့်ပတ်သက်ပြီး မြေပြင်စုံစမ်းစစ်ဆေးမှုများ ပြီးစီးပါက တွေ့ရှိချက်များကို ဆက်လက်ထုတ်ပြန်ပေးသွားမည်ဟု TNLA ဘက်က ပြောကြားထားသည်။
#MeKongNews
#နမ့်ခမ်း
#ကောင်းတပ်ရွာ
#ပေါက်ကွဲမှု
#လက်နက်တိုက်
