မဲခေါင်၊ မေ ၂၁
ပင်းတယတွင် စလော့ဂိမ်းစွဲနေသည့် မူလတန်းပြ ကျောင်းဆရာမတစ်ဦးက လုယက်မှု ကျူးလွန်ခဲ့ရာမှ ဓားဖြင့်ထိုးသဖြင့် သားအမိနှစ်ဦး သေဆုံးခဲ့ကြောင်း ဒေသခံများထံမှ သိရသည်။
ပြီးခဲ့သည့် မေ ၁၉ ရက်၊ ညပိုင်းတွင် ရှမ်းပြည်တောင်ပိုင်း၊ ပင်းတယမြို့နယ်၊ ကျားကုန်းအုပ်စု၊ ဘုရားဖြူ ( အ.မ.က) ကျောင်းမှ မူလတန်းပြကျောင်းဆရာ မနုနုထွေးက တစ်ရွာတည်းနေ ဒေါ်မြကြည်၏ အိမ်အတွင်း လုယက်ရန်အကြံအစည်ဖြင့် ကျုးကျော်ဝင်ရောက်ပြီး အိမ်ရှင်သားအမိအား ဓားဖြင့်တိုက်ခိုက်ရန်ပြုခဲ့ခြင်း ဖြစ် ကြောင်း သိရသည်။
ထိုစဉ် အော်ဟစ်သံများကြားသဖြင့် အိမ်ရှင်၏ ဆွေမျိုးများက လာရောက်ခဲ့ရာ မနုနုထွေးက ဓားဖြင့်တိုက်ခိုက် မှုကြောင့် အိမ်ရှင်ဒေါ်မြကြည်တွင် ဝဲဘက်ဝမ်းဗိုက်အောက်ခြေ ထိုးသွင်းဒဏ်ရာတစ်ချက်ရရှိကာ လဲကျနေပြီး သမီးဖြစ်သူ အသက် ၁၉ နှစ်အရွယ် မီးအို(ခ) စန်းစန်းအေးမှာ ညာဘက်ရင်အောက် ထိုးသွင်းဒဏ်ရာတစ်ချက်၊ ရင်ညွန့်ထိုးသွင်းဒဏ်ရာတစ်ချက်၊ ညာဘက်ပေါင်ရင်း ထိုးသွင်းဒဏ်ရာတစ်ချက်၊ ညာဘက်ပေါင်အလယ် ပြတ်ရှဒဏ်ရာတစ်ချက်တို့ ရရှိထားသည်ကို တွေ့မြင်ကြရပြီး မနုနုထွေးအား ဝိုင်းဝန်းဖမ်းဆီးကာ လက်မှဓားကို လုယူခဲ့ကြရကြောင်း သိရသည်။
“အော်သံကြားလို့ သွားကြည့်တဲ့အချိန်မှာ သားအမိနှစ်ယောက်လုံး သွေးအိုင်ထဲလဲနေတာ တွေ့ရတယ်။ ရွာကလူတွေလည်း အကုန် ထိတ်လန့်သွားကြတယ်” ဟု ဒေသခံတစ်ဦးက ပြောသည်။
ဒဏ်ရာရရှိသူနှစ်ဦးအား မြင်းမူးကျေးရွာ ပရဟိတယာဉ်ဖြင့် ပင်းတယမြို့ ပြည်သူ့ဆေးရုံသို့ အရေးပေါ်ပို့ဆောင်ခဲ့သော်လည်း သားအမိ ၂ ဦးမှာ ယမန်နေ့ မေ ၂၀ ရက် တွင် ရှေ့ဆင့်နောက်ဆင့် သေဆုံးသွားခဲ့ကြောင်း သိရသည်။
“သူက စလော့ဂိမ်းအရမ်းဆော့တယ်လို့ ရွာမှာလည်း သိထားကြတယ်။ ငွေကြေးအခက်အခဲတွေ ရှိနေတယ်လို့လည်း ကြားထားရတယ်။ ဒေါ်မြကြည်တို့အိမ်လည်း မိန်းကလေးနှစ်ယောက်ပဲ နေတော့ အဲ့ဆရာမလည်း တစ်ဦးတည်း ဓားပြဝင်တိုက်ခဲ့တာ ” ဟု ဒေသခံတစ်ဦးက ဆိုသည်။
ထို့နောက် ပြစ်မှုကျူးလွန်သူ မူလတန်းပြဆရာမ မနုနုထွေးအား ပင်းတယရဲစခန်းက စစ်ဆေးခဲ့ရာ ၎င်းသည် အွန်လိုင်းလောင်းကစားဂိမ်းအား အလွန်အကျွံ ကစားသူဖြစ်ပြီး ငွေကြေးလိုအပ်နေသဖြင့် ဒေါ်မြကြည်၏ နေအိမ်တွင် အမျိုးသမီးများသာ နေထိုင်သည်ကို အခွင့်ကောင်းယူ၍ ပစ္စည်းများ ရယူရန် လာရောက်စဉ် ဒေါ်မြကြည်နှင့် မီးအို (ခ) စန်းစန်းအေးတို့မှ ခုခံသဖြင့် ဓားဖြင့်ထိုးခဲ့ခြင်းဖြစ်ကြောင်း စစ်ဆေးပေါ်ပေါက်ခဲ့သည်။
“ဒီဘက်မှာ အွန်လိုင်း လောင်းကစားတာ ထိန်းမနိုင်လောက်အောင ဖြစ်နေတာ။ ခုလို မိန်းမက လူသတ်လုယက်တာသာမကဘူး၊ မိသားစုတွေအထဲလည်း ပြဿနာတွေ ဖြစ်နေကြတာ။ ဒါကို ဘယ်လိုတားမြစ် ထိန်းသိမ်းကြမလဲ”ဟု ဒေသခံတစ်ဦးက မေးခွန်းထုတ်သည်။
လက်ရှိတွင် မနုနုထွေးအား ပင်းတယမြို့မရဲစခန်းတွင် ရာဇသတ်ကြီးပုဒ်မ ၃၀၂၊ ၄၅၈၊ ၃၂၆ တို့ဖြင့် အမှုဖွင့် အရေးယူထားပြီး ပင်းတယမြို့မရဲစခန်းတွင် ဖမ်းဆီးထိန်းသိမ်းထားကြောင်း သိရသည်။
စစ်အာဏာသိမ်းပြီးနောက်ပိုင်း ဓနု ကိုယ်ပိုင်အုပ်ချုပ်ခွင့်ရ ဒေသတွင် မူးယစ်ဆေးဝါးရောင်းဝယ်သုံးစွဲမှုနှင့် လောင်းကစားမှုများ ပိုမိုများပြားလာပြီး ဒေသခံပြည်သူများ အကျင့်စာရိတ္တ ပျက်ပြားကာ ခိုးမှု၊ လုယက်မှုများ မကြာခဏ ဖြစ်ပွားလျှက်ရှိကြောင်း ဒေသခံများထံမှ သိရသည်။
#MeKongNews
#ပင်းတယ
#စလော့ဂိမ်း
#ကျောင်းဆရာမ
#လုယက်မှု
#သေဆုံး
