မဲခေါင်၊ မေ ၁၅
ရှမ်းပြည်တောင်ပိုင်း၊ တောင်ကြီးမြို့တွင် အသက် ၄ နှစ်အရွယ် ကလေးငယ်တစ်ဦးကို မိထွေးဖြစ်သူက သတ်ဖြတ်ပြီး အလောင်းဖျောက်မှု ဖြစ်ပွားခဲ့ကြောင်း သတင်းရင်းမြစ်များထံမှ သိရသည်။
ပြီးခဲ့သည့် မေ ၁၂ ရက်၊ နေ့လယ်ပိုင်းက တောင်ကြီးမြို့ရွှေတောင်ရပ်ကွက်၊ နယ်မြေ (၁) ကျောက်ရေအိုးလမ်းတွင် အိမ်ငှားနေထိုင်သည့်.သန္တာဝေဆိုသူသည် ယောက်ျားဖြစ်သူ ကျော်စိုးဦး အလုပ်သွားနေစဥ် လင်ပါသားဖြစ်သူအသက် ၄ နှစ်အရွယ် ကလေးငယ်အား ထမင်းကျွေးချော့သိပ်ရာ ကလေးက မအိပ်သဖြင့် ငိုယိုနေသည်ကို ဝါးခြမ်းပြားဖြင့် ၃ ချက်ခန့် ရိုက်နှက်ခဲ့ပြီး လည်ပင်းညှစ်ရာမှ သေဆုံးသွားခဲ့ခြင်းဖြစ်ကြောင်း သိရသည်။
ထို့နောက် ကလေးအား မတွေ့၍ ကလေးငယ်အား မွေးစားထားသည့် အိမ်ရှင်အမျိုးသမီးက သန္တာဝေအား မေးမြန်းရာ ၎င်းက ရေရေရာရာ မပြောနိုင်သဖြင့် အိမ်ရှင်က ရွှေတောင်ရပ်ကွက် အုပ်ချုပ်ရေးမှူးရုံးသို့ ပြောပြသဖြင့် အုပ်ချုပ်ရေးမှူးက ကျော်စိုးဦး နှင့် သန္တာဝေတို့ လင်မယား ၂ ဦးအား ရပ်ကွက်ရုံးသို့ ခေါ်ယူမေးမြန်းရာမှ လူသတ်မှု ပေါ်ပေါက်ခဲ့ခြင်း ဖြစ်ကြောင်း သိရသည်။
“ညတွင်းချင်း ရဲကိုဖမ်းပို့တယ်ကြားတယ်၊ မိထွေးက ရက်စက်သလို အဖေအရင်းကပါ သားသမီးအရင်း မဟုတ်သလိုဘဲ၊ ကလေးလေး သနားပါတယ်”ဟု ရွှေတောင်ရပ်ကွက်နေသူတစ်ဦးက ပြောသည်။
သန္တာဝေ၏ ထွက်ဆိုချက်အရ သေဆုံးသွားသည့် ကလေးအလောင်းကို ယောက်ျားမသိစေဘဲ ဖျောက်ဖျက်ရန် ရည်ရွယ်ချက်ဖြင့် ရုပ်အလောင်းအား ဆာလာအိတ်အတွင်း ထည့်ပြီး အိပ်ခန်းအတွင်းရှိ အဝတ်အစား ထည့်သည့် ပလပ်စတစ် ကပုံးထဲသို့ထည့်ကာ ဝှက်ထားကြောင်း ဝန်ခံသည်ဟု သိရသည်။
“ဒီလိုဖြစ်စဉ်မျိုးက အဝေးကပဲ ရုပ်ရှင်မှာဘဲ ကြားဖူးတာ၊ ကိုယ့်မြို့မှာ တကယ်ဖြစ်လာတော့ ယုံတောင်မယုံနိုင်ဘူး။ ခုခေတ်မှာ မကြားဖူးတဲ့ ဖြစ်စဉ်တွေ ဆက်တိုက်ကြားနေရတယ်။ ၄ နှစ်ဆိုတာ ဘာမှမသိသေးတဲ့ အရွယ်ပါ။ ဒီလိုလုပ်တာ တော်တော်လူမဆန်ဘူး။ ထိထိရောက်ရောက် အရေးယူပေးစေချင်တယ်” ဟု မြို့ခံတစ်ဦးက မဲခေါင်သို့ ပြောသည်။
လက်ရှိတွင် ကလေးငယ်အား သတ်ဖြတ်ကာ အလောင်းဖျောက်ရန် ကျူးလွန်သူ မိထွေး သန္တာဝေကို တောင်ကြီးမြို့မရဲစခန်းတွင် ရာဇသတ်ကြီးပုဒ်မ ၃၀၂/၂၀၁ ဖြင့် အမှုဖွင့်ဖမ်းဆီးအရေးယူ လျက်ရှိကြောင်း သိရသည်
တောင်ကြီးမြို့တွင် ပြီးခဲ့သည့် မေ ၄ ရက်ကလည်း Peter ဘားဆိုင်တွင် အလုပ်လုပ်နေသည့် အသက် ၁၆ နှစ်အရွယ် အမျိုးသမီးငယ်တစ်ဦးသည် ဆိုင်ပိုင်ရှင်၏ ထိုးကြိတ်ရိုက်နှက်မှုကြောင့် သေဆုံးသွားသည့် ဖြစ်စဉ်တစ်ခု ဖြစ်ပွားသေးသည်။
#MeKongNews
#တောင်ကြီး
#လင်ပါသား
#မိထွေး
#သတ်ဖြတ်
#အလောင်းဖျောက်
