မဲခေါင်၊ ဧပြီ ၂၅
အာဏာသိမ်းစစ်ခေါင်းဆောင် သမ္မတဦးမင်းအောင်လှိုင်က ဧပြီလ ၂၃ ရက်တွင် စစ်အုပ်ချုပ်ရေးမြို့နယ်များအား ကြေညာရာတွင် ရှမ်းပြည်နယ်မှ ၁၅ မြို့ပါခဲ့ပြီး ယင်းမြို့များအနက် စစ်ကောင်စီရွေးကောက်ပွဲကျင်းပပြီးဖြစ်သည့် သီပေါ နှင့် ကျောက်မဲမြို့နယ်များလည်း ပါဝင်ခဲ့သည်ကို တွေ့ရသည်။
လုံခြုံတည်ငြိမ်ပြီဟုဆိုကာ ရွေးကောက်ပွဲပြုလုပ်ခဲ့ပြီး စစ်ကောင်စီခန့် လွတ်တော်ကိုယ်စားလှယ် ထွက်ပေါ်နေပြီဖြစ်သော်လည်း ရှမ်းပြည်မြောက်ပိုင်းရှိ သီပေါမြို့နယ်နှင့် ကျောက်မဲမြို့နယ်ကို ယခုအခါ လုံခြုံတည်ငြိမ်မှုမရှိဟုဆိုပြန်ကာ စစ်အုပ်ချုပ်ရေးမြို့ထဲတွင် စစ်ကောင်စီက ဆက်လက်ထည့်သွင်းထားခြင်း ဖြစ်သည်။
စစ်ကောင်စီက ရွေးကောက်ပွဲကျင်းပခဲ့သည့် ရွေးကောက်ပွဲတွင် ကျောက်မဲနှင့် သီပေါ၌ ကြံ့ခိုင်ရေးပါတီ-USDPနှင့် ရှမ်းနှင့် တိုင်းရင်းသားများ ဒီမိုကရက်တစ်ပါတီ-SNDPတို့က ဝင်ရောက်ယှဉ်ပြိုင်ကာ အသီးသီးအနိုင်ရရှိပြီး ယခုအခါ စစ်အုပ်ချုပ်ရေးအောက် ဆက်လက်ထည့်သွင်းခံရသည့်အတွက် လွှတ်တော်ကိုယ်စားလှယ်များ၏ အခန်းကဏ္ဍမှာ မေးခွန်းထုတ်စရာဖြစ်လာကြောင်း ဥပဒေရေးရာကျွမ်းကျင်သူတစ်ဦးက ထောက်ပြသည်။
“လွတ်တော်ကိုယ်စားလှယ်ဆိုတာက တရားဥပဒေပြုရေးဖက်ကဆိုတော့ တရားစီရင်ရေး အုပ်ချုပ်ရေးတွေကို တိုက်ရိုက်မလုပ်ဆောင်နိုင်ပေမယ့် သူက ပြည်သူက တိုက်ရိုက်ရွေးရတဲ့ ပြည်သူ့ကိုယ်စားလှယ်ဖြစ်တဲ့အခါကျတော့ ကဏ္ဍအားလုံးနဲ့ ပေါင်းစပ်ညှိနှိုင်းပြီးလုပ်ဆောင်ရတယ်။ အခု စစ်အုပ်ချုပ်ရေးကြေညာလိုက်တော့ စစ်တပ်က တရားစီရင်နဲ့အုပ်ချုပ်ရေးကို စိတ်ကြိုက်လုပ်လို့ရသွားတယ်၊ လွတ်တော်ကိုယ်စားလှယ်ရဲ့ အခန်းက မှေးမှိန်သွားတာပေါ့” ၎င်းက သုံးသပ်သည်။
စစ်ကောင်စီက ၎င်းကိုယ်တိုင် တည်ငြိမ်အေးချမ်းပြီဟုဆိုကာ ရွေးကောက်ပွဲပြုလုပ်ထားသည့် မြို့နယ်များကို စစ်အုပ်ချုပ်ရေးအောက် လက်ဆက်ထည့်သွင်းထားသည်မှာ ရှေ့နောက်မညီသည့် လုပ်ရပ်ဖြစ်ကြောင်း ရှမ်းမြောက်အရေး ကျွမ်းကျင်သူတစ်ဦးက ပြောသည်။
“ရွေးကောက်ပွဲမလုပ်မီနဲ့ ရွေးကောက်ပွဲလုပ်ပြီး အခုအချိန် နှိုင်းယှဉ်ရင် ကျောက်မဲ သီပေါက အခုအချိန်က ရွေးကောက်ပွဲကာလထက်တောင် ပိုပြီးတော့ တည်ငြိမ်နေပြီဖြစ်ပါတယ်။ တည်ငြိမ် အေးချမ်းလို့ ရွေးကောက်ပွဲလုပ်ပြီး အခု ဘာမှ မဖြစ်တော့တဲ့အချိန်ကျမှ မတည်ငြိမ်လို့ဆိုပြီး စစ်အုပ်ချုပ်ရေးထဲထည့်တာကတော့ ဆိုးတာပေါ့”ဟု ၎င်းက ပြောသည်။
ကျောက်မဲမြို့နှင့်သီပေါမြို့ကို ၁၀၂၇ စစ်ဆင်ရေး ဒုတိယပိုင်းတွင် တအာင်းတပ်ဖွဲ့-TNLAက သိမ်းပိုက်ခဲ့ဖူးသော်လည်း စစ်ကောင်စီက ထိုးစစ်ဆင်ကာ ပြန်လည်သိမ်းပိုက်ခဲ့သည်။
စစ်ကောင်စီသည် ၂၀၂၅ခုနှစ်၊ ဇူလိုင်လ ၃၁ရက်က အရေးပေါ်အခြေအနေနှင့် စစ်အုပ်ချုပ်ရေးအမိန့် (၁/၂၀၂၅)တွင် နိုင်ငံတဝှမ်းရှိ မြို့နယ်ပေါင်း ၆၃ မြို့နယ်ကို စစ်အုပ်ချုပ်ရေး ကြေညာခဲ့ပြီး ယင်းကတည်းက ရှမ်းမြောက်မှ ကျောက်မဲမြို့နယ်နှင့် သီပေါမြို့နယ်တို့ ပါဝင်နေခြင်းဖြစ်သည်။
ယင်းအမိန့်ကို စစ်အုပ်ချုပ်ရေးအမိန့် ၃/၂၀၂၅ ဖြင့် ၂၀၂၅ ခုနှစ် အောက်တိုဘာလ ၃၁ရက်တွင် တစ်ကြိမ်၊ စစ်အုပ်ချုပ်ရေးအမိန့် ၁/၂၀၂၆ ကို ၂၀၂၆ ခုနှစ် ဇန်နဝါရီလ ၂၉ရက်တွင် တစ်ကြိမ် ဆက်လက်သက်တမ်းတိုးထားခြင်းဖြစ်သည်။
ယခုအခါ ဧပြီလ ၂၃ရက်တွင် စစ်ကောင်စီ နိုင်ငံတော်သမ္မတရုံးက ဥပဒေကဲ့သို့အာဏာတည်သောအမိန့်အမှတ်၊ ၁/၂၀၂၆နှင့် ၂/၂၀၂၆ ကို ထုတ်ပြန်ကာ မြို့နယ် ၆၀ ကို စစ်အုပ်ချုပ်ရေးကြေညာပြီး ကာကွယ်ရေးဦးစီးချုပ်ရုံးက စစ်အုပ်ချုပ်ရေးအမိန့် ၂/၂၀၂၆ ကို ထုတ်ပြန်ကာ အတည်ပြုပေးခဲ့ခြင်းဖြစ်သည်။
#MeKongNews
#စစ်အုပ်ချုပ်ရေး
#ရှမ်းမြောက်
#သီပေါ
#ကျောက်မဲ
#လွှတ်တော်ကိုယ်စားလှယ်
