မဲခေါင်၊ နိုဝင်ဘာ ၁၀
ယူကရိန်းအထူးစစ်ဆင်ရေး စပိုင်တပ်ဖွဲ့သည် ဒေါ်လာ ၁ ဒသမ ၂၆ ဘီလီယံတန် S-400 လေကြောင်းရန် ကာကွယ်ရေးစနစ်ကြီးကို စျေးပေါသည့် ဒရုန်းဖြင့်သာ တိုက်ခိုက်ဖောက်ခွဲလိုက်နိုင်သည့် ရုပ်သံကို ထုတ်ပြန်ပြသလိုက်သဖြင့် ပူတင်အတွက် ဒေါသထွက်ပေါက်ကွဲစရာ ထပ်ဖြစ်ခဲ့ရသည်။
ယင်းရုပ်သံမှတ်တမ်းတွင် ရှေ့ဒရုန်းတစ်စီး ကြီးမားသည့် ယာဉ်ပေါ်တင်ထားသည့် S-400 လေကြောင်းရန်ကာကွယ်ရေးစနစ်အား အရှိန်ဖြင့်ဝင်ရောက်တိုက်ခိုက်ကာ နောက်ဒရုန်းက မီးလုံးကြီးများအဖြစ် အလုံးစုံပျက်စီးသွားစေသော အသေခံဝင်တိုက်မှုလုပ်ခဲ့သည်ကို မြင်တွေ့ရသည်။
ယူကရိန်းဗဟိုထောက်လှမ်းရေးညွှန်ကြားရေးမှူးရုံး GUR သည် ယင်းစပိုင်စစ်ဆင်ရေးကို ဦးစီးဖော်ဆောင်ခြင်းဖြစ်ကာ ဒရုန်းများတွင် Starlink ထောက်ပံ့ရေးစနစ်နှင့် ယူကရိန်းအထူးစစ်ဆင်ရေး တပ် (SOF) ၏ FP-2 ဒရုန်းကိုသာ ပေါင်းစပ်အသုံးပြုထားခြင်းဖြစ်ရာ S-400 ကိုဖျက်ဆီးရုံသာမက ရုရှား၏ အားကိုးအားထားပြုရာ 92N6E ဘက်စုံရေဒါစနစ်ကြီးကိုပါ ကျော်ဖြတ်နိုင်ခဲ့သည်ဟု ထုတ်ပြန်သွားခဲ့သည်။
ယင်းတန်ဖိုးနည်းဒရုန်းများဖြင့် ရုရှား၏ AORL-1AS နှင့် P-18 Terek ရေဒါစနစ်များကိုလည်း ဖောက်ခွဲဖျက်ဆီးနိုင်ခဲ့ပြီး အထူးစပိုင်တပ်များသည် ရုရှားသိမ်းပိုက်ထားသည့် ခရိုင်းမီးယားနယ်မြေ အတွင်း သပ်လျှို့ဝင်ရောက်ကာ ပိုမိုဝေးကွာသော ရုရှားမဟာဗျူဟာ လက်နက်စနစ်များကို ထိရောက် စွာဖောက်ခွဲဖျက်ဆီးနေနိုင်ခြင်းဖြစ်သည်ဟုလည်း GUR က ထုတ်ပြန်ပြောကြားခဲ့သည်။
ပြီးခဲ့သည့် ရက်ပိုင်းကလည်း ယူကရိန်းဆေးတပ်သည် ရန်သူဇုန်အတွင်း ဒဏ်ရာရကာ ၃၃ ရက်ကြာ ပိတ်မိနေသော စစ်သားတစ်ဦးကို စက်ရုပ်လူကယ်ဆယ်ရေးယာဉ်အား အဝေးထိန်းခလုပ်ဖြင့် ထိန်းချုပ် ကာ မိုင် ၄၀ ခရီးနှင်ပြီး ကယ်ထုတ်နိုင်ခဲ့သည်။
၇ ကြိမ်မြောက်မှ ကယ်ထုတ်နိုင်ခြင်းဖြစ်သော်လည်း ပထမဆုံး စစ်ပွဲများအတွင်း လူကယ်ဆယ်ရေး စက်ရုပ်ယာဉ် တီထွင်အသုံးပြုနိုင်ခြင်းဖြစ်သောကြောင့် ကမ္ဘာက လေးစားရသည့် တီထွင်ဆန်းသစ်မှု ဖြစ်လာခဲ့သည်။
ကိုကလင်း
Ref: Thesun
#MeKongNews
#ရုရှား
#လေကြောင်းရန်ကာကွယ်ရေးစနစ်
#ဒရုန်း
#ရေဒါစနစ်
