မဲခေါင်၊ မေ၂
လားရှိုးမြို့က အ ထွေ ထွေရောဂါကုဆေးရုံကြီး(ခုတင်၅၀၀)ကို ယနေ့ မေလ၂ ရက် နံနက်ပိုင်းတွင် စစ်ကောင်စီက ပြန်လည်ဖွင့်လှစ်ခဲ့ကြောင်း ဒေသခံများထံမှ သိရသည်။
ယနေ့ မေလ ၂ရက် ၊ နံနက် ၉နာရီက ဆေးရုံကြီးကို ပြန်လည်ဖွင့်လှစ်ခဲ့ခြင်းဖြစ်ပြီး ယင်းသို့ ဖွင့်လှစ်နိုင်ရန် ယမန်နေ့ မေလ ၁ရက် ညနေပိုင်းက စစ်ကောင်စီ၏ ဆေးတပ်ဖွဲ့ကားများမှ အထောက်အကူဆေးဝါးနှင့် စက်ပစ္စည်းများတင်ဆောင်လာကာ နေရာချထားကြောင်း လားရှိုးမြို့၊ ရပ်ကွက် ၅ နေသူတစ်ဦး၏ ပြောပြချက်အရ သိရသည်။
ဆေးရုံတွင် မြို့တွင်းရှိလူနာများအား အမြန်ဆုံးလက်ခံနိုင်ရန်ပြင်ဆင်သွားမည်ဟု စစ်ဘက်အရာရှိများကပြောကြောင်း ဆေးရုံဖွင့်ပွဲ သွားရောက်ခဲ့သူတစ်ဦးက မဲခေါင်ကိုပြောသည်။
လာရှိုးဆေးရုံကြီးဖွင့်လှစ်ခြင်းမှာ စစ်ကောင်စီအနေဖြင့် လားရှိုးမြို့ကို ပြန်လည်ဝင်ရောက်လာပြီးနောက် ပထမဆုံး ဌာနဆိုင်ရာ လုပ်ငန်းတစ်ခု ပြန်လည် လည်ပတ်နိုင်ခြင်းဖြစ်ပြီး အခြားဌာနဆိုင်ရာလုပ်ငန်းများကို မလည်ပတ်နိုင်သေးကြောင်း၊ စည်ပင်လုပ်ငန်း မလည်ပတ်နိုင်သေးသည့်အတွက် အမှိုက်များ မသိမ်းနိုင်သေးဘဲ လမ်းဘေးတွင် စုပုံနေသလို ရုပ်အလောင်းများနှင့် စစ်လက်နက်အကြွင်းအကျန်များလည်း ရှင်းလင်းရန် လိုအပ်နေဆဲဖြစ်ကြောင်း မြို့ခံများက ပြောသည်။
အုပ်ချုပ်ရေးပိုင်းတွင်လည်း စစ်တပ်ဘက်က လုံခြုံရေး မပေးနိုင်သေးသလို လုယက်မှု၊ ဓားပြတိုက်မှုများ ပြန်လည်များပြားလာကြောင်း၊ မေလ ၁ရက်က ပညာရေးဝန်ထမ်းများ ပြန်လည်ဝင်ရောက်လာပြီး သန့်ရှင်းရေးနှင့် ကျောင်းများအချိန်မီ ဖွင့်နိုင်ရေး လုပ်ဆောင်နေသည်ကိုတွေ့ရကြောင်း မြို့ခံများကပြောသည်။
“အခုက ရပ်ကွက်တွေ အုပ်ချုပ်ရေးဖွဲ့ဖို့ လုပ်နေပေမယ့် ရှောင်သူ၊ ပြေးသူ၊ ပြန်လာသူတွေနှင့် မငြိမ်သေးဘူး။ စစ်တပ်ကလည်း သူ့လုံခြုံရေးပဲလုပ်နိုင်သေးတယ်။ တပ်မိသားစု အချို့လည်း ပြန်လာနေတာတွေ့ရတယ်။ လေယာဥ်ကွင်းလည်းပြင်ဖို့လုပ်နေတာရှိတယ်။ အထိုင်ကျဖို့တော့လိုဦးမယ်” ဟု လားရှိုးမြို့၊ ရပ်ကွက် ၂ ဒေသခံတစ်ဦးက ပြောသည်။
လားရှိုးဆေးရုံဖွင့်လှစ်ခြင်းသည် စစ်ကောင်စီတပ်များ လားရှိူးမြို့သို့ပြန်လည်ဝင်ရောက်လာပြီးသည့်နောက် ပထမဆုံးဖွင့်လှစ်သည့် ဌာနဆိုင်ရာအဆောက်အဦဖြစ်ပြီး တခြားသောရုံးများလည်ပတ်နိုင်ခြင်းမရှိသေးသည့်အပြင် ရှင်းလင်းရေးလုပ်ငန်းများပင်မပြီးသေးကြောင်းဒေသခံများကဆိုသည်။
လားရှိုးမြို့သည် ယခင်ထက် အနည်းငယ်ခြောက်ကပ်သွားသည်မှအပ ထူးခြားသောပြောင်းလဲမှု တစုံတရာမရှိသေးကြောင်း၊ မြို့နေလူထုအနေဖြင့် ပုံမှန်လည်ပတ်နေပြီး ယခင်ထက်ပိုကောင်းမွန်သည့် ဝန်ဆောင်မှုများ ဖြင့် လားရှိုးမြို့ကြီး အေးချမ်းရန်မျှော်လင့်ကြောင်း ဒေသခံတစ်ဦးက မဲခေါင်ကိုပြောသည်။
ပြန်လည်ဝင်ရောက်လာသည့် စစ်ကောင်စီတပ်များသည် အရှေ့မြောက်တိုင်းစစ်ဌာနချုပ်-ဝန်းကျင်နှင့် အခြေစိုက်တပ်ရင်းဌာနချုပ်ဟောင်းများတွင်ပ ြန်လည်အခြေချ နေထိုင်ကြပြီး သာသနာ့ ၂၅၀၀ တွင်လည်း လုံခြုံရေးယူထားကြောင်း သိရသည်။
စစ်ကောင်စီတပ်မှ လားရှိုးမြို့တွင်း ပြန်လည်ဝင်ရောက်နေထိုင်သော်လည်း ပေါ်ပေါ်ထင်ထင် သွားလာလှုပ်ရှားခြင်း မရှိသေးသည့်အပြင် ပြည်သူလူထုလုံခြုံရေးကိုလည်း ကာကွယ်ပေးနိုင်ခြင်း မရှိသေးကြောင်း လားရှိူးမြို့ ပြန်လည်ထူထောင်ရေးအဖွဲ့ တာဝန်ရှိသူက ဆိုသည်။
လားရှိုးမြို့ကို ၁၀၂၇ စစ်ဆင်ရေး ဒုတိယလှိုင်း ၂၀၂၄ သြဂုတ်လ ၃ ရက်နေ့တွင် MNDAA ဦးဆောင်သော တော်လှန်ရေးတပ်များမှ အပြီးတိုင်သိမ်းပိုက်ခဲ့ပြီး ထိန်းချုပ်ကာလ ၈ လကျော်ကြာခဲ့ကာ ယခုနှစ် ဧပြီလ ၂၁ ရက်နေ့တွင် တရုတ်နိိုင်ငံ၏ နိုင်ငံရေးဖိအားဖြင့် ပြန်လည်ဆုတ်ခွာပေးခဲ့ရသည်။ ယင်းနောက် စစ်ကောင်စီမှ ဧပြီ ၂၂ ရက်နေ့မှ စတင်ကာ မြို့တွင်းသို့ စစ်ကား အစင်းရေ ၂၀၀ နီးပါးဖြင့် ပြန်လည်ဝင်ရောက် နေထိုင်ခဲ့ကြသည်။
မဟာ၊ ဂနိုက်
#MeKongNews
#လားရှိုး
#၁၀၂၇စစ်ဆင်ရေး
#လားရှိုးဆေးရုံကြီး
#စစ်ကောင်စီ
