မဲခေါင်၊ ဇန်နဝါရီ ၈
ရှမ်းပြည်အရှေ့ပိုင်း၊ မိုင်းဆတ်နဲ့လွိုင်လင် စေတီတော်တွေကို မိုင်းဖုန်းဆရာတော် ထီးတော်တင်လှူဖို့ရှိမယ်လို့ ရှမ်းပြည်နယ်အရှေ့ပိုင်း၊ သံဃမဟာနာယက ဥက္ကဌ ဆရာတော်ထံက သိရပါတယ်။
မိုင်းဖုန်းဆရာတော် အရှင်ဉာဏသံဝရဟာ ဝိဇာတမွေးနေ့ပွဲကို ဇန်နဝါရီ ၅ ရက် ပြုလုပ်ပြီးနောက်ပိုင်း စေတီတော်တွေထီးတင်မယ့် အစီအစဉ်ကို တကာ၊ တကာမတွေ ကြိုတင်ကြည်ညိုကုသိုလ်ယူနိုင်အောင် အသိပေး မြွက်ကြားတာလို့ ဆိုပါတယ်။
“မိုင်းဆတ်ကနေ မိုင်းတုံ ပုံပါကျင်ကနေ လွိုင်လင်မှာထီးတင်မယ့်ရက်တွေ ကြိုသိရတာပေါ့၊ တောင်ကြီး၊ မိုင်းကိုင်ဘက်တော့ ခရီးနီးမှသေချာမယ်” လို့ ဆရာတော် အရှင်ဉာဏသီရိက မဲခေါင်ကိုမြွက်ကြားပါတယ်။
လာမယ့် ဇန်နဝါရီ ၁၁ရက်မှာ မိုင်းဆတ်ကိုကြွချီပြီး ၁၂ရက်မှာ ညဏ်တော် ၁၀၈ ပေမြင်တဲ့ စေတီတော်ကြီးကို ထီးတော်၊ ငှက်မြတ်နား၊ စိန်ဖူးတော်တွေ တင်လှူပူဇော်မှာဖြစ်ကာ ဆက်ပြီး မိုင်းတုံ၊ ပုံပါကျင်ဘက်ကို ကြွချီမယ်လို့ ပြောပါတယ်။
အဲ့ဒီကတဆင့် မိုင်းပန်၊ မိုးနဲ၊ လင်းခေး၊ နမ့်စန်၊ လွိုင်လင်ကို ကြွချီပြီး ဇန်နဝါရီ ၁၆ ရက်မှာ လွိုင်လင်မှာစေတီတော်ကို ထီးတော်တင်လှူပူဇော်မယ်လို့ သိရပါတယ်။
ပျံလွန်တော်မူပြီးဖြစ်တဲ့ နဂါးနှစ်ကောင်ဆရာတော် ဓမ္မသီရိမဟာထေရ်နဲ့ မိုင်းဖုန်းဆရာတော်ရဲ့ ပုံတူကြေးရုပ်တုတွေကို အလှူရှင်တွေက သွန်းလောင်းပူဇော်ပွဲကို မနေ့က တက်ရောက်ခဲ့ပြီး ဒီနေ့ (ဇန်နဝါရီ၈) ထိုင်းနိုင်ငံက ချိန်းရှဲန် ဝိန်းကျောင်းကို မိုင်းဖုန်းဆရာတော် ကြွရောက်ကာ တရားချီးမြင့်တော်မူနေတယ်လို့ သိရပါတယ်။
MK-012
#ရှမ်းပြည်အရှေ့ပိုင်း
#မိုင်းဖုန်းဆရာတော်
#မိုင်းဆတ်နဲ့လွိုင်လင်
#စေတီတော်
#ထီးတော်တင်လှူ
