မဲခေါင်၊ အောက်တိုဘာ ၉
ရှမ်းပြည်အရှေ့ပိုင်း၊ မိုင်းဆတ်ခရိုင်နဲ့ မိုင်းတုံခရိုင်တွေမှာ ရေကြီးနစ်မြုပ်ပြီး တစ်လခန့်ကြာတဲ့အထိ လမ်းပန်းဆက်သွယ်ရေး ခက်ခဲနေဆဲဖြစ်တယ်လို့ ဒေသခံတွေထံက သိရပါတယ်။
ပြီးခဲ့တဲ့ စက်တင်ဘာ ၁၀ရက် ရေဘေး အတွင်း မိုင်းဆတ်ခရိုင်နဲ့ မိုင်းတုံ ခရိုင်အတွင်းက တံတားတွေကျိုး၊ လမ်းတွေပျက်စီးကာ မြေပြိုမှုတွေဖြစ်ခဲ့သလို ဆက်သွယ်ရေးတိုင်နဲ့ စက်တွေ၊ ကြိုးတွေပြတ်တောက်မှုတွေ ဖြစ်ပွားခဲ့ပြီး ပြန်လည်ပြုပြင်တာ ဒီနေ့ အောက်တိုဘာ၉ရက်အထိ မပြီးစီးသေးတာကြေင့် ဒေသခံတွေ အခက်ကြုံနေရတာလို့ သိရပါတယ်။
“ကြားတာတော့ (ပြန်လည်ပြုပြင်ဖို့) ငွေမရှိဘူးလို့ကြားတယ်။ လုပ်တော့လုပ်နေကြပေမယ့် ငွေမလောက်ဘူးလို့ပြောနေကြတယ်။ဆိုက်ခေါင်တံတားဆို ဟိုဖက်ဒီဖက် ချိတ်ဆက်ဖို့ပဲကျန်တာ၊ ခုထိမပြီးလို့။ ပျက်သွားတာတွေ၊ ပြုပြင်အစားထိုးရမှာတွေ မသယ်နိုင်သေးဘူးလို့ ဌာနအချင်းချင်း ပြောနေကြတာပဲ”လို့ ဒေသခံ တစ်ဦးကမဲခေါင်ကို ပြောပါတယ်။
လက်ရှိနမ့်ခုတ်ချောင်းကိုဖြတ်သန်းဖို့အတွက် စက်သီးကြိုး၊ ဖောင်၊ စက်လှေတွေနဲ့သာ အသုံးပြု သွားလာနေရဆဲလို့ သိရပါတယ်။
မိုင်းတုံမြို့အဝင်တံတားကိုလည်း အကြမ်းဖျဥ်းသာပြုပြင်နေဆဲဖြစ်သလို မိုင်းဆတ်- မိုင်းတုံကြား ၉မိုင် ၁၁ မိုင်တံတားတွေကို မပြုပြင်တော့ဘဲ လမ်းသစ်ဖောက်ဖို့ လုပ်ဆောင်နေတယ်လို့လည်း သိရပါတယ်။
ဆက်သွယ်ရေးအနေနဲ့ မိုင်းဆတ်မှာ MPT ပြန်ရနေပေမယ့် မိုင်းတုံဘက်မှာ အပျက်အစီးများလို့ နောက်၁လခန့်ကြာမှ ရနိုင်မယ်လို့ ဆက်သွယ်ရေးနဲ့ နီးစပ်သူတွေထံက သိရပါတယ်။
လက်ရှိမိုင်းတုံမှာ 3G သာရတဲ့ CDMA 800နဲ့ စစ်တပ်သုံး Gotta ဖုန်းလိုင်း၁၀၀ခန့်သာဖွင့်ပေးထားလို့ အသုံးများပြီးလိုင်းကြပ်ချိန်တွေမှာ ဖုန်းသာ ပြောလို့ရပြီး အင်တာနက်သုံးလို့မရဘူးလို့ ဒေသခံတွေထံက သိရပါတယ်။
ရေကြီးနေစဉ်အတွင်း မိုင်းဆတ်ကိုပေးတဲ့ မဟာဓာတ်အားလိုင်းတိုင်တွေလဲပြိုပျက်စီးလို့ လျှပ်စစ်မီးမရတာအပြင် ဆက်သွယ်ရေးတာဝါတိုင် ၂၀ခန့်နဲ့ ပါဝါပေးစက်တွေ အများအပြားပျက်စီးကာ ကြိုးတွေပြတ်တောက်ခဲ့လို့ ဖုန်းနဲ့ အင်တာနက်လိုင်းတွေပါ ပျက်နေတာ ဖြစ်ပါတယ်။
လက်ရှိမှာ တာချီလိတ်နဲ့ မိုင်းပန်ဘက်က ကုန်တွေမဝင်လို့ ထိုင်းနယ်စပ် ပါချီးတောတွင်း တောင်ပေါ်လမ်းက တပိုင်တနိုင်သယ်ယူရောင်းချတဲ့ ကုန်ပစ္စည်းတွေကို ဝယ်ယူအသုံးပြုနေရပြီး ဓာတ်ဆီ တစ်လီတာ ၈ဝဝဝ၊ ဆန်ကြမ်းတစ်ပြည် ၁၀၀၀၀၊ ကြက်ဥတစ်လုံး ၇၀၀ ကျပ်၊ ခရမ်းချဥ်တစ်ပိဿာ ၁၀၀၀၀ကျော်နဲ့ မြေပဲဆံနို့ဆီဗူးတစ်ဗူး ၃၀၀၀ကျပ်တို့ကို ဝယ်ယူသုံးစွဲနေရတယ်လို့ သိရပါတယ်။
စက်တင်ဘာလရေဘေးအတွင်း မိုင်းတုံမှာ လူတစ်ဦးသေဆုံးခဲ့ပြီး လယ်ယာမြေထောင်ချီ ရေမြုပ်ပျက်စီးခဲ့ရသလို ရောင်းချဖို့နဲ့ စိုက်ပျိုးဖို့ထားတဲ့ ကြက်သွန်ဖြူပိဿာ သိန်းချီပျက်စီးခဲ့ရတယ်လို့ စုံစမ်းသိရှိရပါတယ်။
MK – 012
