မဲခေါင်၊ အောက်တိုဘာ ၂
အောက်တိုဘာ ၁ ရက်နေ့ မွန်းလွဲပိုင်းက ထိုင်းနိုင်ငံ ဥထိုင်းဌာနီကနေ ဘန်ကောက်ကို DNA မှတ်တမ်းယူ ခရီးစဉ် ထွက်တဲ့ ကျောင်းဘတ်စ်ကား မီးလောင်ပေါက်ကွဲမှုကြောင့် ၂၃ ယောက်သေဆုံးခဲ့ရတဲ့ ဖြစ်ရပ်ဆိုးအတွက် ထိုင်း ရဲတပ်ဖွဲ့က ယာဉ်မောင်းနဲ့ ဘတ်စ်ကားကုမ္ပဏီကို ပေါ့ဆမှုနဲ့ အမှုဖွင့်လိုက်ပါတယ်။
ဒီဘတ်စ်ကားဟာ ဆရာ၊ ဆရာမ ၆ ယောက်နဲ့ကျောင်းသား ၃၉ ယောက်တင်ဆောင်လာပြီး ရှေ့ဘီးပေါက်က ထိန်းမရဖြစ်ချိန် ကားတစ်စီးနဲ့ဝင်တိုက်သလို လမ်းဘေး ကွန်ကရစ် အရန်အတားနဲ့ဆောင့်ရာက ရုတ်တရက် လျှင်မြန်စွာ မီးလောင်ပေါက်ကွဲမှုတွေဖြစ်ခဲ့လို့ ဆရာမ ၃ ယောက်အပါ စုစုပေါင်း ၂၃ ယောက် သေဆုံးခဲ့ရပါတယ်။
လူမှုကွန်ရက်ပေါ်က ဗီဒီယိုတွေမှာ ယာဉ်မောင်းဟာ မီးလောင်တော့ ဘေးနားက ကားတွေဆီက မီးသတ်ဆေးဗူး တွေယူပြီး ငြိမ်းသတ်ဖို့ ကြိုးစားတာမြင်တွေ့ရသလို ယာဉ်အပြင်ဘက် အလယ်ပိုင်းနားက အရေးပေါ် တံခါးပေါက်ဖွင့်ဖို့လည်း ကြိုးစားခဲ့သေးတာ မြင်တွေ့ရပါတယ်။
ဒါပေမဲ့ ၈ ကြိမ်၊ ၉ ကြိမ်အထိ ပေါက်ကွဲလောင်ကျွမ်းမှု မြန်ဆန်လွန်းတာကြောင့် ကယ်ဆယ်ရေးတပ်ဖွဲ့တွေ ကယ်ထုတ်ပေမယ့် သေဆုံးမှုများပြားလွန်းခဲ့ပြီး လက်ရှိအထိ ကလေး ၃ ယောက်ကို ဆေးရုံတင်ကုသနေရဆဲဖြစ်ကာ ၂ ယောက်က စိုးရိမ်ရတဲ့အဆင့်မှာ ရှိနေ ပါသေးတယ်။
နောက်တစ်ယောက်ကတော့ ၇ နှစ်အရွယ် မိန်းကလေးဖြစ်ပြီး မျက်နှာမီးလောင်ခဲ့လို့ မျက်လုံး မကွယ်စေရေး အစွမ်းကုန်ကြိုးစားကုသနေရတယ်လို့ သိရပါတယ်။
ယာဉ်မောင်းဟာ မီးမနိုင်တော့ဘဲ ပေါက်ကွဲချိန် နာရီအတော်ကြာပျောက်သွားပြီး ဖုန်းပိတ်ထားတယ်လို့ ဒေသတွင်း သတင်းတွေမှာ ဖော်ပြခဲ့သလို ညနေပိုင်းမှာ ကိုယ်တိုင်ရဲစခန်းကိုလာရောက် ဖမ်းခံခဲ့တယ်လို့လည်း သိရပါတယ်။
စုံစမ်းစစ်ဆေးမှုတွေပြုလုပ်နေရာမှာ ဒီဘတ်စ်ကားဟာ ဂတ်စ်အိုး ၆ လုံးသာ အများဆုံးတင်ဆောင် ခွင့်ပြုထားပေမယ့် ၁၁ လုံးအထိတင်ဆောင်လာကြောင်း၊ ယာဉ်မောင်းဟာ အရှိန်မထိန်းနိုင်ချိန်ကတည်းက ကားကို ချက်ချင်းရပ်တန့်နိုင်ဖို့ ကြိုးစားမှု မလုပ်ခဲ့သလို အရေးပေါ် တံခါးဟာလည်း ဖွင့်နိုင်တဲ့အနေအထားမှာ ရှိနေခဲ့ကြောင်း၊ (လွယ်လင့်တကူ ဖွင့်ရမရကိုတော့ ရှင်းလင်းစွာမသိရ) မှန်တံခါးတွေကို အရေးပေါ် ထုဖွင့်နိုင်တဲ့ ကိရိယာတွေလည်း ထားရှိတာမတွေ့ရလို့ ကားကုမ္ပဏီနဲ့ ယာဉ်မောင်းကို ပေါ့ဆမှုနဲ့ အမှုဖွင့်လိုက်ကြောင်း ထုတ်ပြန်သွားပါတယ်။
ယာဉ်ပိုင်ဆိုင်တဲ့ ကုမ္ပဏီသူဌေးကတော့ သူ့ကားကို သတ်မှတ်ချက်အတိုင်း တစ်နှစ် ၂ ကြိမ် စစ်ဆေးမှုအောင်မြင်ခဲ့သလို ဂတ်စ်အိုးတွေလည်း အရည်အသွေးပြည့်မီခဲ့တယ်လို့ တုံ့ပြန် ပြောကြားထားပါတယ်။
ထိုင်းကုန်းလမ်းပို့ ဆောာင်ရေးဝန်ကြီးဌာနကတော့ ထိုင်းမှာရှိသမျှ ဂတ်စ်သုံးယာဉ်တွေရဲ့ စနစ်ကို ပြန်လည်စစ်ဆေးပြီး အဆင့်မြှင်တင်မှုတွေ လုပ်ဆောင်သွားမယ်လို့ ကြေညာခဲ့ပါတယ်။
Ref: washingtontimes
MKF-001
