မဲခေါင်၊ စက်တင်ဘာ ၅
“ဝ” ပြည် သွေးစည်းညီညွတ်ရေးတပ်မတော် (UWSA) တပ်ဖွဲ့က တန့်ယန်းမြို့မြောက်ပိုင်းကို သိမ်းယူပြီးသံလွင်မြစ်ပေါ်ရှိ တရုတ်ရေကာတာစီမံကိန်းများအတွက် လမ်းခင်းပေးနေတယ်လို့ ရှမ်းပြည်ရင်းနှီးမြုပ်နှံမှု လေ့လာစောင့်ကြည့်ရေးအဖွဲ့ -Shan State Frontline Investment- SSFIM က ဒီနေ့ စက်တင်ဘာ၅ ရက်နေ့မှာ ထုတ်ပြန်ပါတယ်။
လွန်ခဲ့သောလပိုင်းက UWSA တပ်ဖွဲ့က တန့်ယန်းမြို့ မြောက်ဘက်ခြမ်းကို သိမ်းယူခဲ့တာဟာ တရုတ်ရဲ့ရေရှည်စီမံကိန်းဖြစ်တဲ့ သံလွင်မြစ်ပေါ်က နောင်ဖာရေကာတာစီမံကိန်း မကြာခင်မှာ အမှန်တကယ်ဖြစ်လာမယ်ဆိုတဲ့ ဒေသခံတွေရဲ့ စိုးရိမ်စိတ်ကို တိုးမြင့်လာစေနေတယ်လို့ ထုတ်ပြန်ချက်မှာ ပါရှိပါတယ်။
“အဓိကကတော့ လက်ရှိဒေသတွင်းဖြစ်နေတဲ့ အခြေအနေကို လူထုအများသိစေချင်တာရယ်၊ တရုတ်အစိုးရအနေနဲ့ လက်ရှိသံလွင်မြစ်ပေါ်က ရေကာတာစီမံကိန်းတွေကို အမြန်ရပ်ပေးဖို့ရယ် ပြောချင်ပါတယ်” လို့ SSFIM က တာဝန်ရှိသူ စိုင်းခမ်းလူက မဲခေါင်ကို ပြောပါတယ်။
UWSA တပ်ဖွဲ့ဟာ ပြီးခဲ့တဲ့ ဇူလိုင်လ ၁၀ ရက်နေ့မှာ အင်အား ၂၀၀၀ ကျော်နဲ့ သံလွင်မြစ်အရှေ့ခြမ်းက ရောက်လာကာ တန့်ယန်းမြို့နဲ့ တန့်ယန်း-မိုင်းရယ် လမ်းမကြီးတစ်လျောက် နေရာယူစဥ်ကာလတွင်မှ တန့်ယန်းမြို့ကို UWSA သိမ်းပိုက်ခဲ့တာကို လူထု သိရတာလို့ ဆိုပါတယ်။
လူထုကတော့ UWSA တပ်ဖွဲ့ဟာ စစ်ကောင်စီလက်အောက်ခံ မန်ပန်ပြည်သူ့စစ်ကို လွန်ခဲ့တဲ့ ၅ လကတည်းက ဖယ်ရှားကာ တန့်ယန်းမြို့မြောက်ဘက်ခြမ်းကို ထိန်းချုပ်ခဲ့ပြီးဖြစ်တာလို့ ထုတ်ပြန်ချက်မှာ ဖော်ပြထားပါတယ်။
UWSA တပ်ဖွဲ့ဟာ သံလွင်မြစ်ထဲသို့ စီး၀င်တဲ့မြစ်လက်တက်ဖြစ်တဲ့ နမ့်မမြစ်ပေါ်မှာ တည်ဆောက် နေသော ၂၂၅ မဂ္ဂ၀ပ်ထွက်ရီမယ့် မန်တုံရေကာတာစီမံကိန်းနှင့် မျက်နှာခြင်းဆိုင် သံလွင်မြစ်အနောက်ဘက်ကမ်းကို ထိန်းချုပ်နေရာယူထားတာလို့ ဆိုပါတယ်။
မန်တုံရေကာတာစီမံကိန်းဟာ တရုတ်အစိုးရပိုင် Hydrochina ကော်ပိုရေးရှင်းနဲ့ မြန်မာစစ်တပ်က ခရိုနီတွေပိုင်တဲ့ IGE ကုမ္ပဏီတို့ ဖက်စပ်လုပ်ဆောင်တဲ့ သံလွင်မြစ်ပေါ်မှာ တည်ဆောက်မယ့် ၁၂၀၀ မဂ္ဂ၀ပ်ထွက်ရှိမယ့် နောင်ဖာရေကာတာစီမံကိန်း တည်ဆောက်မှုသဘောတူညီမှုမှာ ပါဝင်တဲ့ စီမံကိန်းတစ်ခုအပါအ၀င်ဖြစ်တယ်လို့ သိရပါတယ်။
အဆိုပါရေကာတာစီမံကိန်းနှစ်ခုလုံးဟာ BOT စနစ်နဲ့ တည်ဆောက်ဖို့စီစဥ်ထားတဲ့ စီမံကိန်းတွေဖြစ်ပြီး ထွက်ရှိလာမည့်စွမ်းအင်ရဲ့ အနည်းဆုံး၅၀ % ကိုတရုတ် နိုင်ငံသို့တင်ပို့ရန်လျာထားတယ်လို့ ထုတ်ပြန်ချက်မှာ ပါရှိပါတယ်။
MK-012
