မဲခေါင်၊ ဇူလိုင် ၁၉
မန္တလေးတိုင်း၊ မိုးကုတ်မြို့မှာ ဆန်ဈေး အဆမတန် မြင့်တက်ပြီး ဆန်ပြတ်လပ်နေတာကြောင့် နေ့စဉ် ဆန်အခက်အခဲ ဖြစ်နေပြီး ဆန်အလှူရှင်တွေကို အားကိုးနေရတယ်လို့ မြို့ခံတွေက ပြောပါတယ်။
ဇွန်လ ၂၅ ရက် ၁၀၂၇ စစ်ဆင်ရေး စတင်ကတည်းက ဆန်ဈေး တဖြည်းဖြည်း တက်လာပြီး ဆန်ဆိုင်တချို့မှာပါ ဆန်ပြတ်လပ်လာတာကြောင့် လုပ်ငန်းရှင်တချို့နဲ့ ပရဟိတ အဖွဲ့အစည်းတွေက အိမ်ထောင်စုတစ်စုကို အနည်းဆုံး ဆန်တစ်ပြည်လှူပေးနေရတယ်လို့ ဆိုပါတယ်။
“ဆန်တစ်အိတ်က ၃ သိန်းနား ကပ်နေတော့ ဘုရားတနေရတယ်။ ဆန်ဝယ်ရင် ဘုရား၊ တရား မမေ့ဘူး။ ဈေးမေးတိုင်း ဘုရားတရလို့။ လှူတဲ့သူက နေ့တိုင်းရှိတယ်။ အယောက် ထောင်ချီဆိုတော့ တော်တော်စောင့်ရတယ်။ တချို့က မစောင့်နိုင်လို့ ပြန်ကြတယ်” လို့ တန်းစီခဲ့သူ တစ်ဦးက ပြောပါတယ်။
ဆန်အလှူရှင်တွေက မနက် ၈ နာရီမှ ဝေကြပေမယ့် တန်းစီတဲ့ လူတွေက များလွန်းတာကြောင့် ဆန်တစ်ပြည် ရရှိဖို့အတွက် မနက် ၂ နာရီကတည်းက စောင့်နေရတယ်လို့ ကိုယ်တိုင်ကြုံခဲ့ရသူတွေဆီက သိရပါတယ်။
ဒါ့အပြင် ဆန်လှူတဲ့ နေရာတွေမှာ တန်းစီပြီးမှ ဆန်ကုန်သွားတာတွေ ရှိသလို စစ်ကောင်စီတပ်ဘက်ကလည်း လူစုလူဝေးရှိတဲ့နေရာတွေကို လိုက်လံပစ်ခတ်တာတွေ ရှိပေမယ့် လူဦးရေ လျော့သွားတာမျိုး မရှိဘူးလို့ ဆိုပါတယ်။
“ဒီနေ့ကတော့ တစ်အိမ်ချင်းပဲ လိုက်ဝေတော့တယ်။ တန်းစီတာက အန္တရာယ်များလို့လေ။ ဒါပေမယ့် အဲတာက လူတိုင်းမရလို့ ကျနော်တို့လည်း နည်းလမ်းရှာနေတယ်” လို့ ဆန်ဝေပေးနေသူ တစ်ဦးက ပြောပါတယ်။
၁၀၂၇ စစ်ဆင်ရေး ဒုတိယပိုင်း မစတင်ခင်က ဆန်အိတ် ၅၀ ထက်ပိုပြီး သိုလှောင်တဲ့ ဆန်ဆိုင်တိုင်းကို စစ်ကောင်စီတပ်က လိုက်လံ ဖမ်းဆီးခဲ့တာကြောင့် အခုလို ဆန်တွေဈေးတက်ပြီး မလုံမလောက် ဖြစ်ရတာလို့ ဆန်ကုန်သည် တစ်ဦးက မှတ်ချက်ပေးပါတယ်။
အရင်က မိုးကုတ်မြို့မှာ မိုးမိတ်ဆန် (ရှမ်းဆန်) တအိတ် ၈ သောင်းကျပ်၊ ကြက်ဥတလုံး ၃၅၀ ကျပ်၊ စားဆီတပိဿာ ၁ သောင်း ၅ ထောင်ကျပ်သာ ကျသင့်ပေမယ့် လက်ရှိမှာတော့ မိုးမိတ်ဆန် တအိတ် ၂ သိန်းခွဲကျပ်၊ ကြက်ဥတလုံး ၁၄၀၀ ကျပ်၊ စားအုန်းဆီ တပိဿာ ၄ သောင်းခွဲ ကျပ်အထိ မြင့်တက်နေပြီး ငွေကြေးအဆင်ပြေတဲ့ လူတွေလည်း အလုံအလောက် ဝယ်ယူမရတော့ဘူးလို့ စုံစမ်း သိရပါတယ်။
MK-014
