မဲခေါင် မေ ၂
ရှမ်း/တောင် ဒေသထွက် အာလူးတွေဟာ နိုင်ငံခြားတင်ပို့တဲ့ ဈေးကွက်နဲ့ ဒေသတွင်း ဝယ်လိုအား ကျဆင်းနေပြီး တောင်သူတွေအနေနဲ့ အရှုံးပေါ်နေတယ်လို့ သိရပါတယ်။
အရင်နှစ်တွေက အာလူး အလုံးကြီး တစ်ပိဿကို(၄၀၀၀)ကျပ်ရှိပြီ အခုနှစ်မှာတော့ တစ်ပိဿာ(၂၅၀၀)ကျပ်နဲ့ အရောသီ တစ်ပိဿကို (၁၉၀၀)ကျပ်ကနေ (၈၀၀)ကျပ်အထိ ထက်ဝက်ကျဆင်းနေတာဖြစ်ပါတယ်။
အောင်ပန်းမြို့က ကုန်စည်ဒိုင်တစ်ဦးက “အဓိက အာလူးစိုက်တောင်သူတွေက တစ်ပြိုင်တည်း အာလူးဖေါ်ကြတယ် အဲ့ဒီတော့ အာလူးတွေက ဒိုင်မှာအကုန်လာပုံပြီး ဝယ်လိုအားကလဲမရှိတော့ ဈေးကျတာပါ။ အာလူးက နုတော့ ကြော်ရောင်းတဲ့သူတွေကလဲ အရသာလျော့တဲ့အတွက် မဝယ်ကြဘူး၊ အာလူးဆိုတာ ရေရှည်အထားခံတဲ့ အသီးမဟုတ်ဘူးလေ ကြာတော့ ပုတ်ကုန်တယ် အရည်အသွေး မပြည့်မှီတာကြောင့် ပြည်တွင်းဝယ်လိုနည်းတာ ဒါကြောင့် ကျွန်တော်တို့လဲ ဝယ်ပြီးလှောင်ထားဖို့က အအေးခန်းတွေဘာတွေ စနစ်တကျမရှိဘူးလေ ဒါကြောင့် ဈေးကျတာပါ”လို့ပြောပါတယ်။
ယခု နှစ်ပိုင်းအတွင်း ရာသီဥတု ပူပြင်းတာကြောင့် ဖေါ်ပြီးသား အာလူးတွေဟာ ပုတ်ကုန်တာတွေရှိပြီး အလေးချိန်လျော့တာ၊ ပိုးဝင်တာတွေကြောင့် အာလူးစိုက် တောင်သူတွေဟာ အခက်တွေ့နေရတာဖြစ်ပါတယ်။
ဒေသတွင်း အာလူးကြော်လုပ်ငန်းတွေဟာ အရသာရှိဖို့ သက်တမ်းရင့် အာလူးတွေသာ အသုံးပြုတာဖြစ်ပြီး၊ ရန်ကုန်၊ မန္တလေး၊ မော်လမြိုင် ဈေးကွက်တွေဟာ အထိုက်အသင့် ဝယ်လိုအားသာရှိပြီး ကျန်ပြည်နယ်နဲ့တိုင်း ဈေးကွက်မရှိဘူးလို့ သိရပါတယ်။
ဒေသတွင်း စိုက်ပျိုးနေတဲ့ အာလူးမျိုးတွေကိုတော့ မြန်မာ့မျိုးရင်းတွေအပြင် Rumba, Babylon, Arizona နဲ့ China(L6) စတဲ့ နိုင်ငံခြားမျိးတွေအပြင် ၊ နယ်သာလန်ထွက် အာလူးမျိုးတွေကိုလည်း တောင်သူတွေက စိုက်ပျိုးနေတာဖြစ်ပြီး ရှမ်း/တောင်ဧရိယာအတွင်း နောင်တရား၊ တီကျစ်၊ ပင်လောင်း၊ အောင်ပန်းမြို့နယ်တွေမှာ အဓိက စိုက်ပျိုးတာဖြစ်ပြီး ဒေသတွင်း အာလူးကြော်လုပ်ငန်းတွေနဲ့ ရန်ကုန်၊ မန္တလေးကို အဓိက တင်ပို့ရတာဖြစ်ပါတယ်။
မြန်မာနိုင်ငံဟာ အာလူးကို ပြည်ပတင်ပို့မှုအနည်းငယ်သာရှိပြီး ယခင်နှစ်တွေက တရုတ်နိုင်ငံက တင်သွင်းမှုတွေကြောင့် တောင်သူတွေ အရှုံးပေါ်ခဲ့တာတွေရှိပြီး ဒေသတွင်း နိုင်ငံတွေအနက် ဘင်္ဂလားဒေ့နိုင်ငံဟာ ကမ္ဘာမှာ အာလူးစိုက်ပျိုးမှုနဲ့ တင်ပို့မှု အများဆုံးနိုင်ငံဖြစ်တယ်လို့ သိရပါတယ်။
MK-002
