မဲခေါင်၊ ဧပြီ ၉
ရှမ်းပြည်နယ် ၊ တောင်ကြီးမြို့၊ မြို့တွင်း နေရာတချို့မှာ ကုန်ကား၊ တွဲကားတွေ မဆင်မခြင် မောင်းနှင်မှုကြောင့် မကြာခဏ ယာဉ်မတော်တဆမှုတွေဖြစ်ပွားပြီး မြို့ခံ ပြည်သူတွေ ထိတ်လန့်နေရတယ်လို့ စုံစမ်းသိရပါတယ်။
တောင်ကြီး – အေးသာယာ အတက်အဆင်းလမ်း၊ အနောက်မြို့ပတ်လမ်းရှိ ဝါးပြားလမ်းဆုံ မီးပွိုင့်နဲ့ သုံးလမ်းဆုံ၊ တက္ကသိုလ် အနီးရှိ သစ်တောဂိတ် မီးပွိုင့်နဲ့နဲ့ ဧရာဝတီ မီးပွိုင့် စတဲ့နေရာတွေမှာ ကုန်ကား၊ တွဲကားတွေ အရှိန်ပြင်း မောင်းနှင်မှုကြောင့် လမ်းသွား/လာ ပြည်သူတွေ အနေနဲ့ လမ်းကြောမရတာ၊ လမ်းပိတ် ဆို့မှုဖြစ်တာတွေ ကြုံနေရတယ်လို့ ဆိုပါတယ်။
တောင်ကြီးကနေ အေးသာယာ နေတိုင်း သွားလာနေသူ တစ်ဦးက “တောင်ကြီးအဆင်းလမ်း ဂကွေ့နေားမှာ မနေ့ညကဆို တွဲကားနဲ့ ဆိုင်ကယ် အပြိုင်မောင်းကြတာ။ ကိုယ်တိုင် ကြုံလာရတာပါ။ ပြိုင်ကားလား တွဲကားလား မသဲကွဲဘူး။ ဆိုင်ကယ်က ချောက်ထဲကျခါနီး နည်းနည်းပဲ လိုတာ “ လို့ ပြောပါတယ်။
ကုန်ကား၊ တွဲကားတွေအတွက် တောင်ကြီးမြို့အတွင်း ကန်ကြီးရပ်ကွက်ကနေ ဝါးပြားလမ်းဆုံအထိ မြို့ရှောင်လမ်း၊ တောင်ကြီးအဆင်း ကရင်မရေထွက်ကနေ အေးသာယာအထိ မြို့ရှောင်လမ်း စတဲ့ လမ်းတွေကို ၂၀၁၅ ခုနှစ်နောက်ပိုင်းကတည်းက NLD အစိုးရ ပြုပြင်မွမ်းမံပေးထားခဲ့ပေမယ့် အဲဒီလမ်းကနေ သွားလာတမျိုး မရှိဘဲ အဓိက ကားလမ်းမကြီးတွေကိုသာ အသုံးပြုနေတယ်လို့ ဆိုပါတယ်။
ညောင်ဖြူစခန်း ရပ်ကွက်မှာ နေထိုင်သူ တစ်ဦးက “ညနေပိုင်း အောက်စျေးနားက အပေါ်ကွေ့ အောက်ကွေ့နားဆို ပိုဆိုးတယ်။ အဲ့နားက အိမ်တွေလည်း လန့်နေရတာ။ တစ်လောကမှ အပေါ်ကွေ့နားက အိမ်တစ်အိမ်ထဲ တွဲကား ဝင်တိုက်သွားသေးတယ်။ လူအထိအခိုက် မရှိလို့ တော်သေးတယ်။ မျက်စိရှေ့တင် ဖြစ်တာ” လို့ ပြောပါတယ်။
တွဲကားတွေ မဆင်မခြင် မောင်းနှင်မှုကြာင့် တောင်ကြီး – အေးသာယာ အတက်လမ်းမှာ ဧပြီလ ၆ ရက်နေ့ ညနေပိုင်းကလည်း တွဲကား ဘရိတ်ပေါက်ပြီး အရှိန်မထိန်းနိုင်ဘဲ အိမ်စီးကား ၃ စီးကို ဝင်တိုက်ကာ လူ ၄ ဦးသေဆုံးခဲ့ပါတယ်။
တောင်ကြီးမြို့မှာ တွဲကား၊ ကုန်ကားတွေကို မြို့ခံတွေက အရှိန်လျော့ မောင်းနှင်စေလိုပြီး သူတို့အတွက် သတ်မှတ်ထားပေးတဲ့ မြို့ရှောင်လမ်းတွေကိုသာ အသုံးပြုစေချင်ပေမယ့် ယာဉ်လိုင်းတွေဘက်က လိုက်နာမှု မရှိတာကြောင့် မြို့ခံတွေအတွက် နေ့စဉ်နဲ့အမျှ စိုးရိမ် ထိတ်လန့်နေရတယ်လို့ သိရပါတယ်။
MK-014
