မဲခေါင်၊ မတ် ၂၉

ရှမ်းပြည်တောင်ပိုင်း၊ ဆီဆိုင်မြို့ကို စစ်ကောင်စီရဲ့ ဆိုက်ခေါင်အထိုင်ချ လက်နက်ကြီးနဲ့ပစ်ခတ်လို့ မွေတော်ဘုရားကုန်း ပျက်စီးနေတဲ့ပုံတွေ ဒေသသတင်းအရင်းအမြစ်တွေ လူမှုကွန်ရက်မှာ ယနေ့ မတ်လ ၂၉ ရက်နေ့မှာ ဖော်ပြလာလို့ သိရပါတယ်။

မြေပြင်စုံစမ်းချက်အရ မွေတော်ဘုရားကုန်းမှာ စစ်ကောင်စီလက်နက်ကြီးနဲ့ တပ်တွေ မရှိတော့ဘဲ စစ်ကောင်စီတပ်ဖွဲ့တွေဟာ မြို့နဲ့ကပ်ရက် တောင်ဘက်က ဘုရားဖြူကျေးရွာနားအထိ နေရာယူထားကြတယ်လို့ သိရပါတယ်။

“မွေတော်ကုန်းမှာ စကစတွေ ရှိနေရင် ဓာတ်ပုံပေးရိုက်မှာ မဟုတ်ဘူး” လို့ ဆီဆိုင်စစ်ဘေးရှောင်တွေက ပြောသလို ဆိုက်ခေါင်အထိုင်ချဟဲဟိုး အမြောက်တပ် ၂၀၇ ကလည်း သူ့တပ်ရှိနေရင် မွေတော်ကို လက်နက်ကြီးနဲ့ပစ်မှာ မဟုတ်ဘူးလို့ သုံးသပ်ပြောဆိုနေကြပါတယ်။

ဆိုက်ခေါင်အမြောက်တပ်ဟာ မတ်လ၂၇ ရက် မှာ လက်နက်ကြီးနဲ့ ၆ချက် ၂၈ ရက်မှာ ၂ချက် ပစ်ခတ်ခဲ့တာလို့ မြေပြင်သတင်းအရင်းအမြစ်ထံက သိရပါတယ်။

အဲဒီပစ်ခတ်မှုက ထိမှန်ချက်အရ မွေတော်ဘုရားကုန်းရဲ့ သာသနာနိကအဆောက်အဦတွေ ပျက်စီးစေသလို ဆီဆိုင်မြို့ အနောက်မြောက်ဘက် ၂ ဖာလုံခန့်က ရွှေဟင်္သာဘုန်းကြီးကျောင်းလဲ ထိမှန်ပျက်စီးခဲ့တယ်လို့ သိရပါတယ်။

စစ်ကောင်စီဟာ ပြီးခဲ့တဲ့ ဇန်နဝါရီ ၂၃ ရက်ကစပြီး ဆီဆိုင်တိုက်ပွဲမှာ မြို့ကိုလက်လွှတ်လိုက်ရပြီးနောက် ဝေဟင်၊ မြေပြင်မှာ မြို့ပြန်သိမ်းနိုင်ဖို့ အကြိမ်ကြိမ် ထိုးစစ်ဆင်နေပြီး ဒီနေ့ မတ်လ ၂၉ ရက်အထိ တင့်ကားတွေနဲ့ပါ တိုက်ခိုက်နေတာ ဖြစ်ပါတယ်။

MK-012

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)