မဲခေါင် ၊ ဇန်နဝါရီ ၁၅
ကိုးကန့်ကိုယ်ပိုင်အုပ်ချုပ်ရေးဒေသအတွင်း စစ်အစိုးရနဲ့ကိုးကန့်ရုပ်သေးအဖွဲ့မှ ထုတ်ပြန်တဲ့ အမိန့်ဥပဒေအမျိုးမျိုးနဲ့ အရေးပေါ်လုံခြုံရေးဥပဒေကို ဇန်နဝါရီလ ၁၄ ရက်နေ့မှ စပြီး ပယ်ဖျက်လိုက်တယ်လို့ ကိုးကန့်အဖွဲ့ -MNDAA က ကြေညာလိုက်ပါတယ်။
ဒါ့အပြင် ကိုးကန့်ဒေသတစ်ခုလုံးကို ကိုးကန့်ကိုယ်ပိုင်အုပ်ချုပ်ရေးဥပဒေနဲ့ အစားထိုးကျင့်သုံးသွားမယ်လို့လည်း ကိုးကန့်အဖွဲ့ရဲ့ ထုတ်ပြန်ချက်မှာဖော်ပြထားပါတယ်။
“ကိုးကန့်ကိုယ်ပိုင်အုပ်ချုပ်ရေးဒေသအတွင်း စစ်အစိုးရမှထုတ်ပြန်သော အမိန့်ဥပဒေအမျိုးမျိုးနှင့် အရေးပေါ်လုံခြုံရေးဥပဒေကို ယခုနေ့မှစတင် ပယ်ဖျက်မည်။ ကိုယ်ပိုင်အုပ်ချုပ်ရေး၏ မူလဥပဒေကို ပြန်လည်ကျင့်သုံးမည်ဖြစ်ပြီး၊ သံသယတစုံတခုရှိခဲ့လျှင် သက်ဆိုင်ရာဒေသ၏ အစိုးရဌာနတွင်စုံစမ်းမေးမြန်းနိုင်သည်” လို့ ဇန်နဝါရီ ၁၄ ရက်က တရုတ်ဘာသာနဲ့ ထုတ်ပြန်တဲ့ ကြေညာချက်မှာဖော်ပြထားပါတယ်။
ကိုးကန့်အဖွဲ့ပါဝင်တဲ့ ညီနောင်မဟာမိတ် ၃ ဖွဲ့နဲ့ စစ်ကောင်စီတို့ တရုတ်ဖိအားကြောင့် အပစ်ခတ်ရပ်စဲရေး သဘောတူညီချက်ရရှိပြီးနောက် ကိုးကန့်အဖွဲ့ဟာ ၁၀၂၇ စစ်ဆင်ရေးတွင်း ၎င်းတို့သိမ်းပိုက်ထားတဲ့ ဒေသမှာ ကိုးကန့်ကိုယ်ပိုင်အုပ်ချုပ်ရေးကို ဖော်ဆောင်လာတာလည်းဖြစ်ပါတယ်။
ကိုးကန့်ဒေသတစ်ခုလုံးရှိ စစ်ကောင်စီတပ်စခန်းတွေအားလုံးကို တိုက်ခိုက်သိမ်းပိုက်ပြီးနောက် ကိုးကန့်ဒေသတစ်ခုလုံးကို စစ်ကောင်စီကင်းစင်နယ်မြေအဖြစ် ကိုးကန့်အဖွဲ့ MNDAA က ကြေညာထားပါတယ်။
CJ-002
#MeKongNews
#ကိုးကန့်
#ဥပဒေ
#စစ်ကောင်စီ
#ဖျက်သိမ်း
