မဲခေါင်၊ ဒီဇင်ဘာ ၆

ရှမ်းပြည်နယ်ရဲ့ မြို့တော်၊ တောင်ကြီးမြို့မှာ ဒီဇင်ဘာလ ပထမ အပတ်ကစပြီး မီးဖိုချောင်သုံးဂတ်စ် စတင် ပြတ်လပ်နေရာ လက်ရှိ ဆိုင်အရေအတွက် ၂၀ ရာခိုင်နှုန်းခန့်ကသာ လက်ကျန်တွေ ရောင်းချနေတယ်လို့ မြို့ခံတွေက ပြောပါတယ်။

လတ်တလော တောင်ကြီးမြို့မှာ လက်ကျန်ရှိတဲ့ ဂတ်စ်ဆိုင်တွေ အနေနဲ့ ၂ ဆနီးပါး စျေးတင် ရောင်းချနေတာကြောင့် အိမ်ရှင်မတွေ အခက်တွေ့နေရတယ်လို့ ဆိုပါတယ်။

“ဂတ်စ်တစ်အိုးရဖို့ တစ်မြို့လုံး ပတ်ရှာလိုက်ရတယ်။ အိုးသေးတွေတော့ သိပ်ပြီး မပြတ်ပေမယ့် တစ်ဝက်ဈေးနီးပါး ရောက်သွားတယ်။ ဈေးတင်ရောင်းတဲ့ ဆိုင်တွေလည်း လက်ကျန်ကုန်ရင် ထပ်ရောက်ဖို့ မသေချာဘူးလို့ ကြားတယ်” လို့ အိမ်ရှင်မ တစ်ဦးက ပြောပါတယ်။

တောင်ကြီးမြို့မှာ အရင်က ဂတ်စ် တစ်ပိဿာ ၆,၅၀၀ ကျပ်သာရှိရာက ဒီဇင်ဘာလ အစပိုင်းက ၈,၅၀၀ ကျပ် ဝန်းကျင်အထိ တက်လာပြီး ဒီကနေ့ ကျပ် ၁၀,၀၀၀ ၀န်းကျင်၊ ၁၈ ကျပ်သား ဂတ်စ်ဘူး အသေး အရင်က ၈၀၀ ကျပ်ကနေ လက်ရှိ ၁,၅၀၀ ကျပ်အထိ ဖြစ်လာတယ်လို့ သူက ဆက်ပြောပါတယ်။

တောင်ကြီးမြို့မှာ တန်ဆောင်တိုင်ပွဲကာလ ပြီးကတည်းက လျှပ်စစ်မီး ပြတ်တောက်လေ့ရှိရာ တနေ့ ပျှမ်းမျှ ၁၀ နာရီ ဝန်းကျင်ခန့်သာ လျှပ်စစ်မီးရတယ်လို့ ဆိုပါတယ်။

အခုလို လျှပ်စစ်မီး မမှန်တဲ့ ကာလမှာ မီးဖိုချောင်သုံးဂတ်စ်ကို အားထားနေရတာကြောင့် ကြာရှည် ပြတ်လပ်ကာ ဈေးတင် ရောင်းချပါက စားဝတ်နေရေး ပိုမိုခက်ခဲလာနိုင်တယ်လို့ အိမ်ရှင်မတွေက ဆိုပါတယ်။

လက်ရှိ နိုင်ငံတ၀ှမ်း မီးဖိုချောင်သုံး ဂတ်စ် ပြတ်လပ်လာတဲ့နည်းတူ စက်သုံးဆီပါ ပြတ်လပ်နေတယ်လို့ သတင်းဖော်ပြချက်တွေအရ သိရပါတယ်။

CJ-007

#MeKongNews

#တောင်ကြီးမြို့

#ဂက်စ်

#သိုလှောင်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)