မဲခေါင်၊ နိုဝင်ဘာ ၁၁
ကရင်နီပြည် မြို့တော် လွိုင်ကော်မြို့ ပတ်ဝန်းကျင်မှာ စစ်ကောင်စီတပ်နဲ့ ကရင်နီ တော်လှန်ရေးတပ်ဖွဲ့တို့ တိုက်ပွဲ ပြင်းထန်နေပြီး လက်နက်ကြီးသံတွေ တောက်လျှောက် ကြားနေရတယ်လို့ ဒေသခံတွေက ပြောပါတယ်။
မနေ့ည ကတည်းက စစ်ကောင်စီတပ်က လက်နက်ကြီးတွေနဲ့ ရမ်းပစ်နေပြီး ဒီကနေ့ မနက်မှာတော့ တိုက်ပွဲ ဖြစ်ပွားခဲ့တာလို့ ဒေသခံတွေက ဆိုပါတယ်။
“ဒီနေ့ မနက်မှာတော့ မြို့ပတ်ပတ်လည်မှာ လက်နက်ကြီး၊ လက်နက်ငယ်သံတွေ အစုံပဲ ကြားရတယ်ဗျ။ မြို့အစွန် ရပ်ကွက်တွေမှာ ဖြစ်တာပေါ့။ မြို့ထဲတော့ အသွားအလာ နည်းသွားတယ်။ နာနတ်တောတို့၊ ထေးငှားလျားတို့ ဘက်မှာ ဖြစ်တယ်။ စစ်ကောင်စီ ဂိတ်တွေရှိတဲ့ နေရာတွေမှာ ပိုဖြစ်တယ်” လို့ လွိုင်ကော်မြို့ခံ တစ်ဦးက ပြောပါတယ်။
တိုက်ပွဲဟာ စစ်ကောင်စီတပ် စစ်ဆေးရေးဂိတ်တွေရှိတဲ့ နေရာတွေမှာ ပိုပြင်းထန်ပြီး တစ်ခြားနေရာမှာလည်း ပစ်ခတ်သံတွေ ကြားနေရတယ်လို့ ဆိုပါတယ်။
“မပြေးဖြစ်ဘူးဗျ။ မြို့ပတ်ပတ်လည်မှာ ပစ်ခတ်သံတွေ ထွက်နေတော့ ပြေးရမလား၊ မပြေးရမလားလဲ မသိသေးဘူး။ အခုထိတော့ လက်နက်ငယ် ပစ်ခတ်သံတွေ နည်းနည်းပြန်ငြိမ်နေတယ်ဗျ။ တစ်ချို့နေရာက တစ်ဖက်သတ် ပစ်သလိုမျိုးပဲ။ လက်နက်ကြီးသံတော့ မပြတ် ကြားနေရတုန်းပဲ” လို့ လွိုင်ကော်မြို့ခံ နောက်တစ်ဦးက ပြောပါတယ်။
လက်ရှိ စစ်ကောင်စီတပ်ဟာ လွိုင်ကော် တက္ကသိုလ်မှာ နေရာယူထားပြီး လက်နက်ကြီးတွေနဲ့ တောက်လျှောက် ပစ်ခတ်နေရာ လက်ရှိ သတင်းရေးသားချိန်အထိ လက်နက်ကြီး ပစ်ခတ်သံတွေ ကြားနေရဆဲ ဖြစ်ပါတယ်။
လွိုင်ကော်မြို့ရှိ ပြည်သူတွေ အနေနဲ့ ညဘက်သာမက နေ့ခင်းဘက်မှာပါ အပြင်ထွက် သွားလားခြင်း မပြုဘဲ လုံခြုံရေး အထူးသတိထားကြဖို့ KNDF ရဲ့ စစ်ရေးချုပ်က လူမှုကွန်ရက် စာမျက်နှာပေါ်မှာက တစ်ဆင့် သတိပေး တိုက်တွန်းထားပါတယ်။
CJ-002
#MekongNews
#KNDF
#လွိုင်ကော်မြို့
#တော်လှန်ရေး_တပ်ပေါင်းစု
