မဲခေါင်၊ ဇူလိုင် ၁၈
စစ်ဘေးရှောင် ပြည်သူတွေကို လူသားချင်းစာနာမှု အကူအညီပေးဖို့ သွားရောက်စဉ် ယာဉ်တန်း အပစ်ခံရလို့ မအောင်မြင်ခဲ့တဲ့ ခရီးစဉ်ကို ဒုတိယအကြိမ် ထပ်မံ သွားရောက်ပြီး စစ်ဘေးရှောင် ပြည်သူတွေကို အကူအညီ ပစ္စည်း ပေးအပ်ခဲ့တယ်လို့ ပအိုဝ်းအမျိုးသား လွတ်မြောက်ရေး အဖွဲ့ချုပ်-PNLO တာဝန်ရှိသူ တစ်ဦးက ပြောပါတယ်။
အာယဆီယံ လူသားချင်း စာနာမှု အကူအညီ ညှိနှိုင်းဆောင်ရွက်ရေး ဗဟိုဌာန-AHA နဲ့ PNLO ပူးပေါင်း စီစဉ်တဲ့ စစ်ဘေးရှောင် ပြည်သူများ လူသားချင်း စာနာမှု အကူအညီပေးရေး ပစ္စည်းတွေကို PNLO အဖွဲ့က ဇူလိုင်လ ၁၆ ရက်နေ့မှာ ကရင်နီပြည်ကနေ စစ်ဘေးရှောင်လာတဲ့ ပြည်သူတွေကို ပေးအပ်ခဲ့ပါတယ်။
အဲ့ဒီအကူအညီပစ္စည်းတွေကို ကရင်နီပြည်ကနေ ရှမ်း-ကရင်နီနယ်စပ်၊ ဆီဆိုင်မြို့နယ်၊ ရေဖြူကျေးရွာကို စစ်ဘေးရှောင်လာတဲ့ ပြည်သူ ၁၄၅၀ ဦးကို PNLO က ပေးအပ်ခဲ့တာ ဖြစ်ပါတယ်။
ဇူလိုင် ၁၆ ရက်မှာ ပေးအပ်တဲ့ အဲ့ဒီ လူသားချင်းစာနာမှု အကူအညီတွေကတေ့ာ ဆန်အိတ် ၄၀၀၊ Family Kit ၄၀၀ နဲ့ Hygiene Kit ၁၄၅၀ တို့ဖြစ်တယ်လို့ PNLO တာဝန်ရှိသူက ပြောပါတယ်။
“ပထမတစ်ခေါက် အပစ်ခံရလို့ စစ်ရှောင်ပြည်သူတွေကို ကူညီဖို့ မအောင်မြင်ခဲ့တာကို AHA နဲ့ PNLO ပူးပေါင်းပြီး ဆက်လုပ်တဲ့ အကူအညီပေးရေး လုပ်ငန်းစဉ်တွေပေါ့။ အကူအညီတွေကတော့ ဆန်ရယ် မိသားစု အသုံးအဆောင် ပစ္စည်းတွေ တစ်ကိုယ်ရည် အသုံးအဆောင်ပစ္စည်းတွေ ဖြစ်ပါတယ်” လို့ PNLO ပြောရေးဆိုခွင့်ရှိသူ ဗိုလ်မှူးခွန်မြင့်သိန်း ကပြောပါတယ်။
ပြီးခဲ့တဲ့ မေလ ၇ ရက်မှာ အာဆီယံ သံတမန်တွေနဲ့ ပအိုဝ်းအမျိုးသား လွတ်မြောက်ရေး အဖွဲ့ချုပ် PNLO ကိုယ်စားလှယ်တွေ ပါဝင်တဲ့ ယာဉ်တန်း ပအိုဝ်းဒေသ အတွင်း ရောက်ရှိလာတဲ့ စစ်ဘေးရှောင်တွေကို လူသားချင်းစာနာမှု အကူအညီပေးဖို့ သွားရောက်စဉ် ဆီဆိုင်မြို့အနီးမှာ ပစ်ခတ်ခံခဲ့ရတာ ဖြစ်ပါတယ်။
ပစ်ခတ်ခံရမှုကြောင့် အာဆီယံ သံတမန်တွေပါတဲ့ ယာဉ်တန်းဟာ စစ်ရှောင်ပြည်သူတွေကို အကူညီပေးခွင့် မရရှိခဲ့ပဲ စစ်ကောင်စီက ယာဉ်တန်းကို ပြန်လည်ဆုတ်ခွာခိုင်း ခဲ့ပါတယ်။
အဲ့ဒီပစ်ခတ်မှုဟာ စစ်ကောင်စီလက်အောက်ခံ ဌာနေ ပြည်သူ့စစ်တွေက နောက်ကွယ်ကနေ စေခိုင်းတဲ့ လူတွေရဲ့ အမိန့်အရ ပြုလုပ်တာ တွေ့ရတယ်လို့ ပအိုဝ်းအမျိုးသား ဖက်ဒရယ်ကောင်စီ-PNFC က ထုတ်ပြန်ထားပါတယ်။
CJ-002
#MeKongNews
#အာဆီယံ
#PNLO
#ဆီဆိုင်မြို့နယ်