မဲခေါင်၊ ဩဂုတ် ၇

ကရင်နီပြည် ကြားကာလ အုပ်ချုပ်ရေးကောင်စီ-IEC အနေနဲ့ ပြည်သူ့အကျိုး ဆောင်ရွက်ဖို့ အတွက် ဌာန ၇ ခု ဖွဲ့စည်းပြီး အုပ်ချုပ်ရေး ယန္တရား အကောင်အထည် ဖော်နေတယ်လို့ IEC က ကြေညာလိုက်ပါတယ်။

“ကရင်နီပြည် ကြားကာလ အုပ်ချုပ်ရေး ကောင်စီရဲ့ လှုပ်ရှားဆောင်ရွက်မှုများကို ပြည်သူထံ တင်ပြ အစီရင်ခံခြင်း” ဆိုတဲ့ ခေါင်းစဉ်နဲ့ မနေ့က ကြေညာရာမှာ ပြည်သူလူမှုဘဝ လုံခြုံရေးနဲ့ ပြည်သူ့ဝန်ဆောင်မှု လုပ်ငန်းတွေ ထိထိရောက်ရောက် ဆောင်ရွက်နိုင်ဖို့ အနည်းဆုံး အထောက်အကူပြု ဌာန ၁၂ ခု စုဖွဲ့ဆောင်ရွက်ဖို့ စီစဉ်ထားရာမှ ဦးစားပေး ဌာန ၇ ခု စတင် ဖွဲ့စည်း ဆောင်ရွက်နေပြီလို့ IEC က ပြောပါတယ်။

လတ်တလော ပညာရေးဌာန၊ ကျန်းမာရေးဌာန၊ လူသားချင်းစာနာ ထောက်ထားမှုနှင့် ပြန်လည်ထူထောင်ရေးဌာန၊ ပြည်ထဲရေးဌာန၊ ကာကွယ်ရေးနှင့် လုံခြုံရေးဌာန၊ အမျိုးသမီးနှင့် ကလေးသူငယ်ရေးရာဌာန၊ စီမံကိန်း ဘဏ္ဍာရေးနှင့် အခွန်ဌာန ဆိုပြီး ဌာန ၇ ခုကို ဦးစားပေး ဆောင်ရွက်နေပြီ ဖြစ်ပါတယ်။

“ဦးစားပေး ဌာနများကို ဆောင်ရွက်နေစဉ် တချိန်တည်းမှာပဲ ပြည်သူတွေရဲ့ အခြေခံ လိုအပ်ချက်များကို ဖြည့်ဆည်း ပေးနိုင်ဖို့ စီစဉ်နေပါတယ်” လို့ IEC တာဝန်ရှိသူ တစ်ဦးက ပြောပါတယ်။

အထူးသဖြင့် ကျောင်းနေအရွယ် ကလေး အားလုံး ပညာသင်ခွင့် ရရှိရေး၊ ပြည်သူများ အခြေခံ ကျန်းမာရေး စောင့်ရှောက်မှု လက်လှမ်းမှီရေး၊ စစ်ဘေးရှောင် ပြည်သူတွေနဲ့ ဒေသခံပြည်သူတွေအတွက် အရေးပေါ် စားနပ်ရိက္ခာနဲ့ လူ့အသုံးအဆောင် ပစ္စည်းများ ရရှိနိုင်ရေး စတာတွေ ဖြစ်တယ်လို့ ထုတ်ပြန်ချက်မှာ ဖော်ပြပါတယ်။

ဒါ့အပြင် တရားဥပဒေ စိုးမိုးရေးနဲ့ ပြည်သူ့ဘဝ လုံခြုံမှုအတွက် ပြည်ထဲရေးဌာနအောက်မှာ ရှိတဲ့ ကရင်နီပြည်ရဲ- KSP ကို စနစ်တကျ စုဖွဲ့ခြင်း၊ တရားစီရင်ရေးစနစ်နဲ့ တရားရုံးများ တည်ထောင်ခြင်း၊ ကျေးရွာ၊ ကျေးရွာအုပ်စု၊ မြို့နယ်၊ ပြည်နယ်ဆိုတဲ့ အထွေထွေ အုပ်ချုပ်ရေး ယန္တရား လည်ပတ်နိုင်ရေး ကရင်နီ အထွေထွေ အုပ်ချုပ်ရေးဌာနကို (Department of General Administration-Karenni–DGAK) ဖွဲ့စည်းဆောင်ရွက်ခြင်း စတာတွေကို ကြားကာလ အုပ်ချုပ်ရေးကောင်စီရဲ့ ကြီးကြပ်မှုနဲ့ သက်ဆိုင်ရာ ဌာန အသီးသီးက အားသွန်ကြိုးပမ်း အကောင်အထည်ဖော်နေတယ်လို့ IEC တာဝန်ရှိသူက ပြောပါတယ်။

IEC အနေနဲ့ အခုလို အကောင်အထည်ဖော်ရာမှာ ပညာရေး၊ ကျန်းမာရေး၊ အရပ်ဘက်အဖွဲ့အစည်း၊ ပညာရှင်၊ အလှူရှင်နဲ့ တော်လှန်ရေး အင်အားစုတွေအပြင် KSCC၊ NUG တို့နဲ့ ပုံမှန်ချိတ်ဆက် ညှိနှိုင်း ဆောင်ရွက်နေတယ်လို့ ဆိုပါတယ်။

ကရင်နီပြည် ကြားကာလ အုပ်ချုပ်ရေးကောင်စီ (Karenni State Interim Executive Council-IEC) ကို ၂၀၂၃ ခုနှစ်၊ ဇွန်လ ၆ ရက်နေ့မှာ ကရင်နီပြည်ရဲ့ အုပ်ချုပ်ရေးကို ပြည်နယ် ကြားကာလ အစီအမံနဲ့အညီ လက်တွေ့ အကောင်အထည်ဖော်ဖို့ ဦးတည်ချက် ၅ ရပ် ချမှတ်ကာ အဖွဲ့ဝင် ၆ ဦးနဲ့ စတင်ဖွဲ့စည်းခဲ့တာ ဖြစ်ပါတယ်။

CJ–002

#MekongNews

#ကရင်နီပြည်ကြားကာလအုပ်ချုပ်ရေး_ကောင်စီ

#ကရင်နီပြည်ရဲ

#စီမံကိန်းဘဏ္ဍာရေးနှင့်အခွန်ဌာန

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)