မဲခေါင်၊ မေ ၃
ကရင်နီပြည်၊ ဘောလခဲမြို့မှာ စစ်ကောင်စီတပ်ဖွဲတွေ နေရာယူထားတဲ့ စစ်မှုထမ်းဟောင်းရုံး၊ လ.ဝ.က ရုံး၊ မြို့မရဲစခန်းနဲ့ ရုပ်/သံလွှင့်ဌာန တို့ကို မေလ ၁ ရက်နေ့မှာ ဝင်ရောက် စီးနင်း တိုက်ခိုက်ခဲ့တယ်လို့ ဘောလခဲ ပြည်သူ့ကာကွယ်ရေးတပ်ဖွဲ့-BPDF က ဒီကနေ့ ထုတ်ပြန်ပါတယ်။
မေလ ၁ ရက်နေ့၊ မနက် ၅ နာရီ ဝန်းကျင်မှာ စစ်ကောင်စီတပ်နဲ့ ပြည်သူ့ကာကွယ်ရေးပူးပေါင်းတပ်တို့ တိုက်ပွဲ စတင်ဖြစ်ပွားရာ အချိန် ၂ နာရီကျော ်ကြာမြင့်ခဲ့ပြီး မနက် ၇ နာရီ ဝန်းကျင်မှာ ပြည်သူ့ကာကွယ်ရေး ပူးပေါင်းတပ်ဖွဲ့တွေ ပြန်လည် ဆုတ်ခွာခဲ့တယ်လို့ သိရပါတယ်။
အဆိုပါ စီးနင်း တိုက်ခိုက်မှု အတွင်း စစ်မှုထမ်းဟောင်းရုံးကို မီးရှို့ဖျက်ဆီးနိုင်ခဲ့ပြီး လ.ဝ.က ရုံးကို ဝင်ရောက် ရှင်းလင်းချိန် စစ်ကောင်စီရဲ့ အမှတ် (၄၃၀) တပ်ရင်းက စစ်ကူတွေ ရောက်လာတာကြောင့် ပြန်လည် ဆုတ်ခွာခဲ့ရတယ်လို့ BPDF ရဲ့ ထုတ်ပြန်ချက်မှာ ဖော်ပြပါတယ်။
တိုက်ပွဲအတွင်း စစ်ကောင်စီတပ်သား ၇ ဦး သေဆုံးပြီး ၁၃ ဦးထက်မနည်း ထိခိုက်ဒဏ်ရာရခဲ့တာကြောင့် လူနာတွေကို စစ်ရဟတ်ယာဉ်နဲ့ လာရောက် သယ်ဆောင်သွားတယ်လို့ ဆိုပါတယ်။
တိုက်ပါအြတွင်း ဘောလခဲ ပြည်သူ့ကာကွယ်ရေးတပ်မတော်-BPDF အမှတ် (၁၁၀၅) တပ်ရင်းက ရဲဘော် ၂ ဦး ကျဆုံးပြီး တစ်ဦး ပြင်းထန်ဒဏ်ရာ ရခဲ့တယ်လို့ ထုတ်ပြန်ချက်မှာ ဖော်ပြပါတယ်။
ဘောလခဲမြို့တွင်း တိုက်ပွဲအပြီး စစ်ကောင်စီတပ်ထံက G4 တစ်လက်၊ AK 22 တစ်လက်၊ G4 ကျည်ဘောက် ၆ ဘောက်၊ AK ကျည်ဘောက် ၃ ဘောက်၊ လက်ပစ်ဗုံး တစ်လုံးနဲ့ ကျည်ဆံတချို့ သိမ်းဆည်း ရမိခဲ့တယ်လို့ ဘောလခဲ PDF က ဓာတ်ပုံတွေနဲ့ တကွ ထုတ်ပြန်ချက်မှာ ထည့်သွင်း ဖော်ပြထားပါတယ်။
အဆိုပါ ဘောလခဲမြို့တွင်း စီးနင်း တိုက်ပွဲကို ဘောလခဲ ပြည်သူကာကွယ်ရေးတပ်ဖွဲ့-BPDF အမှတ် (၁၁၀၅) တပ်ရင်းနဲ့ ဖားဆောင်း ပြည်သူ့ကာကွယ်ရေး တပ်ဖွဲ့-PPDF အမှတ် (၁၁၀၈) တပ်ရင်းတို့ ပါဝင်တဲ့ ဘောလခဲခရိုင် ပူးပေါင်း ဗျူဟာ စစ်ကြောင်းက တိုက်ခိုက်ခဲ့တယ်လို့ သိရပါတယ်။
MK-009
#MeKongNews
#ဘောလခဲမြို့
#PDF
#စစ်မှုထမ်းဟောင်းရုံး
