ပြီးခဲ့တဲ့လက ပြည်တွင်း ရွှေဈေးနှုန်းဟာ ကျပ် ၂၆ သိန်းကျော် ၂၇ သိန်း ဝန်းကျင်မှာ တည်ငြိမ်နေခဲ့ရာမှ ဇန်နဝါရီလ ၃ ရက်နေ့မှ စတင်ကာ ကမ္ဘာ့ရွှေဈေး မြင့်တက်မှုနဲ့ အတူ ပြည်တွင်း ရွှေဈေး ကျပ် ၂၇ သိန်းကျော်အထိ မြင့်တက်လာတယ်လို့ ရွှေကုန်သည်တွေက ပြောပါတယ်။
၃ ရက်အတွင်းကို ၅၀,၀၀၀ လောက်တက်တာ။ ၂၆ သိန်းကျော်နဲ့ ငြိမ်နေတာကြာပြီ။ အခုက ကမာ့္ဘဈေးတက်လို့ တက်တာ။ ဒေါ်လာလည်း အလှုပ်အခတ် ရှိလာတယ်။ ဈေးတက်လာ ပေမယ့် အရောင်းအဝယ် ကြမ်းလာတာမျိုးကို မတွေ့ရဘူး။ ပုံမှန်ပဲ။ စောင့်တော့ကြည့်ရမှာပေါ့။ အရောင်း အဝယ်က ပုံမှန်ရှိတယ်
လို့ ရန်ကုန်မြို့မှ ရွှေကုန်သည် တဦးက ဆိုပါတယ်။
ကမ္ဘာ့ရွှေဈေးဟာ ပြီးခဲ့တဲ့ ဒီဇင်ဘာ လကုန်ပိုင်းက တစ်အောင်စ ၁,၇၉၉ ဒေါ်လာ ရှိရာမှ လက်ရှိ ၁,၈၅၁ ဒေါ်လာ အထိ ဈေးတက်လာပြီး ရွှေဈေးနဲ့ အတူ ထိုင်းဘတ်ငွေဈေး ပြန်တက်လာရာ အရင် တဘတ်ကို ကျပ် ၈၀ အောက်သာ ရှိရာက လက်ရှိ တဘတ်ကို ၈၂ ကျပ်ကျော်အထိ မြင့်တက်လာတယ်လို့ သိရပါတယ်။
နှစ်သစ်ကာလ ကမ္ဘာရွှေဈေးတက်တာနဲ့ တရုတ်နှစ်သစ်ကူး ကာလ ဖြစ်လို့ ရွှေဈေး မြင့်တက်လာတာ ဖြစ်ပြီး အသင်းနဲ့ စစ်ကောင်စီရဲ့ ထိန်းကျောင်းမှုကြောင့် ပြန်လည် ကျဆင်းလာမယ်လို့ ရန်ကုန် ရွှေအသင်း တာဝန်ရှိသူက ပြောဆိုထားပါတယ်။
“ရွှေအသင်းက ရည်ညွှန်းဈေး ကတော့ သိပ်တက်မလာဘူး။ သူတို့ ရည်ညွှန်းဈေးက ဘာမှ လုပ်လို့မရတော့ ဘယ်သူကမှ စိတ်မဝင်စားဘူး။ အရောင်းအဝယ်သမားတွေက ဈေးတန်း တစ်ခုမှာ ငြိမ်နေတာကိုပဲ ကြိုက်တယ်။ အခုလို ဈေးတက်တာက အန္တာရာယ်ရှိတယ်။ ဈေးတွေ တက်လာတဲ့ အတွက် စသုံးလုံးက စုံးစမ်းတာတွေ၊ စစ်လား ဆေးလား မေးမြန်းမှုတွေ လုပ်အုံးမယ်။ အလုပ်တွေ ရှုပ်တာပေါ့” လို့ ပဲခူးမြို့မှ ရွှေဆိုင်ပိုင်ရှင် တဦးက ဆိုပါတယ်။
ပြီးခဲ့တဲ့ ဇန်ဝါရီလ ၃ ရက်နေ့နဲ့ ၄ ရက်နေ့က ၂၇ သိန်း ဝန်းကျင်ကျော် ပေါက်ဈေးရှိလာတဲ့ ရွှေဈေးဟာ ဒီကနေ့ ညနေပိုင်းမှာတော့ အခေါက်ရွှေ တကျပ်သား ၂၇ သိန်း ၄ သောင်းကျော်နဲ့ ဈေးပိတ်ခဲ့တယ်လို့ ဈေးကွက်အတွင်းမှ သိရပါတယ်။
