မဲခေါင်၊ ဧပြီ ၅
တိုင်းရင်းသားမဟုတ်သည့် ဟန်တရုတ်များကို ကွတ်ခိုင်မြို့ အုပ်ချုပ်ရေးတွင် ထည့်သွင်းပြီး ဒေသခံတိုင်းရင်းသားအဖြစ် ကိုးကန့်တပ်ဖွဲ့ – MNDAA က ပုံဖော်လာသည်ဟု ဒေသခံ သတင်းရင်းမြစ်များထံမှ သိရသည်။
ကွတ်ခိုင်မြို့ကို တိုက်ခိုက် သိမ်းပိုက်ပြီးနောက် ပြန်လည် ပြုလုပ်သည့် ရပ်ကွက်အုပ်ချုပ်ရေးမှူး ရွေးကောက်ပွဲ သတင်းထုတ်ပြန်မှုတွင် ဟန်တရုတ်လူမျိုးများကို ဒေသခံ တိုင်းရင်းသားအဖြစ် MNDAA က ရှမ်း၊ ကချင်၊ တအာင်းတိုင်းရင်းသားများနှင့် တန်းတူ ဖော်ပြလာသည်ကိုလည်း တွေ့ရသည်။
“ကွတ်ခိုင်မြို့နယ်သည် ဟန်လူမျိုး၊ တအာင်း၊ ကချင်၊ ရှမ်းစသည့် တိုင်းရင်းသားပေါင်းစုံ စုပေါင်းနေထိုင်ရာ ဒေသဖြစ်သည်”ဟု MNDAA ထုတ်ပြန်ချက်တွင် ဖော်ပြထားသည်။
ကွတ်ခိုင်မြို့ပေါ် ၈ ရပ်ကွက်တွင် ရပ်ကွက် ၃ နှင့် ၄ ၌ တရုတ်လူမျိုးများပြီး ကျန်ရပ်ကွက်များမှာ တအာင်း၊ ကချင်၊ ရှမ်း စသည့် တိုင်းရင်းသားပေါင်းစုံ စုပေါင်းနေထိုင်ကြသည်။
MNDAA က ပြုလုပ်သည့် ရပ်ကွက်အုပ်ချုပ်ရေးမှူး ရွေးချယ်ပွဲတွင်လည်း ဟန်တရုတ်များသာ မဲအများဆုံးလာပေးခဲ့ကြပြီး အသစ်ခန့်အပ်သည့် အုပ်ချုပ်ရေးမှူးများတွင်လည်း တရုတ်လူမျိုး ၁၀ ဦးထက်မနည်း ပါဝင်ကြောင်း ကွတ်ခိုင်မြို့ခံတစ်ဦးက ပြောသည်။
“ရပ်ကွက် ၃၊ ၄၊ ၆၊ ၇၊ ၈ အုပ်ချုပ်ရေးမှူးတွေ အကုန်လုံးက တရုတ်တွေချည်းပဲ၊ ကျန်တာ TNLA ထိန်းချုပ်ချိန်က အုပ်ချုပ်ရေးမှူးလုပ်ဖူးတဲ့ ၂ ယောက်ပါတယ်။ ပြီးတော့ ကချင် နည်းနည်းပါတယ်။ ကွတ်ခိုင်မှာနေတာက ကချင်၊ တအာင်း၊ ရှမ်းက အများဆုံးဆိုပေမယ့် အခု ရွေးတဲ့ အုပ်ချုပ် ရေးမှူးတွေထဲမှာ တအာင်းရော၊ ရှမ်းရော တစ်ယောက်မှ ဝင်ရွေးခွင့်မပြုဘူး”ဟု ၎င်းက ဆိုသည်။
မြန်မာနိုင်ငံ အစိုးရအဆက်အဆက်မှ တရားဝင်အတည်ပြုထားသည့် မြန်မာနိုင်ငံဆိုင်ရာ တိုင်းရင်းသားလူမျိုးများတွင် ဟန်တရုတ်လူမျိုးများကို မြန်မာနိုင်ငံ တိုင်းရင်းသားလူမျိုးအဖြစ် သတ်မှတ်ထားခြင်း မရှိကြောင်း ရှမ်းမြောက်ရှိ ဥပဒေပညာရှင်တစ်ဦးက ရှင်းပြသည်။
“ဟန် ဆိုတာက တရုတ်တွေ သူတို့ကိုယ်သူတို့ ခေါ်တဲ့ လူမျိုးနာမည်ပါ၊ ဟန်တရုတ်တွေက မြန်မာနိုင်ငံတိုင်းရင်းသား မဟုတ်ပါဘူး။ ဟန်တရုတ်လူမျိုး အချို့ကို နိုင်ငံသားပေးထားတာ ရှိပေမယ့် တိုင်းရင်းသားအဖြစ် သတ်မှတ်ထားတာ မဟုတ်ဘူး၊ နိုင်ငံသားနဲ့ တိုင်းရင်းသား မတူဘူး။ အစိုးရက သတ်မှတ်ထားတဲ့ တိုင်းရင်းသား ၁၃၅ မျိုးထဲမှာလည်း ဟန်တရုတ် မပါဘူး”ဟု ယင်းဥပဒေပညာရှငက ပြောသည်။
ကွတ်ခိုင်မြို့ကို ကိုးကန့်တပ်ဖွဲ့ – MNDAA က ၎င်းတို့၏ မဟာမိတ်တပ်ဖွဲ့ဖြစ်သည့် တအာင်းတပ်ဖွဲ့ – TNLA ထံမှ မတ် ၁၄ ရက်တွင် ထိုးစစ်ဆင် တိုက်ခိုက် သိမ်းပိုက်ခဲ့ခြင်း ဖြစ်သည်။
#MeKongNews
#ဟန်တရုတ်
#ကွတ်ခိုင်မြို့
#အုပ်ချုပ်ရေး
#တိုင်းရင်းသား
#MNDAA
